Read Runyoro - rutooro Kub 19 Bible Online

Kub 19 - Runyoro - rutooro bible

Kub 19

¹Bamalaika babiri obu baahikire Sodomu omu kairirizi, Looti akaba aikaliire ha irembo ly'orubuga. Obu yababoine, yaimuka yagenda kubatangirra, yajuumara hansi,

²yagamba ati: “Bakama bange, nimbasaba muhunguke owange omwiru wanyu munaabe ebigere; muraaleho, nubwo muraimuka kara mwongere orugendo rwanyu.” Bamalaika baagamba bati: “Nangwa, turaaraara omu ikute.”

³Baitu uwe yabeesengereza muno, nukwo na bo kuhunguka owe, baataaha omunju ye; yabacumbira obugenyi, kandi yacumba omugaati ogutatumbisiibwe, baalya.

⁴Baitu obu bakaba batakabyamire, abantu ab'omu rubuga oru, nubo aba Sodomu, abato n'abakuru boona babbomooka, baagota enju;

⁵baayeta Looti, baamukaguza bati: “Abasaija abaizirege hanu omu kairirizi bali nkaha? Baturukye obatuleetere, tubyame nabo.”

⁶Looti yaturuka yakinga orwigi, yagenda nambere bali,

⁷yagamba ati: “Bagenzi bange mbeesengeriize, mutakora ekintu kyona ekibi.

⁸Mumanyire nkooku nyina bahara bange babiri abatamanyire musaija, kambaturukye mbabaleetere, mubakole kyona eki murukwenda; kyonka abasaija banu mutabakoraho akantu koona, habwokuba bagenyi bange.” Bbo baagamba bati: “Rugaho kuli!”

⁹Baagaruka baagamba bati: “Omuntu onu akaija hanu ali munyaihanga hati naagonza kwefoora mucwi w'emisango! Hati nitwija kukukora kubi kukira nkooku turaakora kubi bbo.” Aho baacuma kuli omusaija ogu Looti n'amaani, kake bacwe orwigi.

¹⁰Baitu abasaija bali abakaba bali omunju baturukya emikono, baasika Looti baamutaahya omunju baakinga orwigi.

¹¹Bamalaika baita amaiso g'abasaija n'abasigazi abakaba bali ha rwigi, ekyarugiremu baajwaha habw'okuhumahuma nibaserra orwigi.

¹²Nubwo abasaija baakagwize Looti bati: “Omu kiikaro kinu oyinamu abantu abandi? Bako bawe, batabani bawe, bahara bawe rundi omuntu wawe wena anyakuli omu rubuga, baihe omu kiikaro kinu,

¹³habwokuba empamo z'abantu abarukukorwa kubi abantu baarwo ihinguraine; MUKAMA azihuliire kandi atutumire kuruhwerekereza.”

¹⁴Aho Looti yaimuka yagenda hali bako be abakaba bajumbiire bahara be, yabagambira ati: “Mwimuke, muruge omu kiikaro kinu; habwokuba MUKAMA ali haihi kuhwerekereza orubuga runu.” Baitu bako be baagira naasandaara.

¹⁵Emamba obu ekaba neesara, bamalaika baateereerra Looti nibagamba bati: “Imuka otwale mukazi wawe nabahara bawe ababiri abali hanu, mutaikara kuhwerekererra omu rubuga runu obu ruraaba nirufubirwa.”

¹⁶Baitu Looti yayezigaziga, nukwo abasaija kumukwata ha mukono, baakwata n'omukono gwa mukazi we, n'ey'abahara be ababiri, Ruhanga habwokubagirra embabazi, bamalaika baamwiha omunju, baamuturukya orubuga.

¹⁷Obu baamazire kubaturukya, baabagambira bati: “Mwiruke mujune obwomeezi bwanyu, mutarora enyuma rundi kugira ha mwayemerra omu kyeya kinu, mwiruke mwebinge ensozi, muleke kuhwerekerra.”

¹⁸Looti yagamba ati:

¹⁹“Haa bakama bange, omwiru wanyu ndozire nkooku mungondeze, mwangirra embabazi nyingi kukiza obwomeezi bwange, baitu tinsobora kwiruka nkahika ha nsozi ziri, akabi katakampikireho nkafa.

²⁰Murole, orubuga orwa nseeri, ruli haihi kandi rutoito. Leka nuho nsingirwe; nukwo nkire.”

²¹Malaika yamugambira ati: “Kinu eki osabire nkikiriize, n'orubuga oru ogambireho tinduhwerekereze.

²²Rahuka bwango nuho osingirwe, tinkole kantu koona otakahikireyo.” Nikyo orubuga oru rwarukiirwe ibara Zohara.

²³Looti kuhika Zohara izooba likaba liturukire.

²⁴Nubwo MUKAMA yayema omwiguru yaseesira Sodomu na Gomora obuganga n'omurro;

²⁵yahwerekereza embuga ezi, ekyeya kyona, abantu abaikaraga omu mbuga ezi, na buli kintu kyona ekikaba kimezire ha itaka.

²⁶Baitu muka Looti akaba amukuratiire, yarora enyuma yafooka nyomyo y'ekisura.

²⁷Abburahamu akazinduka nyenkya kara, yagenda yahika ha kiikaro eki akaba atangatanganiireho MUKAMA,

²⁸yanaga amaiso Sodomu na Gomora n'ensi yoona ey'ekyeya, yarora omwika omunsi egi nigucuuka nk'omwika gw'ekikoomi.

²⁹Ebi nibyo byabaireho, Ruhanga obu yahwerekeriize embuga ez'omukyeya, yaijuka eki yaraganiize Abburahamu, yaiha Looti omu kabi ak'okuhwerekerra, obu yahwerekeriize embuga Looti ezi yaikaramuga.

³⁰Aho Looti yaruga Zohara, yaikara omunsi ey'ensozi hamu nabahara be ababiri, habwokuba akatiina kwikara Zohara, nukwo kwikara omu bwingira.

³¹Muhara we omuzigaijo yagambira muto we ati: “Isiitwe akuzire, kandi omunsi enu busamu musaija ow'okutuswera nk'engeso y'ensi oku eri.

³²Hati tuhe Isiitwe amaarwa anywe atamiire, tubyame na uwe, nukwo tulinde oruzaaro rwaitu niturwihirra hali isiitwe.”

³³Habweki, kiro eki, nukwo kutamiza isebo, omuzigaijo yagenda yabyama na uwe; Looti atamanye muhara we ha yabyamiire rundi ha yaimukiire.

³⁴Ha kiro ekyakurasireho, omwisiki omukuru yagambira muto we ati: “Ekiro mbyamirege na isiitwe, na kiro kinu, twongere tumutamiize, na iwe ogende obyame na uwe, tulinde oruzaaro rwaitu niturwihirra hali isiitwe.”

³⁵Nahabweki, kiro eki nakyo baatamiiza isebo; omwisiki omuto yagenda yabyama na uwe, ise atamanye muhara we ha yabyamiire rundi ha yaimukiire.

³⁶Bahara ba Looti nukwo batwaire enda, ezi baatwekerwe isebo.

³⁷Omwisiki omuzigaijo yazaara omwana omwojo, yamuruka ibara Mowabbu, nuwe ise aba Mowabbu na hati hoona.

³⁸Omwisiki omuto na uwe yazaara omwana omwojo, yamuruka ibara Benammi, nuwe ise Abamooni na hati hoona.