Read Runyoro - rutooro Kub 1 Bible Online

Kub 1 - Runyoro - rutooro bible

Kub 1

¹Okubanza Ruhanga akahanga iguru n'ensi.

²Ensi Ruhanga akaba atakagihaire mulingo kandi etarumu kantu, enyanja ekaba eswekeriirwe omwirima; Mwoyo wa Ruhanga yarabaga ha maizi eruguru.

³Ruhanga akagamba ati: “Habeho okuhweza”; okuhweza kwabaho.

⁴Yarora nkooku kuli kurungi; yabaganiza okuhweza n'omwirima.

⁵Okuhweza yakweta nyamusana kandi omwirima yagweta kiro. Obwire bwaira kandi bwakya kyaba kiro ky'okubanza.

⁶Ruhanga akagamba ati: “Habeho omwanya gubaganize habiri amaizi.”

⁷Ruhanga yahanga omwanya kandi yabaganiza amaizi agakaba gali hansi y'omwanya ogu, yagaiha ha maizi agakaba gali eruguru yagwo, kandi nukwo kyabaire.

⁸Omwanya ogu Ruhanga yagweta iguru. Obwire bwaira kandi bwakya, kyaba kiro kya kabiri.

⁹Ruhanga akagamba ati: “Amaizi agali hansi y'iguru gasorrokanire omu kiikaro kimu, obwerre buzooke.” Kandi nukwo kyabaire.

¹⁰Obwerre Ruhanga yabweta ensi kandi amaizi agaasoorrokaine hamu yageeta nyanja, yarora eki nkooku kiri kirungi.

¹¹Ruhanga yagamba ati: “Ensi emere ebimera ebinyakwana ensigo n'emiti enyakwana ebijuma ebinyakurumu ensigo, buli kintu omu mulingo gwakyo nkooku kiri.” Kandi nukwo kyabaire.

¹²Ensi yayaruka ebimera ebinyakwina ensigo omu mulingo gwabyo, n'emiti erukwana ebijuma ebinyakurumu ensigo, buli gumu omu mulingo gwagwo nkooku guli. Ruhanga yarora ebi nkooku biri birungi.

¹³Bwaira kandi bwakya kyaba kiro kya kasatu.

¹⁴Ruhanga yagamba ati: “Habeho ebijwa omu mwanya gw'iguru, bibaganize nyamusana n'ekiro; bimanyiseege abantu obusumi, ebiro n'emyaka,

¹⁵bijwerege omu mwanya gw'iguru bimulikire ensi.” Kandi nukwo kyabaire.

¹⁶Ruhanga yahanga ebijwa ebikooto bibiri, ekirukukiraho obukooto, kijwege nyamusana, kandi ekitoito kijwege ekiro; kandi, yakora n'enyunyuuzi.

¹⁷Ebijwa ebi Ruhanga yabita omu mwanya gw'iguru bimulikire ensi;

¹⁸bijwege nyamusana n'ekiro, bibaganize ekyererezi n'omwirima. Ruhanga yarora eki nkooku kiri kirungi.

¹⁹Bwaira kandi bwakya kyaba kiro kya kana.

²⁰Ruhanga akagamba ati: “Amaizi gazaale empura y'ebihangwa ebyomeezi, kandi ebinyonyi bihurruuke haiguru y'ensi birabanganemu omu mwanya gw'iguru.”

²¹Aho Ruhanga yahanga ebisoro ebikooto eby'omunyanja n'ebihangwa byona ebyomeezi ebiijwire omu maizi, buli kimu omu mulingo gwakyo, n'ebinyonyi byona ebinyakunyina amapapa buli kimu omu mulingo gwakyo, yarora eki nkooku kiri kirungi.

²²Habweki yabiha omugisa naagamba ati: “Muzaale, mukanye, mwijuze amaizi aganyakuli omu nyanja, kandi ebinyonyi bikanye.”

²³Bwaira kandi bwakya kyaba kiro kya kataano.

²⁴Ruhanga akagamba ati: “Ensi ezaale ebihangwa ebyomeezi omu mulingo gwabyo: ente, ebintu ebinyakwekurra n'enyamaiswa ez'omunsi omu mulingo gwazo.” Kandi nukwo kyabaire.

²⁵Kandi Ruhanga yahanga enyamaiswa ez'omunsi omu mulingo gwazo, ente omu mulingo gwazo, nabuli kintu kyona ekinyakwekurra haitaka omu mulingo gwakyo.

²⁶Nubwo Ruhanga yagamba ati: “Tukole omuntu ow'ekisisani kyaitu, owarukutusisana; alemege encu ez'omu nyanja n'ebinyonyi eby'omu mwanya, ente n'enyamaiswa zoona ez'omu kisaka, ensi yoona n'ebyekurra byona ebinyakwekururra haitaka.”

²⁷Ruhanga nukwo yahangire ati omuntu ow'ekisisani kye; akamuhanga omu kisisani kye ky'onyini; omusaija n'omukazi.

²⁸Ruhanga yabaha omugisa naagamba ati: “Muzaale mukanye, mwijuze ensi mugireme; muleme encu ez'omu nyanja, ebinyonyi eby'omu mwanya, n'ebyomeezi byona ebinyakuli omunsi.”

²⁹Ruhanga yagamba ati: “Dara, mbahaire ebimera byona ebinyakuli omunsi ebinyakwana ensigo, n'emiti yoona enyakwana ebijuma ebinyakunyina enjuma, ebi byona mubiryege.

³⁰Ebisoro byona eby'omunsi; ebinyonyi byona eby'omu mwanya, byona ebinyakwekururra ha itaka, na byona ebyomeezi, mbihaire ebimera byona ebibisi, nibyo biryeege.” Kandi nukwo kyabaire.

³¹Ruhanga yarora byona ebi yakozire nkooku biri birungi, kandi birungikwo mali. Bwaira kandi bwakya kyaba kiro kya mukaaga.