Read ronga Mpf 1 Bible Online

Mpf 1 - ronga bible

Mpf 1

¹Apfuletelo wa Yesu Kriste, lowu Xikwembu Nkulukumba amunyikiki, akuva akomba a malandra yake leswi switakahumelela ndreni ka nkamanyana, leswi aswitivisiki na arumeli hikola ka ntrumi yake, ku nandra wakwe Yohana,

²lweyi avikini kutiyisa ku ritu dra Xikwembu Nkulukumba ni ku vumboni bya Yesu Kriste, mayelano ni hinkwaswu leswi yene aswivoniki.

³Kukateki lweyi ahlayaka ni lava vayingelaka a maritu ya vuprofeta vava vabekisa leswi switraliwiki ku drone, hikuva a nkama wutrhindrekelile.

⁴Mine Yohana, ku makereke lawa ya ntlhanu na mabiri lawa manga Aziya: A timpswalu ni kurula aswive na n'wine swipfaka hi le ku Lweyi anga kone, afaka ali kone, mfuri ahataka, ni hi le ku mimoya leyi ya ntlhanu na mibiri, leyi minga mahlweni ka xitrhamu xakwe xa vuhosi,

⁵ni hi le ku Yesu Kriste, a Mboni ya kudumbeka, mativula ya lava va kufa, Hosi ya vafumi va misava. Ku lweyi ahirandraka, ahitrunxiki ku swidoho sweru hi ngati yake,

⁶mfuri ahiyentxiki mfumu ni vaprista, na ayentxela Xikwembu Nkulukumba, Tatana wakwe, ku Yene, a lidrumu ni vufumi hi madzana-ni-madzana ya malembe. Amen.

⁷Vonani, awata hi le makari ka matlavi, a mahlu ya vhanu hinkwavu matamuvona, nambi lava vamutlhaviki, mfuri a vhanu va tinxaka hinkwatu ta misava vatamudrilela, im'na, Amen!

⁸Mine ni Alfa mfuri ni Omega, kuhlaya Hosi Xikwembu Nkulukumba, lweyi anga yene, afaka ali yene, ni lweyi atakata, lweyi anga wa ntamu hinkwawu.

⁹Mine Yohana, makwenu ni muhlengeli na n'wine akuxanisiweni, ni le Mfun'wini, ni le kutiyiseleni loku kunga ku Kriste, nivi axihlaleni lexi xitxhuliwaka Patimosi, hinkonta ya ritu dra Xikwembu Nkulukumba, ni vumboni bya Yesu.

¹⁰Afa nili Moyeni, hi siku dra Hosi, kutani niyingela a ritu ledri drikulu a ntrhaku kwanga, dra kufana ni dra nanga,

¹¹afaka driku: Leswi uswivonaka switrale apapelweni, uswirumela amakerekeni lawa ya ntlhanu na mabiri: A Efesa, ni le Simirna, ni le Pergamosi, ni le Tiyatira, ni le Sardesi, ni le Filadelifiya, ni le Lawodikiya.

¹²Kutani nindruluki akuva nivona lweyi afaka avulavula na mine; novona a ntlhanu na mabiri wa mimotre ya gole;

¹³amakari ka mimotre afa kuni wa kufana ni n'wana wa mhunu, na ayambali xiyambalu xa kuleha xitlhasa aminkondrweni, atikhami xifuva hi bandi dra gole.

¹⁴A nhloko ni misisi yake afa swili swa ntlhohe swanga hi voya lebyi bya ntlhohe, swanga hi xitrhwatrhwa; a mahlu yake swanga langavi dra ndrilo;

¹⁵a minkondro yake afa mifana ni nsuku lowu nyukisiwiki, swanga hi loko wu hisiwa fulweni[1]; ni ritu drakwe swanga hi pongwe dra mati lawa manyingi.

¹⁶A vokweni dra xinene afa atameli ntlhanu wa tinyeleti na tibiri, anon'wini wakwe afa kuhuma lipanga dra kulotiwa ha matlhelo mabiri; ni mombo wakwe afa wufana ni dambu loko driphatima hi ntamu wa drone.

¹⁷Loko nimuvonile niwi aminkondrweni yake swanga nifile. Kutani abeka a voko drakwe dra xinene a henhla kwanga, aku: Ungatxhave! Ni wa kuranga ni wa vugamu;

¹⁸ni lweyi ahanyaka! Afa nifile, kambe swoswi nahanya hi madzana-ni-madzana ya malembe, mfuri nini mimpfungulu ya lifu ni ya le Hades.

¹⁹Trala-ke, leswi uswivoniki, ni leswi swinga kone, ni leswi switakahumelela antrhaku ka swone.

²⁰Hi lowu a ntlhamuxelo wa xihundla xa ntlhanu na tibiri wa tinyeleti, leti utivoniki avokweni dranga dra xinene, ni xa ntlhanu na mabiri wa mimotre, ya gole: A ntlhanu na tibiri wa tinyeleti i tintrumi ta ntlhanu na mabiri wa makereke; kasi-ke a ntlhanu na mabiri wa mimotre hi ntlhanu na mabiri wa makereke.