Read ronga Mpf 7 Bible Online

Mpf 7 - ronga bible

Mpf 7

¹Ntrhaku ka leswo, nivoni mune wa tintrumi tiyimi ku mune wa makhona ya misava, na titameli mune wa timheho ta misava, akuva ni yin'we meho yingahungeli misaveni, nambi likhulwini, nambi minsinyeni.

²Nivoni yin'wana ntrumi afaka yitlhantuka hi lomu kuhumaka a dambu, na yini xifungu xa Xikwembu Nkulukumba lweyi ahanyaka, kutani yibandlukana hi ritu ledrikulu ku mune wa tintrumi leti tinyikiwiki a ntamu wa kuhona misava ni likhulu,

³yiku: Minga honeni misava, nambi likhulu, nambi minsinya, kukota hifunga a malandra ya Xikwembu Nkulukumba weru amimombyeni yavu.

⁴Kolahu, niyingela a nhlayu ya lava vakufungiwa: Afa vali khume dra madzana ya madzana, ni mune wa madzana ya madzana, na mune wa makume ya madzana (144.000), va tinxaka hinkwatu ta Israyele.

⁵Ku lixaka dra Yuda, afa ali dzana dra madzana, na makume mabiri ya madzana (12.000), ya va kufungiwa; ku lixaka dra Rubeni, dzana dra madzana, na makume mabiri ya madzana (12.000); ku lixaka dra Gadi, dzana dra madzana, na makume mabiri ya madzana (12.000);

⁶ku lixaka dra Aseri, dzana dra madzana, na makume mabiri ya madzana (12.000); ku lixaka dra Nafitali, dzana dra madzana, na makume mabiri ya madzana (12.000); ku lixaka dra Manase, dzana dra madzana, na makume mabiri ya madzana (12.000);

⁷ku lixaka dra Simiyoni, dzana dra madzana, na makume mabiri ya madzana (12.000); ku lixaka dra Levi, dzana dra madzana, na makume mabiri ya madzana (12.000); ku lixaka dra Isakari, dzana dra madzana, na makume mabiri ya madzana (12.000);

⁸ku lixaka dra Zabuloni, dzana dra madzana, na makume mabiri ya madzana (12.000); ku lixaka dra Yosefa, dzana dra madzana, na makume mabiri ya madzana (12.000); ku lixaka dra Benyamini, dzana dra madzana, na makume mabiri ya madzana (12.000) ya va kufungiwa.

⁹Ntrhaku ka leswo, nivoni ntalu wukulu wa vhanu, lowu afaka kungali na lweyi angakotaka kuhlaya a ntrengo wa wone, vapfaka hi le ku matiko hinkwawu, tinxaka ni tindrimi hinkwatu. Vayimi mahlweni ka xitrhamu-xa-vufumi ni le mahlweni ka Hambana, na vayambali swiyambalu swa ntlhohe, na vani minkindru amavokweni yavu,

¹⁰na vabandlukana hi ritu ledrikulu, vaku: A huluxo i dra Xikwembu Nkulukumba weru, lweyi atrhamiki axitrhan'wini-xa-vufumi, ni dra Hambana.

¹¹A tintrumi hinkwatu afa tiyimi titrandrela a xitrhamu-xa-vufumi, ni vakulu-va-vhanu, ni mune wa swivumbiwa swakuhanya, kutani tiwa hi mimombo amahlweni ka xitrhamu-xa-vufumi, tigandrela Xikwembu Nkulukumba,

¹²na tiku: Amen! Akukhensa, ni lidrumu, ni vutlhari, ni kutlangela, ni xihluwa, ni vufumi, ni ntamu, swilumba Xikwembu Nkulukumba weru hi madzana-ni-madzana ya malembe! Amen.

¹³Kutani mun'we ku vakulu-va-vhanu ayangula, aku ku mine: Lava vayambaliki swiyambalu swa ntlhohe xana i vamani, vapfa kwini, xana?

¹⁴Kutani mine niku ku yene: Hosi yanga, hi wene uswitivaka! Kutani yene aku ku mine: Lava, hi lava vapfaka hi le nhlomulweni lowukulu, vahlampswiki a swiyambalu swavu, vaswiyentxa swa ntlhohe angatini ya Hambana.

¹⁵Hi swoleswo vayimiki amahlweni ka xitrhamu-xa-vufumi xa Xikwembu Nkulukumba, na vamutirela nhlikanhi ni vusiku aTempeleni drakwe; mfuri lweyi atrhamiki axitrhan'wini-xa-vufumi, atanalavutela a tende drakwe a henhla kwavu.

¹⁶Vangaka vangahatwi ndlala, nambi tora. A dambu dringahavaweli, nambi hi mumu wa drone,

¹⁷hikusa a Hambana, leyi yinga xitrhan'wini-xa-vuhosi, yitavabyisa, yivayisa atinhlobyeni ta mati ya vutomi, kutani Xikwembu Nkulukumbata atasula minyembeti hinkwayu amahlweni yavu.