Read ronga Mpf 5 Bible Online

Mpf 5 - ronga bible

Mpf 5

¹Kutani nivoni a buku afaka dritraliwi andreni ni le handle, na drifungiwi hi ntlhanu na swibiri wa swifungu, drili vokweni dra xinene dra lweyi afaka atrhami axitrhan'wini-xa-vufumi.

²Nivona ni ntrumi ya ntamu afaka yihuwelela hi ritu ledri kulu yiku: Hi mani lweyi afanekeliwaka hi kupfula a buku ni kuntrhunxa a swifungu swa drone?

³Kambe afa kungena mhunu atilweni, ni le misaveni, ni le hansi ka misava, lweyi afaka aswikota a kupfula buku nambi kudrilavisa;

⁴kutani mine afa nidrila ngopfu hikusa aku kumiwanga mhunu lweyi afaneliwaka hi kupfula buku, nambi kudrilavisa.

⁵Kutani mun'we ku vakulu-va-vhanu aku ku mine: Ungadrile; lavisa, a nghonyama ya lixaka dra Yuda, a mutru wa Davida, yihlulile akuva yipfula a buku ni swifungu leswi swa ntlhanu na swibiri.

⁶Kutani-ke, amakari ka xitrhamu xa vuhosi ni mune wa swivumbiwa leswi swihanyaka, ni le makari ka vakulu-va-vhanu, nivona a Hambana yiyimiki swanga yifile, na yini ntlhanu na tibiri wa timhondro, ni ntlhanu na mabiri wa matihlu, lawa anga ntlhanu na mibiri wa mimoya ya Xikwembu Nkulukumba, leyi mirumiwiki amisaveni hinkwayu.

⁷A Hambana yita, yiteka a buku avokweni dra xinene dra lwa trhamiki axitrhan'wini-xa-vufumi,

⁸loko yiteki a buku, a swivumbiwa leswi swa mune, ni vakulu-va-vhanu va makume mabiri na mune (24), va khisami amahlweni ka Hambana, na mun'wana-ni-mun'wana ali ni xitende ni makopo ya kuhambiwa hi gole, mataliki hi muri wa kunun'hwela, anga swikhongoto swa vahlawuleki,

⁹na kone afa vayimbelela lisimu drimpswha, vaku: Uni mfanelo ya kuyamukela buku ni kupfula a swifungu swa drone, hikusa udlayiwile uva uxavela Xikwembu Nkulukumba hi ngati yaku, a vhanu, va tinxaka hinkwatu, ni tindrimi hinkwatu ni va-Matiko hinkwawu;

¹⁰mfuri uvahambi mfumu wa vaprista na uhambela Xikwembu Nkulukumba weru, kutani vone vatafuma amisaveni.

¹¹Kutani nivoni niva niyingela a ritu dra tintrumi tinyingi amatlhelweni ya xitrhamu-xa-vufumi, ni swivumbiwa swakuhanya, ni vakulu-va-vhanu; a nhlayu ya tone afa wuli wa madzana-dzana ya madzana-dzana, ni makume ya madzana,

¹²na tihlaya hi ritu ledrikulu tiku: A Hambana leyi yingadlayiwa yini mfanelo ya kuyamukela ntamu, ni vukosi, ni vutlhari, ni ntamu, ni xihluwa, ni lidrumu, ni kukhensiwa.

¹³Kutani niyingela a swivumbiwa hinkwaswu swa le tilweni, ni swa le misaveni, ni swa le hansi ka misava, ni leswi swinga likhulwini, na swiku: Ku lweyi atrhamiki axitrhan'wini-xa-vufumi ni ku Hambana, Lidrumu, xihluwa, kukhensa ni ntamu kukhensiwa, ni xihluwa, ni lidrumu, ni ntamu, hi madzana-ni-madzana ya malembe!

¹⁴A swivumbiwa swakuhanya leswi swa mune afa swiku: Amen! A vakulu-va-vhanu vone afa vawa, vagandrela.