Read Runyoro - rutooro Kub 11 Bible Online

Kub 11 - Runyoro - rutooro bible

Kub 11

¹Omu biro ebi, ensi yoona yabazaaga engambo emu, enyakurumu ebigambo bike.

²Abantu obu baafurukiire Buturukaizooba, baasanga ekyeya ekinyakuli omunsi ya Sinali.

³Baagambirangana bati: “Tubumbe amatafaali tugokye kurungi.” Baakoza amatafaali omu kiikaro ky'amabaale, n'orweju omu kiikaro ky'obudongo.

⁴Hanyuma, baagamba bati: “Tweyombekere orubuga orunyakwina omunaara ogurukuhika omwiguru, nukwo turanganwe, tutaikara kurarangibwa tukagya hara.”

⁵Nubwo, MUKAMA yasirimuka, yaija kurora orubuga n'omunaara ogwayombekerwe abaana b'abantu.

⁶MUKAMA yagamba ati: “Murole, abantu banu, bantu bamu, kandi boona, nibabaza engambo emu, kandi kinu nikyo kinu eky'okubanza ha bintu ebi barukwija kukora, kandi busaho eki baraateekereza kukora kikabalema.

⁷Mwije tusirimuke, tutabatabule engambo yaabo, baleke kwetegerezangana.”

⁸Aho, MUKAMA yabaiha omu kiikaro eki, yabararangya omunsi yoona, baalekera aho kwombeka orubuga.

⁹Nikyo orubuga oru, rwayetiirwe ibara Bbabbeeri, habwokuba aho, nuho MUKAMA yatabatabuliire engambo eyabazibwaga omunsi yoona, kuruga aho Ruhanga yabararangya omunsi yoona.

¹⁰Ganu nugo mabara g'abaijukuru ba Seemu. Seemu obu yahikize emyaka kikumi ey'obukuru, yazaara Aripakisaadi, obu hakaba hahingwireho emyaka ebiri, okusandaara kw'amaizi kuhoire omunsi;

¹¹Seemu obu yamazire kuzaara Aripakisaadi, akongera yayomeera emyaka endi bikumi bitaano, yazaara abaana abandi aboojo n'abaisiki.

¹²Aripakisaadi obu yahikize emyaka asatu n'etaano, yazaara Seera,

¹³Aripakisaadi obu yamazire kuzaara Seera, akongera yayomeera emyaka endi bikumi bbina n'esatu, yazaara abaana abandi aboojo n'abaisiki.

¹⁴Seera obu yahikize emyaka asatu, yazaara Ebberi,

¹⁵Seera obu yamazire kuzaara Ebberi, akongera yayomeera emyaka endi bikumi bbina n'esatu, yazaara abaana abandi, aboojo n'abaisiki.

¹⁶Ebberi obu yahikize emyaka asatu n'ena, yazaara Peregi,

¹⁷Ebberi obu yamazire kuzaara Peregi, akongera yayomeera emyaka endi bikumi bbina n'asatu, yazaara abaana bandi aboojo n'abaisiki.

¹⁸Peregi obu yahikize emyaka asatu, yazaara Lehu,

¹⁹Peregi obu yamazire kuzaara Lehu, akongera yayomeera emyaka endi bikumi bibiri na mwenda yazaara abaana abandi aboojo n'abaisiki.

²⁰Lehu obu yahikize emyaka asatu n'ebiri, yazaara Serugi,

²¹Lehu obu yamazire kuzaara Serugi, akongera yayomeera emyaka endi bikumi bibiri na musanju, yazaara abaana abandi aboojo n'abaisiki.

²²Serugi obu yahikize emyaka asatu, yazaara Nahora,

²³Serugi obuyamazire kuzaara Nahora, akongera yayomeera emyaka endi bikumi bibiri, yazaara abaana abandi aboojo n'abaisiki.

²⁴Nahora obu yahikize emyaka abiri na mwenda, yazaara Teera,

²⁵Nahora obu yamazire kuzaara Teera, akongera yayomeera emyaka endi kikumi mu ikumi na mwenda, yazaara abaana abandi aboojo n'abaisiki.

²⁶Teera obu yahikize emyaka nsanju, yazaara Abburamu, Nahora na Harani.

²⁷Ganu nugo mabara g'abaijukuru ba Teera: Teera akazaara: Abburamu, Nahora na Harani, Harani akazaara Looti

²⁸Haraani akafeera omunsi ei yazaalirwemu, Teera ise, atakafiire.

²⁹Abburamu na Nahora, bakaswera abakazi, ibara erya muka Abburamu nuwe Sarai, kandi erya muka Nahora, nuwe Mirika muhara wa Haraani, ise Mirika na Isika.

³⁰Sarai akaba ali ngumba, atazaire mwana.

³¹Teera yatwara omutabani Abburamu n'omwijukuru Looti, omwana wa Harani, na Sarai mukamwana we, mukazi w'Abburamu, baagenda hamu, baaruga omunsi Uli ey'Abakarudeya, baagenda omunsi eya Kanaani, baitu obu baahikire Harani, nuho baikara.

³²Teera akoomeera emyaka bikumi bibiri n'etaano, yagwa omunsi Harani.