Read Runyoro - rutooro Kub 2 Bible Online

Kub 2 - Runyoro - rutooro bible

Kub 2

¹Iguru n'ensi na byona ebinyakubamu nukwo byahangirwe biti.

² Ekiro kya mukaaga Ruhanga nikyo yamaliireho emirimo ye yoona ei yakozire, yahumura ha kiro kya musanju, tiyakora mulimo na gumu.

³Ekiro eki ekya musanju nikyo Ruhanga yakiheeriire omugisa, yakyeza, habwokuba ekiro eki nikyo yahumuliireho amaliire kimu emirimo ye ei yakozire ey'okuhanga.

⁴Enu niyo ntandiko ey'iguru n'ensi omu kasumi aka byahangiirwemu. Ha kiro MUKAMA Ruhanga eki yahangiiremu iguru n'ensi,

⁵omu kasumi ako, hakaba hatakamezere kimera na kimu omunsi, kandi hakaba hatakamatukire kinyansi na kimu, habwokuba MUKAMA Ruhanga akaba atakanagire njura omunsi, kandi hakaba hatakabaireho muntu ow'okugirima;

⁶baitu ekiho kyaimukaga, kitemba haiguru, kitonya kiitiirra itaka lyona.

⁷Aho MUKAMA Ruhanga yakora omusaija, yamwiha omu cuucu ey'itaka, yamuhuuha omu nyindo orwoya rw'obwomeezi; omuntu yafooka kihangwa ekyomeezi.

⁸MUKAMA Ruhanga yabyara orugonjo omunsi Edeni, ha rubaju rwa Buturukaizooba; oku, nuho yataire omuntu ou yakozire.

⁹MUKAMA Ruhanga yameza omu itaka buli mulingo gwona ogw'omuti ogurukusemerra amaiso g'abantu, ogunyakusemeriire kuliibwa, kandi hagati y'orugonjo oru, akamezaayo omuti ogunyakwomeeza kandi n'omuti ogw'okumanyisa oburungi n'obubi.

¹⁰Hakaba haroho ekisaaru ekyageraga nikiruga Edeni nikitirra orugonjo oru, kandi omu rugonjo oru, nuho kyayebaganirizaaga, kirugwamu ebisaaru bbina.

¹¹Ibara ery'ekisaaru eky'okubanza, niryo Piisoni; eki nikyo ekinyakugera nikyehinguliriza ensi yoona eya Havira, nambere hali zaabbu;

¹²kandi zaabbu ey'omunsi egi nungi, kandi haliyo amabaale agarukwetwa bedolaki na oniki.

¹³Ibara ly'ekyakabiri niryo Gihooni; eki nikyo ekinyakugera nikyehinguliriza ensi yona eya Kuusi.

¹⁴Ibara ly'ekya kasatu niryo Tiigiriisi, eki nikyo ekinyakugera nikigenda Buturukaizooba bwa Asiriya. Kandi ibara ery'ekisaaru ekya kana niryo Efuraate.

¹⁵MUKAMA Ruhanga yatwara omuntu, yamuta omu rugonjo orwa Edeni arulime kandi arulinde.

¹⁶MUKAMA Ruhanga yatererra omuntu ogu naagamba ati: “Emiti yoona ey'omu rugonjo runu noikirizibwa kugiryaho ebijuma nkooku orukwenda,

¹⁷baitu omuti ogw'okumanya oburungi n'obubi, otaligulyaho kijuma, habwokuba ekiro eki oliriiraho ekijuma kyagwo olifeeraho.”

¹⁸Nubwo MUKAMA Ruhanga yagambire ati: “Tikiri kirungi omuntu onu kwikara wenka; ka mukorre omukonyezi anyakumusemerire.”

¹⁹Omu kasumi ako, MUKAMA Ruhanga akaba amazire kwiha omu itaka ebisoro byona eby'omu kisaka n'ebinyonyi byona eby'omu mwanya, yabireetera omuntu, arole nkooku arukubiruka amabara, ibara lyona omuntu eri yarukire buli kimu, eri niryo lyabaire ibara lyakyo.

²⁰Omusaija yaruka ente zoona amabara, ebinyonyi byona eby'omu mwanya, n'ebisoro byona eby'omu kisaka; baitu omuli ebi byona, hatazookemu omukonyezi anyakumusemererire.

²¹Aho, MUKAMA Ruhanga nukwo kugwijagiza muno omuntu, omuntu obu akaba akyagwijagiire, yamusomoramu orubaju rumu ha mbaju ze, omu kiikaro kyarwo yatamu enyama;

²²orubaju Ruhanga oru yaihire omu muntu, nurwo yakoramu omukazi, yamuleetera omusaija.

²³Aho omusaija yagamba ati: “Linu niryo igufa erinyakurugire omu magufa gange, kandi niyo nyama enyakurugire omu nyama yange; arayetwaga mukazi, habwokuba aihirwe omu musaija”.

²⁴Habweki nikyo omusaija araalekeraga ise na nyina, agumireho mukazi we, nukwo abo bombi babe mubiri gumu.

²⁵Omusaija na mukazi we bakaba bali busa, kandi eki tikyabakwasaaga nsoni.