Read ronga Yd 1 Bible Online

Yd 1 - ronga bible

Yd 1

¹ Yuda, nandra wa Yesu Kriste, ni makwa Yakobe, kuvavitaniwa ka lava vakurandreka ku Xikwembu Nkulukumba Tatana, wa lava vabekisiwaka ku Yesu Kriste;

²a lirere ni kurula ni lirandru aswiyandrisiwe ku n'wine.

³Varandriwa, leswi ni khinyelisisaka kun'witralela swakuhuluka kweru, ave hikolahu nitiyingeliki nani sindriseka kun'witralela, ni n'witratriya ni n'witiyisa leswaku n'wilwela kupfumela loku a vapfumeli vanyikiwiki kone kan'we.

⁴Hikusa kunhingeni van'we vhanu hi xihundla, lava kusukela ka khale vatraleliwiki kuyavanyisiwa; vhanu va kubiha, vandruluta timpswalu ta Xikwembu Nkulukumba weru hivubihi, na kone valandrula Yesu Kriste lweyi anga Mudondrisi weru ntsena ni Hosi.

⁵Nambi loko n'wiswitiva swinene hinkwaswu, ni randra kun'widrimuxa, leswaku a Hosi yati yihuluxa vhanu va yone avukaraweni bya Egipta, yitlhela yi vasuvisa lava vakukala vangapfumelanga.

⁶Ni tintrumi leti tingabekisangakiki xiyimu xa tone, kambe tisukeli ambangwini wa tone, Yene atibekisile amunyameni hi timpentxana leti tingahelikiki, kukota kutlhasa tremo dra siku ledrikulu.

⁷ Swanga ha Sodoma na Gomora ni mimiti leyi afaka miyaki kusuhi, leyi mitinyiketele vuwosweni swanga ha yone, ni kulandra yimbeni, yone mibekeliwi akuva xifaniso xa ndrilo lowu wungahelikiki, hikola ka leswo miyamukeli xikhatiso xa ndrilo lowu wungahelikiki, minyiketiwa kukhatisiweni.

⁸Switanu ni volavo kambe, valora, vahona miri yavu, vayalela vuhosi, varuka lava vafumaka kuphatimeni.

⁹Kambe Mikayele ntrumi leyi yikulu loko akanetana na Diyavulosi, valwetana ntrumbu wa Moxe, atxhavi kuhumexa ritu drakusola, eku: “A Hosi ayikukhatise!”

¹⁰Kasi lavo varuka hinkwaswu leswi vangaswitivikiki; kambe hinkwaswu leswi vaswitivaka himatumbulukela yavu, swanga hi swihari leswi ngeke naku kuyanakanya, vatihona ha swone.

¹¹ Yowee ku vone! Hikusa vafambi hi ndlela ya ka Kayim, hikunavela hakelo, vatrutrumeli xihonweni xa Balaami, vasuvi akukaneteni ka Kora.

¹²Vhanu lavo, i tingana aminkhubyini yenu ya lirandru, vada na n'wine vangatxhavi, vatibyisa ha swavu; i matlavi lawa mangeke na mati, lawa masusumetiwaka hi timheho; i minsinya leyi mibuniki leyi mingapswalikiki, mihandru leyi mifiki, leyi mingekena mitru.

¹³I mavimbi lawa ya kulebya ya likhulu, lawa matlhutlhaka likasi dratingana tavu, i tinyeleti leti hambukiki, leti bekiseliwiki ntima wa munyama hilaha kungahelikiki.

¹⁴ Na yene Henoki, lweyi wa vuntlhanu na vabiri antrhaku ka Adamu, aprofetile ha vone, aku: Lavisa, Hosi yata ni madzana-dzana ya Yone,

¹⁵akutayavukanyisa hinkwaswu, ni kukholwisa hinkwavu lava vakukala vukhongoti, ni hikola ka mintiro yavu hinkwayu leyi ya kukala vukhongoti, leyi vamitiriki, ni hi swifingeto hinkwaswu, leswi vanga yifingeta ha swone, vadohi lava kukala vukhongoti.

¹⁶Lava hi lava n'unun'utelaka, lava hlatiyelaka hi kunavela kwavu, a milomu yavu mivulavula mandrendre, na vatiyentxa lava randrekaka ku van'wana kambe ntsena kuli kutidjulela swavu.

¹⁷Kambe, n'wine, varandriwa, drimukani maritu lawa mangakhaneliwa khale hi vapostola va Hosi Yesu Kriste.

¹⁸Afa va n'wibyela vaku: Ankameni wa vugamu kutava ni vhanu lava taka kanganyisa van'wana, lava vatakafamba hi kunavela kwavu.

¹⁹Lava hi lava hambanisaka van'wana; vafamba hi swavumhunu, na vangena Moya wa Xikwembu Nkulukumba.

²⁰Kambe n'wine, varandriwa, tiyakani avupfumeleni byenu lebya kuhlawuleka, ngopfu na n'wikhongota hi kutlhangana ni Moya wa Kuxwenga.

²¹Miya mahlweni hi kuhanya alirandrwini dra Xikwembu Nkulukumba, na n'wilavisela lirere dra Hosi yeru Yesu Kriste, driyisaka vuton'wini lebyi byingahelikiki.

²²Vanani ni lirere ku van'we lava ganaganekaka;

²³vahuluxani, n'wivawutla andrilweni swanga tihunyi; ku van'wanyana, vanani ni lirere hi xitxhavu, n'winyenya ni nkhantxu lowu nyamisiwiki hi mintiro ya kubiha.

²⁴Ke, Yene lweyi anganintamu wa kun'wibekisa kuswikhunguvanyiso, ni kun'wiyimisa mahlweni ka kuphatima kwake hikutrhava na mingena nandru,

²⁵ku Xikwembu Nkulukumba lweyi anga mun'we, Muhuluxi weru, mahlweni ka Yesu Kriste, Hosi yeru, akuve lidrumu ni vukulu, ni ntamu ni vuhosi, na minkama hinkwayu minga sina tumbuluka, kusukela swoswi ni hi madzana-dzana ya malembe hinkwawu matakata. Amen!