Read Runyoro - rutooro Kub 14 Bible Online

Kub 14 - Runyoro - rutooro bible

Kub 14

¹Omu bulemi bw'Amurafeeri omukama wa Sinali, Alyoki omukama wa Erasaali, Kedolahomeri omukama wa Eremu, na Tiidali mukama wa Goimi,

²abakama abo, bakarwanisa Beera omukama wa Sodomu, Biirina omukama wa Gomora, Sinabi omukama w'Adama, Semeeberi omukama wa Zeboyimu, n'omukama wa Beera, (niyo Zohali).

³Abakama abo boona abanyakugambirweho enyuma, bakateeraniza amahe gaabo omu kyeya Sidimi, egi niyo nyanja y'ekisura.

⁴Bakaba bamazire emyaka ikumi n'ebiri nibalemwa Kedolahomeri, baitu omu mwaka ogwa ikumi n'esatu, baayema.

⁵Omu mwaka ogwa ikumi n'ena, Kedolahomeri n'abakama abandi abakaba bali na uwe, bakaija baarwanisa Abalefaimu abaikaraga omunsi Save-Kuliyatimu baabasingura,

⁶Abamooli abakaba bali omu kicweka ekya Seiri, okuhika Eriparani h'erukutaanira n'irungu;

⁷Aho baakubuutuka, baahika Enimisipate; (niyo Kadesi) baarwanisa ensi yoona ey'Abamaleki, n'ey'Abamooli, abaikaraga Haazazoni-tamara, baazisingura.

⁸Hanyuma abakama: owa Sodomu, owa Gomora, owa Adama, owa Zeboyimu n'owa Bela, (niyo Zaoli) baaramaga, baatandika kurwanisa

⁹Kedolahomeri omukama wa Eremu, Tidali omukama wa Goimu, Amuraferi omukama wa Sinali, na Aliko omukama wa Erasa, abakama bbana, baarwanisa bataano, omu kyeya ekya Siidimi.

¹⁰Omu kasumi ako, ekyeya ekya Sidimu kikaba kirumu ebiina bingi ebyaihwamuga orweju, abakama: owa Sodomu n'owa Gomora obu bakaba nibairuka n'amahe gaabo, baabigwamu, abamu abaasigaireho, bairuka ha rusozi.

¹¹Abanyanzigwa nukwo kutwara ebintu byona ebya Sodomu na Gomora n'ebyokulya byamwo, baayegendera,

¹²kandi baanyaga Looti mutabani wa mugenzi wa Abburamu, yaikaraga Sodomu, baanyaga n'ebintu bye baagenda.

¹³Omuntu omu ayacwire omu bulemu, akaija yagambira Abburamu Omuhebburaayo ayaikaraga haihi n'emiti emisisa ey'omuntu ibara lye Mamule Omwamoli, mugenzi wa Esikoli wa Aneri, banu bakaba beeteraine na Abburamu.

¹⁴Abburamu obu yahuliire ngu ow'oruganda rwe anyagirwe, yaramaga hamu n'abasaija be abanyakumanyire kurwana, abaazaaliirwe omuka ye, abarukuhika bikumi bisatu mu ikumi na munaana, baahondera abakama bali abbana, yabasanga Daani.

¹⁵Yabaganizaamu ihe rye, yabarwanisa omu bwire bw'ekiro, uwe n'abaheereza be banyaga abamu, abandi baabairukya, baabahikya Hoba, ha bukiizi obw'emoso obw'orubuga Damasiko.

¹⁶Aho yagarra Looti ow'oruganda rwe n'ebintu bye, abakazi n'abantu abakaba banyagirwe.

¹⁷Abburamu obu yagarukire, amazire kusingura Kedolahomeri n'abakama abandi abakaba bali na uwe omukama wa Sodomu yagenda kumwitirana omu kyeya kya Save (nikyo ekyeya eky'omukama)

¹⁸Merikizedeki omukama wa Salemu, yaleeta omugaati n'eviini, Merikizedeki ogu, akaba ali nyakatagara wa Ruhanga Rutakirwa.

¹⁹Akasabira Abburamu omugisa naagamba ati: “Ruhanga Rutakirwa, omuhangi w'iguru n'ensi, ahe Abburamu omugisa.

²⁰Ruhanga Rutakirwa, anyakukusingwize abanyanzigwa bawe akugizibwe!” Abburamu yaha Merikizedeki ekicweka ekya ikumi ekya byona ebi yanyagire

²¹Omukama wa Sodomu yagambira Abburamu ati: “Nyowe mpa abantu, baitu iwe, otwale ebintu.”

²²Baitu Abburamu yagarukamu omukama wa Sodomu ati: “Ndahiire MUKAMA Ruhanga Rutakirwa, omuhangi w'iguru n'ensi,

²³tinsobora kutwara kahuuzo rundi rukoba rw'enkaito, rundi ekintu kyawe ekindi, toikara kugamba oti: ‘Ninyowe natungisize Abburamu.’

²⁴Tintwale kintu na kimu, kyonka ebiraambalirwa, nibyo ebyokulya ebiriirwe abasigazi, n'omugabo ogw'abantu aba nagenzire na bo, nubo: Aneri, Esikoli na Mamuli batwale omugabo gwaabo.”