Read Runyoro - rutooro Kub 24 Bible Online

Kub 24 - Runyoro - rutooro bible

Kub 24

¹Omu kasumi ako, Abburahamu akaba agurusire muno kandi MUKAMA akaba amuhaire omugisa omu bintu byona.

²Abburahamu yagambira omuheereza we ayakiraga ekitiinisa ab'omunju ye boona, ayaroleerraga ebintu bye byona ati: “Ta omukono gwawe hansi y'ekibero kyange,

³nkurahiize MUKAMA Ruhanga ow'iguru n'ensi, otaliswererra mutabani wange omukazi omu bahara b'Abanyakanaani aba ndukwikara na bo,

⁴baitu genda omwihanga lyange, omu bantu ab'oruganda rwange, nuho oswererre mutabani wange Isaaka omukazi.”

⁵Omuheereza yamugarukamu ati: “Omukazi kakuba ayanga kwija na nyowe omunsi enu; obu mutabani wawe ndimutwara omunsi ei warugiremu?”

⁶Abburahamu yagarukamu omuheereza ati: “Eki otalikisura, okagarra oku omwana wange.

⁷MUKAMA Ruhanga ow'omwiguru, ayanyihire omunju ya isenyowe n'omunsi ei nazairwemu, ayabalize na nyowe kandi ayandahiire naagamba ati: ‘Ensi enu ndigiha abaijukuru bawe’, oku alitumayo malaika akubanzeeyo, nuho oliiha omukazi ou oliswererra mutabani wange.

⁸Omukazi obu alyanga kwija na iwe, obu ekirahiro nkurahiize, kiriba kitakyakukwata kyonka otaligarra oku omwana wange.”

⁹Aho omuheereza yata omukono gwe hansi y'ekibero ky'Abburahamu mukama we, yamurahira nkooku araahikiriza eki amuragiire.

¹⁰Nubwo omuheereza yatwaire ikumi ha ngamiya za mukama we, yaimukya yagenda Mesopotamiya, yahika omu rubuga rw'owabu Nahora.

¹¹Yahuumuza engamiya aheeru y'orubuga, haihi n'iziba ly'amaizi, orwebagyo muno, omu kasumi aka abakazi bagenderamu kuleeta amaizi.

¹²Omuheereza yasaba naagamba ati: “Ai MUKAMA Ruhanga wa mukama wange Abburahamu, nkwesengeriize, ompe omugisa kiro kinu, oyoleke mukama wange Abburahamu nkooku omugonza muno.

¹³Dora nyemeriire ha iziba ly'amaizi, kandi bahara b'abasaija ab'omu rubuga nibaija kuleeta amaizi.

¹⁴Omwisiki ou ndaasaba nti: ‘Nkwesengeriize, tuura ensoha yawe nyweho amaizi’, akagamba ati: ‘Nywa, kandi engamiya zawe ndaazeesera amaizi’, buli ogu, nuwe okomiire omwiru wawe Isaaka. Eki nikyo ndaamanyiraho nkooku oyolekere mukama wange engonzi zawe ezitahwaho.”

¹⁵Obu akaba atakamazire kusaba, ahonaaho haija Rebbeka muhara wa Beesweri, mutabani wa Mirika, muka Nahora mugenzi w'Abburahamu, yaija ataire ensoha ye ha ibega.

¹⁶Akaba ali mwisiki nyamibwa, atakahikwahoga musaija, yasirimuka ha iziba yataha amaizi, yarugayo.

¹⁷Aho omuheereza w'Abburahamu yairuka kumwitirana, yamusaba naagamba ati: “Nkwesengeriize, mpaho otwizi otw'omu nsoha.”

¹⁸Omwisiki yatuura ensoha ye, yagikwatira omu mikono, yagamba ati: “Nnywa, mukama wange.”

¹⁹Obu yamazire kumuha amaizi, yagamba ati: “Engamiya zawe nazo ndaaziha amaizi kuhika obu zirahaga.”

²⁰Aho, amaizi agakaba gali omu nsoha yagaseesa omu bwato, ahonaaho yagaruka ha iziba, yayesera engamiya ze zoona kuhika obu zahaagire.

²¹Omusaija yaikara amuroleriire aculiire, ayetegereze, oruhanda rwe MUKAMA obu araaba aruhaire omugisa rundi nangwa.

