Read ronga Mpf 4 Bible Online

Mpf 4 - ronga bible

Mpf 4

¹Antrhaku ka leswo, nilavisile, kutani nivona a xipfalu xipfuliwiki atilweni, ni ritu ledri afaka nidriyingeli hi kuranga na drivulavula na mine, dra kufana ni dra nanga driku: Ntlhantukela halenu, nitakukomba leswi switakahumelela ntrhaku ka leswi.

²Hi nomu-lo nikumeka na nili moyeni, kutani vonani, a xitrhamu xa vuhosi xibekiwiki Tilweni, kutani axitrhan'wini lexo afa kutrhami mun'we,

³lweyi afanaka hi mavonekela, ni ribye dra yaspa ni dra sardoni, ni nkwangulatilo wutrandreliki a xitrhamu lexo, wuvonekaka kufana ni ribye dritxhuliwaka esmeralda.

⁴Amatlhelweni ya xitrhamu lexo afa kuni makume mabiri na mune wa switrhamu swa vuhosi, na kutrhami ku swone makume mabiri na mune wa vakulu-va-vhanu vayambaliki swiyambalu swa ntlhohe, na vani tingiyana ta gole atinhlokweni.

⁵Axitrhan'wini-xa-vufumi kuhuma kuhatima, ni maritu, ni kudruma kukulu; amahlweni ka xitrhamu xa vuhosi afa kuni ntlhanu na mibiri wa mimotre, leyi mipfuraka, minga mimoya ya ntlhanu na mibiri ya Xikwembu Nkulukumba.

⁶Nakone, amahlweni ka xitrhamu xa vuhosi afa kuni likhulu dra vidru dra kufana ni kristal. A makari ni le matlhelweni ka xitrhamu xa vuhosi afa kuni mune wa swivumbiwa swakuhanya switali hi matihlu, amahlweni ni le ntrhaku.

⁷A xivumbiwa xa kusungula afa xifana ni nghonyama, a xa vubiri afa xifana ni role, a xa vuraru afa xini vuso bya kufana ni bya mhunu; a xa vumune afa xifana ni gama loko drihaha.

⁸Mfuri a swivumbiwa leswi swa mune, xin'wana-ni-xin'wana, afa xini ntlhanu na drin'we wa timpapa; na switali hi mahlu amatlhelweni hinkwawu ni le ndreni, na swingawisi akuhlaya, nhlikanhi ni vusiku swiku: Wa kuxwenga, wa kuxwenga, wa kuxwenga, hi Hosi, Xikwembu Nkulukumba wa ntamu hinkwawu; lweyi afaka ali kone, lweyi anga kone, ni lweyi atakata!

⁹Loko a swivumbiwa leswo switanyika lidrumu, ni xihluwa, ni kukhensa ku lweyi atrhamiki axitrhan'wini-xa-vufumi, lweyi ahanyaka hi malembe ni malembe,

¹⁰a vakulu-va-vhanu lava va makume mabiri na mune vatawa amahlweni ka lweyi atrhamiki axitrhan'wini-xa-vufumi, vagandrela lweyi ahanyaka hi madzana-ni-madzana ya malembe, vatxukumetela tingiyana tavu amahlweni ka xitrhamu xa vuhosi, na vaku:

¹¹Uni mfanelo, we Hosi ni Xikwembu Nkulukumba weru, ya kuyamukela a lidrumu, ni xihluwa, na ntamu, hikusa utumbuluxi mintxhumu hinkwayu, hikola ka kurandra kwaku, minga kone, mfuri mivumbiwiki.