Read ronga Mpf 11 Bible Online

Mpf 11 - ronga bible

Mpf 11

¹Ninyikiwi lihlanga dra kufana ni nhonga ya kupima ha yone, nibyeliwa leswi: Sekeleka, upima a Tempele dra Xikwembu Nkulukumba ni xiluvelo, ni lava gandrelaka kone.

²Kambe a phangu dra le handle ka Tempele drisiye handle, ungadripime, hikusa drinyikiwi ku va-Matiko; kutani vatakakandretela a muti wa kuxwenga hi mune wa makume ya tihweti na tibiri.

³Nakone nitanyika timboni tanga leti ta tibiri, akuva titaprofeta hi xipimo xa khume dra madzana, na madzana mabiri na ntlhanu na drin'we wa makume ya masiku, na tiyambali masaka.

⁴Toleto i Minhlwari mibiri ni mimotre mibiri leyi miyimiki amahlweni ka Hosi ya misava.

⁵Ni loko mhunu adjula a kuvavisa a timboni leto, kuhuma ndrilo amilon'wini ya tone, wusuvisa a valala va tone; im'na, lweyi adjulaka a kutivavisa, xiswoswo atafenela hi kudlayiwa!

⁶A timboni leto tini ntamu wa kupfala a tilo, akuva a mpfula yingani hi masiku ya kuprofeta ka tone, mfuri tini ntamu wa kundruluta a mati mava ngati, ni wa kuvavisa a misava hi tinxaka hinkwatu ta makhombo, ha kanyingi swanga hi lana tidjulaka ha kone.

⁷Loko a timboni titava tiheti a vumboni bya tone, a xihari xa kulebya xitahuma akheleni dra kuyeta ngopfu, xitalwa na tone, xitatihlula xiva xitidlaya,

⁸ni mintrumbu ya tone mitava hubyini bya muti wukulu, lowu wutxhuliwaka hi le moyeni, Sodoma na Egipta, lomu na swone kungavambiwa a Hosi ya tone.

⁹Kutani vanyingi ku vhanu va-Matiko, va tinxaka, ni va tindrimi, vahlalela mintrumbu ya tone ha masiku mararu ni hafu ya siku; vangapfumeli leswaku a mintrumbu ya tone milahliwa amaxireni.

¹⁰Kutani a vayaki va le misaveni vatrhava hi kola ka tone, vatrhavisisa, varumelana ni swinyiko van'we ku van'wana, hikusa a vaprofeta lava vabiri vaxanisi lava yakiki amisaveni.

¹¹A ntrhaku ka masiku mararu ni hafu ya siku, a moya wa vutomi, wupfaka hi le ku Xikwembu Nkulukumba, wunhingena ku timboni, tisekeleka tiyima, kutani a ntxhavu wukulu wuwela lava afaka vatihlalela.

¹²Kutani tiyingela a ritu drikulu dripfa tilweni driku ku tone: Tlhantukelani haleno! Tintlhantukela tilweni hi tlavi, na valala va tone vahlalela.

¹³Ankameni wolowo kavi ni kutrekatreka kukulu ka misava, kutani a xiyenge xa vukhume xa muti xihohloka, kudlawa hinkonta ya kutrekatreka loko ka misava, ntlhanu wa makume na makume mabiri ya madzana ya vhanu (7.000); kasi lava vasaliki vakhomiwi hi ntxhavu wukulu, vadrumisa Xikwembu Nkulukumba wa Matilo.

¹⁴A khombo dra vubiri drikhalutile; lavisa, a khombo dra vuraru drata kungali khale.

¹⁵A ntrumi ya vuntlhanu na tibiri yiyimba a nanga. Kutani kuva ni maritu makulu atilweni, na maku: A mfumu wa misava wundruluki wuva wa Hosi yeru, ni wa Kriste wakwe, lweyi atakafuma hi madzana-ni-madzana ya malembe!

¹⁶A vakulu-va-vhanu va makume mabiri na mune, lava vatrhamiki aswitrhan'wini swavu swa vufumi amahlweni ka Xikwembu Nkulukumba, vawa hi mimombo yavu, vagandrela Xikwembu Nkulukumba,

¹⁷vaku: Hakutlangela, Hosi Xikwembu Nkulukumba wa ntamu hinkwawu, wene unga kone, afaka uli kone, hikusa uteki a ntamu waku lowukulu, kutani ufumile!

¹⁸A matiko mahlundrukile, kambe a mahlundru yaku na wone mahumelele, ni nkama wa kuyavanyisiwa ka vafi ni wa kuva unyika a hakelo ku vaprofeta, a malandra yaku, ni ku vahlawuleki, ni ku lava vatxhavaka a vito draku, lava vatrongo, ni lava vakulu, ni wa kuhelisa lava vahelisaka misava!

¹⁹Kutani kupfuliwa a Tempele dra Xikwembu Nkulukumba, ledri dringa Tilweni; kuvoniwa Arka dra xipfumelelanu xakwe a Tempeleni drakwe, kutani kuhumelela kuhatima, ni maritu, ni kudruma ka tilo, ni kutrekatreka ka misava, ni mpfula ya maribyana makulu.