Read Runyoro - rutooro Kub 13 Bible Online

Kub 13 - Runyoro - rutooro bible

Kub 13

¹Aho Abburamu yaruga Misiri, uwe na mukazi we na byona ebi akaba ayinabyo, na Looti yagenda na uwe, bahika Negebu.

²Abburamu akaba atungire ente, efeeza, na zaabbu bingi muno.

³Yaruga Negebu yayongera orugendo rwe, yahika Beseri, omunsi Ai.

⁴Omu kiikaro ha yabandize kwombeka itambiro, kandi nuho yayesengereriize MUKAMA.

⁵Looti ogu ayagenzire n'Abburamu, na uwe akaba anyina amagana ag'entaama n'embuzi, n'amahyo g'ente, n'eheema nyingi.

⁶Nahabweki, ensi ekaba etarukubamara bombi kwikara hamu; habwokuba amatungo gaabo, gakaba gali maingi muno, batarukusobora kwikara hamu.

⁷Kandi abaliisa ab'ente ez'Abburamu n'ab'eza Looti, baikaraga n'empaka. Omu kasumi ako, Abanyakanaani n'Abaperezi nubo bakaba bali omunsi egi.

⁸Abburamu nukwo kugamba Looti ati: “Tikiri kirungi nyowe na iwe kwikara n'empaka, kandi tikiri kirungi abahuma bange n'abawe kwikara n'empaka, kandi kunu tuli b'oruganda rumu.

⁹Ensi yoona enyakukuli omumaiso torukugirora? Twahukane, obu oraagenda ha bumoso, nyowe ndaagenda ha bulyo, rundi iwe obu oraakwata ha bulyo, nyowe ndaakwata ha bumoso.”

¹⁰Looti yaimukya amaiso, yarora ekyeya ekya Yorudaani nkooku kyaitirirwaga kurungi amaizi hoona hoona nkooku kikaba kiri, MUKAMA atakahwerekeriize Sodomu na Gomora, nikisisana orugonjo rwa MUKAMA, nikisisana ensi ya Misiri, kutwara ha bukiizi bwa Zohara,

¹¹Aho Looti yayekomera ekyeya kyona ekya Yorudaani, yakwata ogwa Burugaizooba, nukwo baayahukaine bati.

¹²Abburamu yaikara omunsi Kanaani, kandi Looti yaikara hagati ey'embuga ez'ekyeya, yaihurra eheema ye, yagitwara Sodomu.

¹³Omu kasumi ako abantu aba Sodomu bakaba bali babi, nibasiisira muno MUKAMA.

¹⁴Looti obu yamazire kwahukana n'Abburamu, MUKAMA yagambira Abburamu ati: “Nambere oli aho, naga amaiso orole obukiizi bw'obumoso, obw'obulyo, Burugaizooba na Bugwaizooba;

¹⁵ensi egi yoona ei orukurora, ndigikuha kandi ndigiha abaijukuru bawe, bagiikalemu ebiro byona.

¹⁶Abaijukuru bawe ndibakanyisa baingane ecuucu eya hansi, kakuba omuntu asobora kubara ecuucu eya hansi, buli n'abaijukuru bawe basobora kubabara.

¹⁷Imuka orubate orabemu ensi enu, oyetegereze obura n'obugazi bwayo, habwokuba, ndigikuha.”

¹⁸Aho Abburamu yaihurra eheema ye, yaija yaikara haihi n'emiti emisisa eya Hebburoni, kandi oku, yayombekerayo MUKAMA itambiro.