Read ronga I Yhn 2 Bible Online

I Yhn 2 - ronga bible

I Yhn 2

¹Vana vanga, nin'witralela timhaka leti, akuva n'wingatxhuki n'widoha. Kambe loko mhunu adohile hini mupfuni ku Tatana, anga Yesu Kriste lweyi wa kululama.

²Hi yene anga mhamba ya kususa swidoho sweru; swinge sweru ntsena, kambe swakuva swa misava hinkwayu.

³Laha hi switivaka ha kone leswaku hamutiva Tatana hi loko hi bekisa swileleto swake.

⁴Lweyi aliki namutiva Xikwembu Nkulukumba na anga bekisi swileleto swake, awa hemba, a xihlayelamfuri axi kone ku yene.

⁵Kambe lweyi a bekisaka ritu drakwe, a lirandru dra Xikwembu Nkulukumba drihetisekile ku yene; hilaha hiswitivaka ha kone leswaku hi le ku Yene.

⁶Lweyi aliki atrhama ku Yene afanela kufamba swanga hi leswi na yene afambisiki xi swone.

⁷ Varandriwa, anin'witraleli nawu wumpswha, kambe wakuva lowu wakhale, lowu afaka n'wili nawu kehe kusunguleni, a nawu lowu wa khale i ritu ledri n'widriyingeliki.

⁸Nakone ni n'witralela nawu lowu wumpswha, lowu wunga xihlayelamfuri ku Kriste ni le ku n'wine, hikusa a munyama wuhundrile, alivaningo dra xihlayelamfuri dra vaninga kutani.

⁹Lweyi ahlayaka leswaku ale livaningweni na anyenya makwavu ahali munyameni ni swoswi.

¹⁰Lweyi arandraka makwavu atrhami livaningweni akuna xikhunguvanyiso ku yene.

¹¹Kambe lweyi anyenyaka makwavu atrhami munyameni, afamba munyameni, angativi lomu ayaka kone, hikusa a munyama wudlayi mahlu yake.

¹²Nan'witralela vana vanga, hikusa a swidoho swenu swidrivaleliwile hinkonta yatimpswalu ta vumhunu bya Kriste.

¹³Nan'witralela vapswele, leswaku n'wamutiva lweyi afaka ana ali kone kehe kusunguleni. Nan'witralela vampswha, hikusa n'wihluli mubihi.

¹⁴Vana vanga, mine ni n'witraleli hikusa n'wamutiva Tatana. Vapswele, mine ni n'witraleli hikusa n'wamutiva lweyi afaka ana ali kone kehe kusunguleni. Vampswha, mine ni n'witraleli hikusa n'witiyile, kutani a Ritu dra Xikwembu Nkulukumba dritrhami ku n'wine, mfuri n'wihluli mubihi.

¹⁵N'wingarandreni misava nambi mili mintxhumu leyi minga ku yone. Loko mhunu arandra misava, a lirandru dra Tatana adri kone ku yene,

¹⁶hikusa hinkwaswu leswi swinga misaveni, akunavela ka nyama, ni kunavela ka mahlu ni kunavela ka nhlengwe, aswipfi ku Tatana, kambe swipfa misaveni.

¹⁷Ke, a misava yahundra, nambi kunavela ka yone; kambe lweyi ayentxaka kurandra ka Xikwembu Nkulukumba a trhama hilaha kungahelikiki.

¹⁸Vana vanga, a nkama wa vugamu hi wolowu, swanga hileswi n'wiswiyingeliki leswaku a Nala wa Kriste (anti-kriste) atata, ni swoswi vunyingi bya valala va Kriste(va antikriste) vahumelela; hikola ka leswo haswitiva leswaku hiwolowu nkama wa vugamu.

¹⁹Vone vahumi makari kweru, kambe afa vange va kakweru. Loko afa vali veru afa vatava vatrhami na hine. Kambe va fambile akuva va vonekisiwa leswaku afa vange veru, na mun'we ku vone.

²⁰Kolahu-ke n'wine, n'wingani kutotiwa ka lweyi wa kuxwenga, na kone n'witiva hinkwaswu.

²¹Loko mine ni n'witralela hileswaku n'wine n'witiva xihlayelamfuri; ni leswaku amakone madrimi lawa mahumaka xihlayelamfurini.

²²Kolahu i mani lweyi wa madrimi? Loko kunge lweyi ahlayaka leswaku Yesu ahi Kriste? Lweyo hi lweyi anga Nala wa Kriste, lweyi alandrulaka Tatana ni N'wana.

²³Lweyi alandrulaka N'wana, na kone atrhama na ange na Tatana. Kutani lweyi apfumelaka N'wana, na kone ana Tatana.

²⁴Kolahu aswitrhami ku n'wine leswi n'wiswiyingeliki kehe kusunguleni. Loko switrhama ku n'wine leswi n'wiswiyingeliki kusukela kusunguleni, kutani n'wine n'witatrhama ku n'wana ni le kutatana.

²⁵Lexi hixone xidumbiso lexi Yene ahidumbisiki, anga vutomi lebyingahelikiki.

²⁶Ni n'witralela mintxhumu leyi hinkonta ya lava vadjulaka kun'wikanganyisa.

²⁷Ke, akutotiwa loku n'wikuyamukeliki ku Yene akutrhami ku n'wine, hikola ka leswo an'wina kuvilela ka leswaku mhunu a n'widondrisa. Kambe swanga hileswi akutotiwa loku kwake kutiyiki kungeke na madrimi, kutan'widondrisa henhla ka mintxhumu hinkwayu, swanga hileswi n'wingadondrisiwa swone, xiswoswo trhamani ku Yene.

²⁸Kutani swoswi ke vana vanga, trhamani ku Yene, akuva loko Yene ativonakalisa hita dumba, na hi ngavi lava vasoliwaka mahlweni kwake, akubuyeni kwake.

²⁹N'waswitiva n'wine leswaku Yene alulamile, ni leswaku lweyo ni lweyo lweyi alulamiki, apswaliwi ha Yene.