Read ronga Mpf 22 Bible Online

Mpf 22 - ronga bible

Mpf 22

¹Kutani yini kombi nfula wa mati ya vutomi, lowu vangamaka swanga hi xivonivoni, na wu huma xiluvelweni xa Xikwembu Nkulukumba ni xa Hambana.

² A makari ka huvo ya muti, hi tlhelo dra mfula hala ni hala, kuni nsinya wa vutomi, lowu wu humexaka mihandru ya khume na mibiri hi lembe, na wu humexa mihandru hweti ni hweti. A matluka ya nsinya ma tiriseliwa muri wa kuholisa vhanu hinkwavu.

³Kungahativa ni kurukiwa ni kan'we ku wone, Kutani kone Kutava ni xiluvelo xa Xikwembu Nkulukumba ni xa Hambana, kutani a malandra yake matamutirela.

⁴Matavona vuso byake, ni le mimombyeni yavu kuni vito drakwe.

⁵ Kolahu kungahativa ni vusiku, nambi kuva ni kuvilela kuvaninga ka motre, nambi kuvaninga ka Dambu. Hikusa Hosi Xikwembu Nkulukumba atavaninga henhleni kwavu, kutani vata fuma hi madzana ni madzana ya malembe.

⁶Ntrhaku yitlhela yiku ku mine: Lawa maritu madumbekile i ya xihlayelamfuri, a Xikwembu Nkulukumba wa mimoya ya vaprofeta, arumeli ntrumi yake akuva yikomba lava vayitirelaka leswi fanelaka kuhumelela swoswi.

⁷Yesu aku: vonani nata swoswi anihlweli! Kukatekile lavabekisaka maritu ya vuprofeta bya buku ledri.

⁸Hi mine Yohana ningayingela ni vona mintxhumu leyi hinkwayu. Ntrhaku kakuva niswiyingelile ni kuswivona, ni wi minengeni ya ntrumi leyi yini kombiki a mitxhumu leyi akuva ni yigandrela.

⁹Kambe yone yiku ku mine: Ungayentxi, leswo! Hikusa na mine ni le ntirweni wa Xikwembu Nkulukumba swanga ha wene, ni swanga hi vamakwenu, a vaprofeta, ni hinkwavu lava vabekisaka maritu ya buku ledri. Gandrela Xikwembu Nkulukumba.

¹⁰Ntrhaku atlhela aku: Ungafunge maritu ya vuprofeta bya buku ledri, hikusa nkama wukusuhi.

¹¹ Lweyi wa kukala kululama, aatami ahamba hi kusomboloka, a mudohi aatami ava lweyi wakudoha. Lweyi wa kululama, atami ayentxa kululama ni lweyi wa kuhlawuleka aatami a tihlawulekisa.

¹²Vonani! Nata naningahlweli, nita ni hakelo, akuva ni nyika mun'wana-ni-mun'wana swanga hi mintiro yake.

¹³Hi mine Alfa na Omega, lweyi wa kuranga ni wa vugamu, a masungulo ni kuhela.

¹⁴ Kukatekile lava vabasisaka swiyambalu swavu angatini ya Hambana, hikuva xileswi vava ni mfanelo ya kuda mihandru ya nsinya wa vutomi, nhingenani mutini hi swipfalu.

¹⁵Kambe a handle kutrhama timbyana, ni vangoma, ni va vumbuye, ni vadlayi, ni lava vagandrelaka swifaniso ni hinkwavu lava varandraka kuyentxa madrimi hi maritu ni mintiro.

¹⁶Mine Yesu, ni rumi ntrumi yanga ya ta n'wibyela hinkwaswu leswi a makerekeni. Hi mine mutru ni lixaka dra Davida, a nyeleti ya kuphatima ya mixo.

¹⁷ A Moya ni Mutekiwa vaku: Tana! Ni lweyi a swiyingelaka, leswi aku: Tana! Ni lweyi anganitora, a atrhindrekele. Lweyi aswirandraka ayamukeli mati ya vutomi hi timpswalu.

¹⁸Mine, ni hlaya ku hinkwavu lava yingelaka maritu ya vuprofeta bya buku ledri leswaku: Loko mhunu a yengesela ntxhumu wa kukari, Xikwembu Nkulukumba atamuyengesela makhombo lawa matraliwiki abukwini ledri;

¹⁹ ni loko mhunu asusa drin'we dra maritu ya vuprofeta bya buku ledri, Xikwembu Nkulukumba atasusa yavelo drakwe a nsinyeni wa vutomi, ni le mutini wa Kuxwenga, ni leswi switraliwiki bukwini ledri.

²⁰Lweyi anga mboni ya mintxhumu leyi hinkwayu ali: Ahina! Nata ningahlweli! Amen! Tana, Hosi Yesu!

²¹A timpswalu ta Hosi yeru Yesu Kriste ative na n'wine hinkwenu. Amen!