Read ronga I Yhn 5 Bible Online

I Yhn 5 - ronga bible

I Yhn 5

¹Lweyo ni lweyo apfumelaka leswaku Yesu i Kriste, a pswaliwa hi Xikwembu Nkulukumba. Ni lweyo ni lweyo arandraka Tatana arandra ni lava vapswaliwiki ha Yene.

²Hine hitiva leswaku hi randra vana va Xikwembu Nkulukumba, loko hi randra Xikwembu Nkulukumba hi yentxa swileleto swake.

³ Hikusa leswo hi drone lirandru dra Xikwembu Nkulukumba leswaku hibekisa a swileleto swake. Kutani a swileleto swake aswibindri,

⁴hikusa lweyo ni lweyo lweyi apswaliwiki hi Xikwembu ahlula misava. Kutani akuhlula loku hi kone kunga henhla ka misava, inga kupfumela kweru.

⁵Kutani i mani lweyi angaswikotaka kuhlula misava? Loko ange lweyi apfumelaka ntsena leswaku Yesu i N'wana wa Xikwembu Nkulukumba?

⁶Lweyi hi Yene lweyi atiki hi mati ni ngati, Yesu Kriste, Yene angatanga hi mati ntsena, kambe hi mati ni ngati. Kutani a Moya hi wone wuhi bekelaka vumboni, hikusa a Moya lowo i xihlayelamfuri.

⁷Hikusa kuni vararu lava vanyikaka vumboni a Matilweni: Tatana, ni ritu, ni Moya wakuxwenga, kutani lava vararu i mun'we.

⁸Kutani lava vararu vone vabeka vumboni la misaveni: a Moya wakuxwenga, ni mati, ni ngati, kutani leswi swiraru swatwana a mhakeni yin'we.

⁹Loko hine hi yamukela a vumboni bya vhanu, a vumboni bya Xikwembu Nkulukumba i byikulu ngopfu, hikusa a vumboni bya Xikwembu Nkulukumba hibyolebyi abyikombisiki hinkonta ya N'wana wakwe.

¹⁰Lweyi apfumelaka ku N'wana wa Xikwembu Nkulukumba ani vumboni, lweyi angapfumelikiki ku Xikwembu Nkulukumba, amuyentxa amuhembi, hikusa angapfumelanga a vumboni lebyi Xikwembu Nkulukumba ahinyikaka hinkonta ya N'wana wakwe.

¹¹ Kutani a vumboni hi lebyi: Xikwembu Nkulukumba ahi nyiki vutomi lebyi byingahelikiki, a vutomi lebyo byi le ku N'wana wakwe.

¹²Lweyi angani N'wana ani vutomi; lweyi angaliki na N'wana wa Xikwembu Nkulukumba angana vutomi.

¹³Ni n'witraleli mintxhumu leyi akuva n'witiva leswaku n'wini vutomi lebyi byingahelikiki, leswaku n'wipfumela ku Vito dra N'wana wa Xikwembu Nkulukumba.

¹⁴Hikoloku, akudumba loku hinganaku ku Yene hileswaku: loko hikombela xa ntxhumu hikulandra kurandra kwake, kutani Yene awahiyingela.

¹⁵Mfuri loko hiswitiva leswaku Yene awa hi yingela kuhinkwaswu leswi hikombelaka, hinikudumba ka leswaku hinihinkwaswu leswi hinga mukombelaka.

¹⁶Loko mhunu avona makwavu ayentxa xidoho, xidoho lexi xingayisiki kufeni, afanela kukhongota ku Xikwembu Nkulukumba, kutani Xikwembu Nkulukumba atanyika vutomi lava vangayentxiki xidoho lexi xiyisaka kufeni, kuni xidoho lexi xiyisaka kufeni, na kone, hi xidoho lexo, anihlayi leswaku afanela kukhongota.

¹⁷A ntiru wakukari wavusomboloki i xidoho, kambe kuni xidoho lexi xingayisikiki kufeni.

¹⁸Haswitiva leswaku lweyo ni lweyo apswaliwiki hi Xikwembu Nkulukumba angadohi ni kan'we, kambe lweyi apswaliwiki ha Xikwembu Nkulukumba awa mubekisa; kutani a mubihi anganakuswikota kumukhumba.

¹⁹Haswitiva leswaku hi va Xikwembu Nkulukumba, ni leswaku a misava hinkwayu mifumiwa hi mubihi.

²⁰Haswitiva ha kunene leswaku a N'wana wa Xikwembu Nkulukumba atile, ahi nyiki vutlhari byakuva hitiva leswi inga xihlayelamfuri. Kutani hi le kuxihlayelamfuri, ku N'wanake, Yesu Kriste. Yene i Xikwembu Nkulukumba hi ntshima, na anga vutomi lebyi byingahelikiki.

²¹Vana vanga, tivonelani ku swikwembu swakuka-ndlela.