Read Runyoro - rutooro Kub 12 Bible Online

Kub 12 - Runyoro - rutooro bible

Kub 12

¹MUKAMA yagambira Abburamu ati: “Ruga omunsi ey'owanyu, omu bantu ab'oruganda rwawe, omunju ya Sso, ogende omunsi ei ndaakwoleka.

²Ndikwihamu ihanga erikooto, ndikuha omugisa, ibara lyawe ndirifoora ly'ekitiinisa, nukwo ohaiseege abandi omugisa.

³Abo abaraakusabiraga omugisa, ndaabahaga omugisa, kandi ogu araakukyenaga nanyowe ndamukyenaga; amahanga goona ag'ensi niiwe galitungiramu omugisa.”

⁴Aho, Abburamu yagenda, MUKAMA nkooku yamugambiire; kandi yagenda na Looti. Abburamu kuruga Harani, akaba ahikize emyaka nsanju n'etaano ey'obukuru.

⁵Akatwara Sarai mukazi we, na Looti omwana w'owanyina, n'ebintu byabo byona ebi bakaba batungire, n'abantu aba baatungiire omunsi Harani, baimukya baagenda Kanaani,

⁶yairrayo, yahika omu kiikaro Sekemu, nambere hali omuti omusisa ogunyakuli omunsi Moorebi. Omu kasumi ako, Abanyakanaani nubo bakaba bali omunsi egi.

⁷Aho, MUKAMA yabonekera Abburamu yamugambira ati: “Abaijukuru bawe ndibaha ensi enu.” Nahabweki, Abburamu aho yayombekaho itambiro, yalyombekera MUKAMA ayamubonekiire.

⁸Obu yarugire aho, yagenda ha rusozi orunyakuli Burugaizooba bwa Beeteri, yateera eheema ye, Besero emuli Bugwaizooba, kandi Ai emuli Burugaizooba; kandi oku naho, akombekerayo MUKAMA itambiro, ramya MUKAMA.

⁹Abburamu yayongera orugendo rwe, akwasire omuhanda ogurukugenda Negebu.[1]

¹⁰Omu kasumi ako, kiihe ekaba egwire omunsi, Abburamu yafuruka, yagenda kwikara Misiri, habwokuba kiihe ekaba ehinguraine.

¹¹Obu akaba ali haihi kutaaha Misiri, yagambira Sarai mukazi we ati: “Mmanyire nkooku oli mukazi enyamibwa,

¹²Abanyamisiri obu baraakurora, nibaija kugamba bati: ‘Onu mukazi we,’ ekiraarugamu nukwo kunyita, baitu iwe baraakuleka oyomeere.

¹³Iwe ogambe oti: ‘Ogu munyanya nyowe,’ nukwo nyowe nkire.”

¹⁴Abburamu obu yahikire Misiri, Abanyamisiri baarora mukazi we nkooku ali murungi muno.

¹⁵Kandi abanyoro ba Faraaho nabo bamumutendera. Baamutwara omu kikaali kya Faraaho.

¹⁶Faraaho akakora kurungi Abburamu, habw'omukazi ogu; yamuha entaama, ente, enkaina, engamiya abairu, n'abazaana.

¹⁷Baitu, MUKAMA akabonesa Faraaho n'eka ye emihito etarukugambwa habwa Sarai muka Abburamu.

¹⁸Aho, Faraaho yayeta Abburamu yamukaguza ati: “Kinu kiki eki wankozire? Habwaki otarangambiire omukazi ogu nkooku ali mukazi wawe?

¹⁹Kiki ekyakugambisize oti: ‘Ogu munyanya-nyowe?’ Eki nikyo kyamunswize. Hati nu, mukazi wawe ngugwo, mutwale ogende.”

²⁰Faraaho yakwasa Abburamu abasaija baamusendekereza, hamu na mukazi we, n'ebintu byaabo, baamuhikya ha mutaano.