²²Engamiya obu zaakuukire, omusaija yakwata empeta ey'ezaabbu erukuhikya obulemeezi bwa kimu kya kabiri kya guraamu, n'ebikomo bibiri ebya ha mikono ebirukuhikya obulemeezi bwa guraamu ikumi eza zaabbu,

²³yamukaguza ati: “Wewe, ngambira, oli muhara wooha?”

²⁴Omwisiki yagarukamu ati: “Nyowe, ndi muhara wa Beesweri, mutabani wa Mirika, ou yazairweho Nahora.”

²⁵Yayongera yagamba ati: “Tunyina obunyansi n'ebyokulya bingi, n'omwanya ogw'okuraaramu.”

²⁶Omusaija yainama, yaramya MUKAMA,

²⁷yagamba ati: “MUKAMA akugizibwe, Ruhanga wa mukama wange Abburahamu, anyakwolekere mukama wange engonzi n'obwesige bwe. MUKAMA anyebembiire omu muhanda, yampikya ha nju ey'ab'oruganda rwa mukama wange.”

²⁸Omwisiki yairuka, ebi byona, yabisubirra ab'omuka ya nyina.

²⁹Rebbeka akaba anyina munyanya, ibara lye Labbani, Labbani yairuka, yahika ha iziba, omusaija nambere akaba ali.

³⁰Obu yarozire empeta n'ebikomo ebinyakuli ha mikono ya munyanya, kandi ahuliire n'ebigambo Rebbeka munyanya ebi yagambire ati: “Omusaija nukwo angambiire ati.” Labbani yagenda yaihayo omusaija, yamusanga ha iziba ayemeriire haihi nengamiya ze.

³¹Yamugamba ati: “Rugayo, otaahe mu ka, iwe MUKAMA ou ahaire omugisa, kiki ekikwemeriize aheeru? Enju ngiteekaniize, n'ekiikaro engamiya ha ziraaraara.”

³²Aho, omusaija yataaha omunju, Labbani yaiha amatandiko ha ngamiya yaziha obunyansi, yamuha amaizi ag'okunaaba ebigere, n'agandi ag'abasaija aba akaba anyinabo, banaaba ebigere.

³³Nubwo baamusembereza ebyokulya alye, baitu uwe yagamba ati: “Tindukwija kulya kantu, ntakabalize eki nyiziriire.” Labbani yagamba ati: “Kigambe.”

³⁴Aho, omuheereza yagamba ati: “Nyowe, ndi muheereza wa Abburahamu,

³⁵MUKAMA akaha mukama wange emigisa nyingi, afookere muntu w'ekitiinisa, amuhaire amagana g'ente, ag'embuzi n'ag'entaama, efeeza n'ezaabbu, abairu n'abazaana, engamiya n'enkaina,

³⁶Saara muka mukama wange, akazarra mukama wange omwana omwojo, kandi kunu akaikwire, baitu omwana ogu, Abburahamu amuhaire byona ebi anyinabyo.

³⁷Mukama wange akandahiza naagamba ati: ‘Otaliswererra omwana wange omukazi, omu bahara b'Abanyakanaani, bakama b'ensi ei ndumu,

³⁸baitu ogende omunju eya ise nyowe, omu ruganda rwange, nuho oswererre omwana wange omukazi.’

³⁹Nagarukamu mukama wange nti: ‘Obundi, omukazi asobora kwanga kwija na nyowe.’

⁴⁰Baitu yagamba ati: ‘MUKAMA ou mpeereza alituma malaika we agende na iwe, kandi atereekereze orugendo rwawe, nukwo oswererre mutabani wange omukazi arukuruga omu b'oruganda rwange n'omunju ya ise nyowe.

⁴¹Obu olihika omu banu ab'oruganda rwange, buli endahiro enu, eriba etakyakukwata; kakuba omukazi batamukuha, nabwo endahiro enu, eriba etakyakukwata.’”

⁴²“Kiro kinu obu mpikirege ha iziba nasaba nti: ‘Ai MUKAMA Ruhanga wa mukama wange Abburahamu, obu oraaba noosiima kuha omugisa orugendo rwange runu,

⁴³hati nyemeriire ha iziba ly'amaizi omwisiki arukwija kuleeta amaizi, ou ndaasaba nti: “Nkwesengeriize, ompe otwizi otw'omu nsoha yawe nnyweho,” araagarukamu ati:

⁴⁴“Nnywa, kandi n'engamiya zawe nazo ka nzesere,” buli ogu nuwe mukazi, MUKAMA ou akomiire omwana wa mukama wange.’

