Read Runyoro - rutooro Kub 23 Bible Online

Kub 23 - Runyoro - rutooro bible

Kub 23

¹Saara akoomeera emyaka kikumi mu abiri na musanju; obwomeezi bwa Saara, aho nuho bwagarukiire.

²Akagwa Kiryasi-araba niyo Hebburoni omunsi ya Kanaani. Abburahamu yasaalirwa kandi yalirirra Saara.

³Abburahamu yasiga aho omufu we, yagenda yagambira Abahiiti ati:

⁴“Omuli inywe, ndi munya ihanga kandi nsuhuuki; mumpe omwanya ogw'okuziikamu, nziike omufu wange, mwihe omumaiso gange.”

⁵Abahiiti baamugarukamu bati:

⁶“Waitu, hurra eki turukugamba, omuli itwe, oli muntu w'obusobozi. Ziika omufu wawe omu kituuro eki oraasiima omu bituuro byaitu; busaho n'omu omuli itwe araakwima rundi araakutaanga ekituuro h'oraaziika omufu wawe.”

⁷Abburahamu yaimuka, yainama yasiima Abahiiti, bakama b'ensi.

⁸Yabagambira ati: “Obu muraaba nimugonza nziike omufu wange anduge omumaiso, muhurre eki ndukugamba kandi munyesengerereze Efuroni mutabani wa Zohara,

⁹nukwo ampe obwingira bwe obunyakuli Makipera ha nsaro y'ekibanja kye. Omuhendo gwakyo gwona ogu araancwa ngumusasule inywena nimurora.”

¹⁰Omu kasumi ako, Efuroni akaba ali omu Bahiiti abo; yagarukamu Abburahamu, Abahiiti boona abaataahire omu rubuga bahuliriize yagamba ati:

¹¹“Nangwa, waitu hurra eki ndukugamba; ekibanja eki ndaakikuha hamu n'obwingira obunyakurumu; nakikuha abantu ab'ihanga lyange baroho. Ziika omufu wawe.”

¹²Aho Abburahamu yainama yasiima bakama b'ensi egi.

¹³Yagambira Efuroni n'abantu boona bahuliriize ati: “Nkwesengeriize ompulirize; ka nsasule omuhendo gw'ekibanja kinu, gwikirize ngukuhe, nukwo nziikemu omufu wange.”

¹⁴Efuroni yagambira Abburahamu ati:

¹⁵“Waitu, mpuliriza, ekicweka ky'itaka ekirukugura siringi bikumi bbina, kintu ki hali iwe na nyowe? Ziika omufu wawe.”

¹⁶Abburahamu yaikirraniza n'Efuroni, yamulengera omuhendo ogu yagambire, Abahiiti nibahurra, nizo siringi ebikumi bbina, okurorra ha muhendo ogw'abasuubuzi ogukaba guroho omu kasumi ako.

¹⁷Nahabweki, ekibanja kya Efuroni, ekikaba kiri Makipera enyakuli Burugaizooba bwa Mamule, ekibanja n'obwingira obukaba burumu, emiti yoona eyekaba eri omu kibanja, okumarayo ensaro zakyo zoona,

¹⁸byona byaheebwa Abburahamu omumaiso g'Abahiiti, bibe bintu bye habwe, boona abakaba baizire ha irembo ly'orubuga nibarora.

¹⁹Eki obu kyamazire kubaho, Abburahamu yaziika Saara mukazi we omu bwingira obunyakuli omu kibanja ekikaba kiri Makipeera ha Burugaizooba bwa Mamule (niyo Hebburoni) omunsi Kanaani.

²⁰Ekibanja n'obwingira obukaba burumu, byaheebwa Abburahamu, kibe kibanja kye habwe eky'okuziikamuga, eki yahairwe Abahiiti.