Read ronga Mpf 12 Bible Online

Mpf 12 - ronga bible

Mpf 12

¹ Ka kuvoneka a xikombiso lexikulu tilweni. Afa ali wansati, na ayambali dambu, ni hweti a hansi ka minenge, ni ngiyana yin'we ya khume dra tinyelete na tibiri a nhlokweni.

²Afa ali ni nyimba, abandlukana hiku yingela kuvaviseka kakulun'wa, a xaniseka hinkonta ya kuphuluka.

³ Kutani kuvoneka xin'wana xikombiso tilweni, afa ali dragoni ledrikulu dra libungu, dringani ntlhanu wa tinhloko na tibiri, na khume dra timhondro, henhleni ka tinhloko tadroni, afa kulini ntlhanu wa tingiyana na tibiri.

⁴A nkila wadrone wu koka xiyenge xa vuraru xa tinyeleti ta tilo, leti a titxukumeteliki a misaveni; kutani a dragoni dri yima amahlweni ka wansati lweyi afaka adjula kuphuluka, akuva drida a n'wana wakwe loko a pswaliwile.

⁵Kutani a wansati apsala n'wana wa wandrisanyana, lweyi ataka fuma matiko hinkwawu hi nhonga ya nsimbi, kambe a n'wana wakwe atekeliwa ku Xikwembu Nkulukumba ni ku xiluvelo xakwe.

⁶Lweyi wansati a trutrumela huleni, lomu abekiseliwiki mbangu hi Xikwembu Nkulukumba, lomu ataka phameliwa kone ha khume dra madzana na mabiri, na ntlhanu wa makume na drin'we ya masiku (1260).

⁷ Kolahu kuvi ni kulwa le tilweni. Mikayele ni tintrumi takwe valwa ni dragoni, na drone dragoni drilwa ni tintrumi ta drone,

⁸kambe a dragoni ni tintrumi takwe vahluliwa, ni mbangu wavu wungaha kumeki a Matilweni.

⁹Kutani kakutxukumetiwa a dragoni ledrikulu, a nyoka leyi ya khale, leyi vitaniwaka Diyavulosi na Sathana, lweyi a kanganyisaka misava hinkwayu. Yene ni tintrumi takwe vatxukumeteliwi misaveni.

¹⁰Kutani ni yingela ritu ledrikulu atilweni, afaka driku: Swoswi kutlhasi huluku, ni ntamu, ni Mfumu wa Xikwembu Nkulukumba weru! Ni ntamu wa Kriste wakwe! Hikusa murambeli wa vamakweru, atxukumetiwile lweyi afaka avarambela mahlweni ka Xikwembu Nkulukumba nhlikanhi ni vusiku,

¹¹Kutani vone vamuhlulile hi ngati ya Hambana, ni vumboni bya ritu dravu avayalanga kunyiketa vutomi byavu kuyatlhasa kufeni.

¹²Hileswo-ke trhavani matilo, na n'wine n'wiyakiki kone! Kambe yowee ku lava vayakiki misaveni ni le likhulwini, hikusa Diyavulosi axikeli ku n'wine na tali hi mahlundru lawa makulu, hi kutiva leswaku a nkama lowu anga nawu i wutrongo.

¹³Loko a dragoni drivona leswaku dritxukumeteliwi misaveni, drisungula kuxanisa wansati lweyi angapsala n'wana wa wandrisanyana.

¹⁴ Kambe a wansati anyikiwa timpapa tibiri ta gama ledrikulu, akuva ahahela a huleni, lomu ataka phameliwa kone hi nkama, ni minkama, ni hafu ya nkama, a kule na angavonani ni nyoka.

¹⁵A nyoka yinkampfula mati anon'wini wa yone, swanga nambu, antrhaku ka wansati, akuva atekeliwa ku wone.

¹⁶Kambe misava mimupfunile lweyi wansati; a misava miyahlamula nomu wa yone, mimita nambu lowu a dragoni driwu nkampfuliki non'wini.

¹⁷Kutani dragoni drihlundrukela wansati, drisuka driya lwa ni lava vasaliki va lixaka drakwe lava vabekisaka swileleto swa Xikwembu Nkulukumba, ni lava vangani vumboni bya Kriste Yesu.

¹⁸Kutani driya yima asaveni dra likhulu.