Read Runyoro - rutooro Kub 18 Bible Online

Kub 18 - Runyoro - rutooro bible

Kub 18

¹MUKAMA akabonekera Abburahamu ali haihi n'emiti emisisa eya Mamule aikaliire haihi n'omulyango gw'eheema ye, omu ihangwe.

²Abburahamu yaimuka yarora abasaija basatu bamwemeriire omumaiso. Obu yababoine yaimuka haihi n'orwigi nambere akaba aikaliire yagenda kubatangirra, yainama kuhika hansi,

³yagamba ati: “Bakama bange nkooku muhikireho nyowe omwiru wanyu, obu muraaba nimungirra embabazi, mutandabaho kigenzi.

⁴Leka baleete otwizi munaabe ebigere, mubanze muhumuleho omu kiituuru ky'omuti gunu

⁵nyowe mbe ninkyatabarra akookulya, mulye mugarukwemu amaani, obu muraamara kulya, nukwo mwongere orugendo rwanyu.” Abasaija abo baagarukamu bati: “Kora nkooku ogambire.”

⁶Abburahamu yarahuka yataaha omu heema ye, yagambira Saara ati: “Tekaniza bwango ebihi bisatu eby'ensaano enungi, ocumbe emigaati.”

⁷Abburahamu yairuka yagya omu igana, yaihamu enyana enungi erukworoba yagiha omuheereza, omuheereza yagibaaga bwango.

⁸Yakwata omwisi, amata n'enyama ebikaba biteekaniziibwe yabibasembereza; obu bakaba nibalya yabaikarra haihi hansi y'omuti.

⁹Baamukaguza bati: “Saara mukazi wawe ali nkaha?” Abburahamu yagarukamu ati: “Ali omu heema!”

¹⁰MUKAMA yagamba ati: “Otagurukyagurukya ndigaruka hanu ha itoigo, obu, mukazi wawe Saara aliba akuzaaliire omwana omwojo.” Omu kasumi ako, Saara akaba nahurra ayemeriire enyuma y'Abburahamu haihi n'omulyango gw'eheema.

¹¹Omu busumi obu, Abburahamu akaba agurusire kandi na Saara akaba akaikwire, emyaka ekaba ebahinguraine; obu Saara akaba atakyali omu buhangwa bwa'abakazi obwabuli kwezi.

¹²Aho Saara yayeseka naagamba ati: “Hati obu mmazire kukaikura, na iba nyowe agurusire ndaaba ninkyayegonza?”

¹³MUKAMA yakaguza Abburahamu ati: “Kiki ekisekeseze Saara kandi ekimugambisize ngu ‘obu mazimakwo ndizaara omwana, kandi kunu nkuzire nti?’

¹⁴Haroho ekirema MUKAMA? Omu kasumi aka ngumize, ha itoigo, ndigaruka hanu, kandi obu, Saara aliba azaire omwana omwojo.”

¹⁵Baitu Saara yahakana naagamba ati: “Tinsekere.” Habwokuba akaba natiina MUKAMA, nikyo kyamugambisize kiti. MUKAMA yagamba ati: “Nangwa osekere.”

¹⁶Nubwo abasaija baimukize, baagenda. Baimukya amaiso baarora obukiizi bwa Sodomu; Abburahamu yagenda nabo kubooleka omuhanda.

¹⁷MUKAMA yagamba ati: “Ndaasereka Abburahamu eki mmaliriire kukora;

¹⁸kunu nuwe alifooka ihanga erikooto ery'obusobozi, kandi amahanga goona ag'ensi nuwe galiheererwamu omugisa?

¹⁹Nangwa habwokuba mmukomere aragirre abantu be n'eka ye okugenderaga omu muhanda gwa MUKAMA uwe noobu aliba afiire, baikalege nibakora ebirungi kandi nibahondera ebi ngonza; nukwo MUKAMA ahe Abburahamu eki yamuraganiize.”

²⁰Aho MUKAMA yagamba ati: “Habwokuba abantu empamo ezi barukuterra Sodomu na Gomora nyingi kandi ekibi kyabo kihinguraine,

²¹kangende ndole obu baraaba bakozirekwo ebireteriize okurra oku mpuliire; obu baraaba batabikozire nabwo ndaamanya.”

²²Aho abasaija baaruga omuka, baakwata ogw'obukiizi bwa Sodomu; baitu Abburahamu yaikara ayemeriire omumaiso ga MUKAMA.

²³Aho Abburahamu yairra haihi yagamba ati: “Obu mazimakwo, abarungi n'ababi boona oraabahwerekereza?

²⁴Boojo omu rubuga kakuba habamu abarungi amakumi ataano, nabwo orubuga oraaruhwerekereza? Tooruganyire habw'abarungi amakumi ataano abanyakururumu?

²⁵Eki otakisura, eky'okwita abarungi n'ababi, nukwo abarungi baleke kusisanizibwa n'ababi! Eki otakikora! Omucwi w'emisango ow'Ensi yoona taagendere ha bwinganiza?”

²⁶MUKAMA yagamba ati: “Sodomu obu ndagisangamu abarungi makumi ataano bali omu rubuga, ekiikaro kyona ndaakiganyira habw'abo.”

²⁷Abburahamu yagarukamu ati: “Nyehaireyo kubaza na MUKAMA, nyowe ecuucu kandi iju.

²⁸Kandi abarungi obu baraaba bali nk'ana na bataano? Orubuga oraaruhwerekereza habw'okuburaho bataano?” MUKAMA yagarukamu ati: “Tinduhwerekereze obu ndaasangamu ana na bataano.”

²⁹Abburahamu yayongera akaguza MUKAMA ati: “Kandi kakuba hasangwamu ana?” MUKAMA yagarukamu ati: “Habwa makumi ana ago, orubuga tinduhwerekereze.”

³⁰Abburahamu yagamba ati: “MUKAMA otambihirirwa; nyikiriza mbaze. Kandi kakuba habayo asatu?” MUKAMA yagamba ati: “Tinduhwerekereze obu ndasaangamu asatu.”

³¹Abburahamu yagamba ati: “Nyefumire kubaza na MUKAMA, kakuba hasangwayo abiri?” MUKAMA yagarukamu ati: “Habw'amakumi abiri, orubuga tinduhwerekereze.”

³²Aho Abburahamu yagamba ati: “MUKAMA otabihirwa, kambaze omurundi gumu gwonka, kakuba hasangwayo abarungi ikumi bonka?” MUKAMA yagarukamu ati: “Ha bw'ikumi abo orubuga tinduhwerekereze.”

³³MUKAMA obu yamazire kubaza n'Abburahamu, yagenda kandi n'Abburahamu yagaruka owaabo.