Read Runyoro - rutooro Kub 15 Bible Online

Kub 15 - Runyoro - rutooro bible

Kub 15

¹Ebi obu byahoire, Ruhanga akeeyoleka Abburamu, naagamba ati: “Abburamu, leka kutiina, ndaakulindaga: empeera yawe eriba nkooto muno.”

²Abburamu yagamba ati: “Ai MUKAMA Ruhanga, olimpa ki? Dora tinkazaaraga mwana, Eryeeza Omudamasiko nuwe aligwetwa omuka yange?

³Nyowe otampe ruzaaro; habweki omwiru ayazairwe omuka yange nuwe aliba mugwetwa wange.”

⁴Aho MUKAMA yamugarukamu ati: “Omusaija ogu taliba mugwetwa wawe; omwana ou oyezaliire wenka nuwe aliba mugwetwa wawe.”

⁵Ruhanga yaturukya Abburamu aheeru, yamugambira ati: “Raramira iguru, obale enyunyuuzi ezi obu oraaba noosobora kuzibara.” Yayongera yamugambira ati: “Abaijukuru baawe nuho balingana obwingi!”

⁶Abburamu yaikiriza ekigambo MUKAMA eki yamugambiire, eki nakyo MUKAMA yakimumanyiraho nkooku ali muhikiriire.

⁷MUKAMA yagambira Abburamu ati: “Ninyowe MUKAMA ayakwihire omunsi Uri ey'Abakalidaaya, nukwo nkuhe ensi enu ogitunge.”

⁸Baitu Abburamu yagamba ati: “Ai MUKAMA Ruhanga, ndaamanya nta nkooku nditunga ensi enu?”

⁹MUKAMA yamugarukamu ati: “Ndeetera enyana enyakuhikize emyaka esatu, ebuguma y'embuzi ey'emyaka esatu, n'empaya y'entaama ey'emyaka esatu, enduka n'eriiba erito.”

¹⁰Abburamu ebi byona yabireetera MUKAMA, yabyasaamu ensinga, buli rusinga yarutembekaniza ha rundi, baitu amaiba atagaaseemu nsinga.

¹¹Amahungu obu gaagwire ha mitumbi egi, Abburamu yagabinga.

¹²Izooba obu likaba nirirenga, Abburamu yagwijagira oturo twingi; omwirima kasira ogurukutiinisa gwamusweka.

¹³Nubwo MUKAMA Ruhanga yamugambira ati: “Manyira kimu, baijukuru bawe nkooku baliba baikazi omunsi etali y'owabu, baliba bairu omunsi egi, balikorwa kubi kumara akasumi ak'emyaka ebikumi bbina;

¹⁴baitu ihanga erinyakubatungire ndirifubira, hanyuma baliruga omunsi egi banyina ebintu bingi.

¹⁵Baitu iwe olifa n'obusinge, okurate baaswenkuru; olifa ogurusire muno.

¹⁶Abaijukuru bawe ab'enyakana baligaruka omunsi enu; habwokuba obubi bw'Abamooli tibukahoire.”

¹⁷Izooba obu likaba limazire kugwa, obwire buteeraine, haazooka ebintu bibiri: oruswa rw'omurro orukaba nirucuukwaho omwika, n'ekimuli ekirukwaka, byaraba hagati y'ensinga ez'ebisoro biri.

¹⁸Ha kiro eki, nubwo MUKAMA yakozire endagaano n'Abburamu naagamba ati: “Ensi enu ndigiha baijukuru bawe, okuruga ha kisaaru kya Misiri okuhika ha kisaaru ekikooto, nikyo ekisaaru Efuraate,

¹⁹ensi ey'Abakeeni, Abakenezi, Abakadenoni,

²⁰Abahiiti, Abaperezi, Abalefaimu,

²¹Abamooli, Abakanaani, Abagirigasi, n'Abayebusi.”