Read ronga Mpf 9 Bible Online

Mpf 9 - ronga bible

Mpf 9

¹A ntrumi ya vuntlhanu yiyimbi a nanga; kutani nivona a nyeleti yipfiki hi le tilweni, yiwela amisaveni, yinyikiwa a mpfungulu wa khele dra kuyeta,

²kutani a nyeleti yipfula a khele ledri dra kuyeta, kuhuma a musi waku ingi i musi wa xidridri xikulu, kutani a dambu ni moya swimphuma hinkonta ya musi lowu wuhumiki akheleni.

³Amusini kuhuma humbi yita amisaveni, kutani a humbi yinyikiwa a ntamu lowu ingiki hi ntamu wa mibalana ya misava.

⁴Kutani a humbi yileletiwa leswaku yingahoni a byanyi bya misava, nambi ntxhumu wun'wana wa lihlaza, nambi minsinya; kambe ntsena a vhanu lava vangaliki na xone a xifungu xa Xikwembu Nkulukumba amimombyeni yavu.

⁵Na swone a humbi yinyikiwa leswaku yingavadlayi, kambe kuvaxanisa ntsena hi ntlhanu wa tihweti. A kuvaxanisa koloko, kufana ni kuxanisa ka mubalana loko wuluma mhunu.

⁶Mfuri amasikwini wolawo a vhanu vatadjula a lifu, kambe vangadrikume; vatanavela a kufa, kambe a lifu dritavatrutruma.

⁷A xivumbeko xa humbi leyo afa xifana ni mahanxi lawa mabekiseliwiki kulwa; atinhlokweni ta yone afa kuni leswi ingiki i tingiyana ta gole, a vuso bya yone byifana ni vuso bya vhanu;

⁸mfuri a humbi leyo afa yini misisi ya kufana ni misisi ya vavasati, ni matinyo ya yone mafana ni ya tinghonyama.

⁹A humbi afa yini switlhangu leswi ingiki i switlhangu swa tinsimbi, a pongwe dra timpapa ta yone afa drifana ni pongwe dra makalitxhi ya mahanxi manyingi lawa matrutrumelaka kulweni;

¹⁰afa yini minkila leyi mifanaka ni ya mibalana ni mintrhombo; a minkileni afa yini ntamu wa kuxanisa vhanu hi ntlhanu wa tihweti,

¹¹mfuri afa yirangeliwa hi mufumi wa yone, lweyi yinga ntrumi ya khele dra kuyeta dringagami, a vito dra yone hi Xiheberu i Abadoni, ni hi Xigirika yingani vito draku Apoliyoni.

¹²Kuhundri a xidrilo xa kusungula; vona, kahata swin'wana swibiri, a ntrhaku ka mintxhumu leyi.

¹³A ntrumi ya vuntlhanu na yin'we yiyimbi a nanga; kutani niyingela a ritu ledri drihumaka ku mune wa timhondro ta xiluvelo xa gole, lexi xinga mahlweni ka Xikwembu Nkulukumba,

¹⁴na dribyela a ntrumi ya vuntlhanu na yin'we, leyi yingani nanga: Ntrhunxa a mune wa tintrumi leti tikulekiwiki kusuhi ni nambu wukulu wa Eufrate.

¹⁵Kutani kuntrhunxiwa a tintrumi leti ta mune, afaka tibekiseliwi hora, ni siku, ni hweti, ni lembe, akuva tidlaya xiyenge xa vuraru xa vhanu.

¹⁶A nhlayu ya makhandra ya lava valwaka na vakhandriyi mahanxi afa mali madzana mabiri ya madzana ya madzana (200.000.000), kutani niyingela a nhlayu yavu.

¹⁷Xileswo, axivonisweni lexo, nivoni a mahanxi ni vakhandriyi va wone na vani switlhangu swa ndrilo, ni swa yasinta, ni xivavula (enxofre); a tinhloko ta mahanxi afa tifana ni tinhloko ta tinghonyama, amilon'wini ya tone afa kuhuma ndrilo, ni musi, ni xivavula.

¹⁸Hikola ka makhombo lawa mararu: ndrilo, ni musi, ni xivavula, afaka swihuma amilon'wini ya mahanxi, kudlayiwi a xiyenge xa vuraru xa vhanu,

¹⁹hikusa a ntamu wa mahanxi afa wuli milon'wini ya wone, ni le minkileni ya wone, hikuva a minkila ya wone afa mifana ni tinyoka, mini tinhloko leti afaka tivavisana.

²⁰Kambe a vhanu lava vasaliki, lava vangadlayiwangakiki hi makhombo wolawo, avandrulukanga amintirweni ya mavoko yavu; akuva vangahagandreli a mademoni, ni swikwembu swavu swakuka-ndlela swa gole, ni swa silivhela, ni swa nsuku, ni swa maribye, ni swa mintrandra, leswi swingavoniki, swingayingeliki, mfuri swingafambiki;

²¹na kone avandrulukanga amintirweni yavu ya vudlayi, ni ya vuloyi, ni ya vumbuye, ni ya kuyiva.