Read Runyoro - rutooro Kub 17 Bible Online

Kub 17 - Runyoro - rutooro bible

Kub 17

¹Abburamu obu akaba ahikize emyaka kyenda na mwenda ey'obukuru, MUKAMA yamubonekera yamugambira ati: “Ninyowe MUKAMA ow'obusobozi bwona, okolege ebi ndukugonza nukwo ohikirre.

²Ninyija kukora endagaano na iwe, kandi ndikanyisa muno oruzaaro rwawe.”

³Aho Abburamu yajuumara; Ruhanga yamugambira ati:

⁴“Hati omanye naragaana na iwe, oliba ise amahanga maingi.

⁵Kuruga hati tokyayongera kwetwa Abburamu, baitu orayetwaga Abburahamu, habwokuba nkufoire ise amahanga maingi,

⁶ndikanyisa muno oruzaaro rwawe, nkwihemu amahanga maingi, kandi olizaara abakama.

⁷Ndigumya endagaano yange ei ndagaine na iwe, kandi ndigigumya n'abaijukuru bawe ebiro byona, ebe ndagaano ey'ebiro n'ebiro, mbe Ruhanga wawe kandi w'abaijukuru bawe.

⁸Ensi enu yoona Kanaani ei orukwikaramu, ndagikuha kandi ndigiha n'abaijukuru bawe ebe nsi yanyu ey'ebiro n'ebiro, kandi na nyowe ndaabaga Ruhanga wanyu.”

⁹Ruhanga yagambira Abburahamu ati: “Kyonka iwe olindege endagaano kandi na baijukuru bawe bagirindege ebiro byabo byona;

¹⁰Enu niyo ndagaano yange ei ndukuragaana na iwe na baijukuru bawe, ei muraahikirizaaga. Buli musaija weena omuli inywe asarwege.

¹¹Muraasarwaga ekisusu eky'omubiri gwanyu, ako nuko kaliba karorwaho ak'endagaano yange ei ndagaine na inywe.

¹²Omu biro byanyu byona omwojo weena enkerembe ou muraazaaraga, asarwege ekisusu ky'omubiri gwe amazire kuhikya ebiro munaana; buli musaija weena asarwege obu araabaga ali w'oruganda rwanyu, rundi ou muguzire na sente zaanyu hali omunyaihanga atali w'oruzaaro rwanyu, ogu anyakuzairwe omunju yanyu, rundi anyakuguzirwe na sente,

¹³boona basarwege. Endagaano yange nukwo eriba eti ey'ebiro n'ebiro ha mubiri gwanyu.

¹⁴Omusaija weena atasazirweho ekisusu eky'omubiri gwe, aihwege omu bantu ab'ihanga linu, habwokuba aba acwire endagaano yange.”

¹⁵Kandi Ruhanga yagambira Abburahamu ati: “Mukazi wawe otalyongera kumweta ibara Sarai baitu omwetege Saara.

¹⁶Ndimuha omugisa, kandi ekindi alikuzarra omwana omwojo, Saara ogu ndimuha omugisa aliba nyina amahanga maingi, kandi nuwe alizaara abakama b'amahanga.”

¹⁷Aho Abburahamu yajuumara, yaseka wenka ati: “Si obu, nyowe omusaija anyakuhikize emyaka kikumi, na Saara mukazi wange ow'emyaka kyenda, niitwe turazaara omwana?”

¹⁸Abburahamu yagambira Ruhanga ati: “Ha! Kakuba ondindiire kurungi Isimairi akoomeera akakora ebi ogonza!”

¹⁹Ruhanga yagamba ati: “Nangwa, baitu Saara mukazi wawe naija kukuzarra omwana omwojo; olimuruka ibara Isaaka. Ndiragaana na uwe endagaano ey'ebiro byona, erikwatwa n'abaijukuru be.

²⁰Kandi Isimairi ou orukugamba, eki omugambireho, nkihuliire, ninyija kumuha omugisa, azaale, oruzaaro rwe rukanye, aliba ise bakama ikumi na babiri, ndimwihamu ihanga erikooto.

²¹Kandi ndigumya endagaano yange na Isaaka, Saara ou alikuzarra mwaka ogurukwija omu kasumi nka kanu.”

²²Ruhanga obu yamazire kubaza n'Abburahamu, yamurugaho yagenda.

²³Abburahamu yatwara Isimairi mutabani we n'abairu boona abaazairwe omuka ye, n'aba yaguzire na sente ze, buli musaija ayaikaraga n'abantu ab'omuka ye, Abburahamu yabasara ebisusu eby'emibiri yaabo ha kiro eki kyonyini, Ruhanga nkooku yamugambiire.

²⁴Abburahamu kusarwa ekisusu eky'omubiri gwe, akaba ahikize emyaka kyenda na mwenda ey'obukuru.

²⁵Kandi mutabani we Isimairi kusarwa ekisusu ky'omubiri gwe, akaba ahikize emyaka ikumi n'esatu.

²⁶Ha kiro eki kyonyini, Abburahamu n'omutabani Isimairi, nubwo baasazirwe;

²⁷abasaija boona ab'omuka ye, abo abazairwe omu ruganda rwe n'abo abaaguzirwe na sente hali omunyaihanga wena, boona bakasarwa hamu na uwe.