Read Runyoro - rutooro Kub 22 Bible Online

Kub 22 - Runyoro - rutooro bible

Kub 22

¹Ebi obu byahoire, Ruhanga yalenga Abburahamu, yamweta ati: “Abburahamu.” Abburahamu, yayetebuka ati: “Taata.”

²Ruhanga yamugambira ati: “Twara mutabani wawe, mutabani wawe omu Isaaka ogu ou ogonza, ogende omunsi Moria omuntambire ha rusozi oru ndaakugambira, abe kihongwa ekyokeze.”

³Abburahamu akaimuka nyenkya kara, yatandika enkaina, yatwara babiri ha basaija be abasigazi, na mutabani we Isaaka yayasa enku ez'okwokya ekihongwa, yaimuka, yagenda omu kiikaro Ruhanga eki yamugambiire.

⁴Ha kiro ekya kasatu, Abburahamu yaimukya amaiso, yarora ekiikaro eki kiri haraho.

⁵Aho Abburahamu yagambira abasaija be ati: “Inywe mwikalege hanu n'enkaina, nyowe n'omusigazi onu, katugende nseeri hali turamye, turaagaruka tubasange hanu.”

⁶Abburahamu yakwata enku ez'okwokya ekihongwa, yaitweka Isaaka mutabani we, uwe yakwata omurro n'omuhyo, baagenda.

⁷Isaaka yayeta ise yamukaguza ati: “Taata,” Ise yamwetebuka ati: “Ee, kiki mwana wange?” Isaaka yakaguza ise ati: “Omurro n'enku mbinu, baitu entaama ey'ekihongwa eky'okwokya, eri nkaha?”

⁸Abburahamu yagarukamu ati: “Mwana wange, Ruhanga wenka nuwe araayerorra akataama ak'okwokya.” Bombi baayongera orugendo rwabo.

⁹Obu baahikire omu kiikaro Ruhanga eki yagambiire Abburahamu, Abburahamu yayombeka itambiro, yahingika enku, yaboha Isaaka omutabani, yamugaramya ha itambiro ha nku.

¹⁰Aho, Abburahamu yagorra omukono, yakwata omuhyo asale omwana we.

¹¹Malaika wa MUKAMA yayema omwiguru, yayeta Abburahamu naagamba ati: “Abburahamu, Abburahamu.” Abburahamu yayetebuka ati: “Taata.”

¹²Otakora kubi omwana wawe, habwokuba hati namanya nkooku otiina Ruhanga, habw'okurora otaanyimire omwana wawe ogu, omu wenka.

¹³Abburahamu yaimukya amaiso, yamagamaga, kwija kurora enyuma ye, yarora empaya y'entaama, amahembe gaayo gakwatiire omu rusaka, yagenda yagiihayo, niyo yahonga, yaba kihongwa ekyokeze omu kiikaro ky'omwana we.

¹⁴Ekiikaro eki, Abburahamu nikyo yakirukiire ibara “MUKAMA agaba.” Nkooku kyetwa nahati hoona, “Ha rusozi rwa MUKAMA agaba”.

¹⁵Malaika wa MUKAMA yayema omwiguru, yayeta Abburahamu obwakabiri,

¹⁶yamugambira ati: “MUKAMA naagamba ati: ‘Nyowe nyenka ndahiire, habwokuba okozire ekintu kinu, tiwanyima mwana wawe omu wenka,

¹⁷mazima kwo ndikuha omugisa, ndikanyisa abaijukuru bawe, baingane enyunyuuzi eza haiguru kandi baingane omusenyi ogwa ha musa gw'enyanja. Baijukuru bawe balinyaga embuga z'abanyanzigwa babo,

¹⁸kandi omu baijukuru bawe, amahanga goona ag'ensi nuho galiheererwa omugisa, habwokuba ompuliire.’ ”

¹⁹Aho Abburahamu yagaruka ha yasigire abasigazi be, baimuka baagaruka Bbeeri-seba, Abburahamu nuho yaikara.

²⁰Ebi obu byahoire, abantu baagambira Abburahamu bati: “Miika na uwe azaaliire mugenzi wawe abaana,

²¹Uzi, nuwe omuzigaijo, Buuzi, nuwe arukumukurata, hagarukaho Kemweri ise Aramu,

²²hataho Kesedi, Hazo, Firidasi, Jidiraafi na Besweri.”

²³Besweri, nuwe yazaire Rebbeka. Abaana abo omunaana, nubo Nahora owanyina Abburahamu yazaireho Mirika.

²⁴Kandi omuzaana we ayayetwaga Rehuma, akazaara: Tebba, Gahamu, Tahasi na Maaka.