⁴⁵“Obu mbaire ninkyasaba, Rebbeka yaija ataire ensoha ha ibega, yasirimuka ha iziba, yataha amaizi. Namusaba nti: ‘Nkwesengeriize, mpaho amaizi nywe.’

⁴⁶Ahonaaho yatuura ensoha, yagamba ati: ‘Nnywa, engamiya zawe ndazeesera.’ Aho nanywa, n'engamiya nazo zaanywa.

⁴⁷Nubwo namukaguza nti: ‘Iwe oli muhara w'oha?’ Yagarukamu ati: ‘Ndi muhara wa Beesweri mutabani wa Nahora ou yazaireho Mirika.’ Namujweka empeta ha nyindo, n'ebikomo ha mikono.

⁴⁸Aho nainama, naramya kandi nasiima MUKAMA Ruhanga wa mukama wange Abburahamu anyakunyebembiire kurungi nswererre omwana wa mukama wange omu bantu ab'oruganda rwe.

⁴⁹Yagambira Labbani ati: “Obu muraaba muli b'okukorra mukama wange ebirungi, kandi eby'amazima, mungambire, obu kiraaba kitalikyo, nabwo mungambire, ngende handi.”

⁵⁰Aho Labbani na Beesweri baagarukamu bati: “Eki kigambo kya MUKAMA, itwe titwakugambire ekibi rundi ekirungi.

⁵¹Rebbeka ngugwo, akuli omumaiso, mutwale, mutabani wa mukama wawe amuswere nkooku MUKAMA agambire.”

⁵²Omuheereza w'Abburahamu obu yahuliire ebigambo byabo, yagwa hansi yaramya MUKAMA.

⁵³Yasumurra ensahu, yaihamu eby'okwekunisa eby'efeeza n'eby'ezaabbu, n'ebyokujwara, yabiha Rebbeka, kandi yaha munyanya omwisiki na nyina ebisembo eby'omuhendo.

⁵⁴Hanyuma uwe n'abasaija abakaba bali na uwe, baalya, baanywa, kandi baaraara aho ekiro eki. Nyenkya obu bwakiire, omuheereza yagamba ati: “Hati, ka ngarukeyo owa mukama wange.”

⁵⁵Munyanya omwisiki na nyina baagarukamu bati: “Leka omwisiki amale naitwe akasumi kake, haakire ebiro ikumi byonka, ebiro ebi obu biraahwaho, agende.”

⁵⁶Baitu omuheereza yabagambira ati: “Muleke kunyikazaaho, habwokuba, eki naiziriire, MUKAMA akimazire, mundeke ngaruke owa mukama wange.”

⁵⁷Baamugarukamu bati: “Ka twete omwisiki, turole eki araacwamu.”

⁵⁸Baayeta Rebbeka, baamukaguza bati: “Nooyenda kugenda n'omusaija ogu hati?” Yabagarukamu ati: “Ego ningenda.”

⁵⁹Nubwo baikiriize Rebbeka munyanya-bo, n'omuheereza we, bagende n'omuheereza w'Abburahamu, hamu n'abantu aba akaba anyinabo.

⁶⁰Baasabira Rebbeka omugisa bati: “Munyanya-itwe, obe nyina abantu obukumi n'obukumi, abaijukuru bawe, basingule abanyanzigwa baabo.”

⁶¹Aho Rebbeka n'abarukumusendekereza, baatemba engamiya, baahondera omukwenda, omuheereza wa Abburahamu nukwo yatwaire ati Rebbeka, yagenda.

⁶²Omu kasumi ako, Isaaka, akaba afurukire Beerirahai-roohi agarukire Negebu.

⁶³Kiro kimu, omu bwire bw'orwebagyo, Isaaka akagenda omu bwerre, amaiso gamuli omu nkiro, yarora engamiya ziri hara, niziija.

⁶⁴Rebbeka obu yainunukire, yarora Isaaka, yasimburuka bwango hansi,

⁶⁵yakaguza omuheereza w'Abburahamu ati: “Omusaija oli, anyakuli nseeri, arukurubata naatwizira, nooha?” Omuheereza yagarukamu ati: “Ogu, nuwe mukama wange.” Rebbeka yakwata ekitambaara, yakyesweka ha maiso.

⁶⁶Omuheereza yasubirra Isaaka byona ebyabaireho.

⁶⁷Aho Isaaka yataahya Rebbeka mukazi we omu heema, yamuswera, kandi akamugonza muno. Rebbeka yahuumuza Isaaka, yamwebesa obujune obw'okuferwa nyina.