Read Runyoro - rutooro Kub 21 Bible Online

Kub 21 - Runyoro - rutooro bible

Kub 21

¹MUKAMA akabungira Saara nkooku yagambire, kandi yamukorra nkooku yamunihiize.

²Saara yatwara enda yazaarra Abburahamu omwana omwojo, kunu Abburahamu akaba agurusire, omu kasumi Ruhanga aka yabaliizeemu na uwe.

³Abburahamu, omwana ogu Saara ou yamuzaaliire, yamuruka ibara Isaaka.

⁴Isaaka obu yahikize ebiro munaana, Abburahamu ise yamusara ekisusu Ruhanga nkooku akaba amuragiire.

⁵Abburahamu akaba ahikize emyaka kikumi, Isaaka ha yazaaliirwe.

⁶Saara yagamba ati: “Ruhanga ampaire kusemererwa; weena araahurra ngu nzaire omwana, arasekaga nanyowe.”

⁷Kandi yagaruka yagamba ati: “Atali Ruhanga, ondi nooha ayaakugambiire Abburahamu ngu Saara alyonkya abaana? Baitu ndinzirwe namuzaarra omwana omwojo, kunu ali mugurusi.”

⁸Omwana yakura yacuuka. Ha kiro eki yaihirwe ha mabere, Abburahamu akacumba obugenyi.

⁹Baitu Saara obu yarozire omwana wa Hagara Omunyamisiri ou akaba azaaliire Abburahamu, naazaana n'omwana we Isaaka,

¹⁰yagambira Abburahamu ati: “Binga omuzaana onu, aruge hanu n'omwana we, habwokuba omwana w'omuzaana ogu, taligwetwa hamu n'omwana wange Isaaka.”

¹¹Eki kyabiihiza Abburahamu, okuragirwa kubinga omwana we.

¹²Baitu Ruhanga yagambira Abburahamu ati: “Eki kitakubiihiza, okubinga omwana wawe na mukazi wawe omuzaana, kyona kyona Saara eki araakuragira okikole nkooku akikuragiire, habwokuba Isaaka, nuwe alikuzarra abaijukuru aba nakuraganiize.

¹³Kandi omwana w'omuzaana, na uwe ndimwihamu ihanga, habwokuba okamuzaara.”

¹⁴Abburahamu akazinduka nyenkya kara, yatwara omugaati n'endyanga ey'amaizi, yagiha Hagara yagimutweka, yamugambira ati: “Genda n'omwana wawe.” Hagara yagenda yaikara naajeerajeera omwirungu lya Beeri-seba.

¹⁵Amaizi aga akaba ainago omu ndyanga obu gaahoire, yanaga omwana omu kimu ha bijumba eby'omwirungu.

¹⁶Uwe yamwesungusura haraho, yaikarra nk'omwanya oguhungurwamu ibaale yagamba ati: “Tindukwenda kurora omwana wange nkooku arukufa.” Hagara obu akaba ali oku, omwana yatandika kurra.

¹⁷Ruhanga yahurra omwana narra; malaika wa MUKAMA yayema omwiguru, yayeta Hagara, yamugambira ati: “Kiki ekirukukutuntuza? Leka kutiina, habwokuba Ruhanga ahuliire iraka ly'omwana wawe nambere ali.

¹⁸Imuka ohimbe omwana wawe, omukwate omugumye, habwokuba ndimwihamu ihanga erikooto.”

¹⁹Aho Ruhanga yaigura amaiso ga Hagara, yarora iziba ly'amaizi, yagenda ha iziba eri, yataha amaizi yaijuza endyanga ye, agandi yaha omwana we yanywa.

²⁰Ruhanga akalinda omwana ogu, yakura kandi yaikara omwirungu, yamanya muno kurasa obuta.

²¹Yaikaraga omwirungu lya Parani, nyina yamuswererra omukazi Omunyamisiri.

²²Omu kasumi ako, Abimereki na Fikoli, omukuru w'ihe rye, bagambira Abburahamu bati: “Ruhanga aikara na iwe omu byona ebi okora;

²³hati nu, ndahira noojurra Ruhanga nkooku otalinkora kintu kyona ekitahikire, nkooku otalikikora abaana bange rundi abaijukuru bange, nkooku nkukoliire, na iwe nukwo olinkorra, kandi nukwo olikorra ensi enu ei orukwikaramu.”

²⁴Abburahamu yagamba ati: “Ndaarahira.”

²⁵Abburahamu obu yahyemiire Abimereki habw'iziba ery'amaizi, abaheereza b'Abimereki eri bakaba banyagire,

²⁶Abimereki yagamba ati: “Timmanyire anyakukozire eki atangambiire, eki tinkakihurraaga, hati bunu bunu, nubwo nabanza kukihuurra.”

²⁷Abburahamu nukwo kukwata entaama n'enimi, yabiha Abimereki, abantu abo ababiri, baakora endagaano.

²⁸Abburahamu yasoroora omu igana lye, ebuguma ez'entaama musanju.

²⁹Abimereki yakaguza Abburahamu ati: “Ebuguma ez'entaama musanju zinu ezi osoraire, nizimanyisa ki?”

³⁰Abburahamu yagarukamu ati: “Ebuguma zinu omusanju, ozitwale, oziihe omu ngaro zange, nukwo obe kaiso arukugumya nkooku ali ninyowe nalimire iziba linu.”

³¹Ekiikaro eki, nukwo kwetwa Bbeeri-seba habwokuba hanu, bombi nuho baarahiriire.

³²Nukwo baakozire bati endagaano, bali Bbeeri-seba. Hanyuma, Abimereki na Fikoli, mukuru w'ihe rye, baimukya, baagenda omunsi ey'Abafirisiti.

³³Abburahamu yabyara omuti omunsi Bbeeri-seba kandi yayamirra MUKAMA Ruhanga atahwaho.

³⁴Abburahamu akamara ebiro bingi omunsi y'Abafirisiti.