Read Runyoro - rutooro Kub 25 Bible Online

Kub 25 - Runyoro - rutooro bible

Kub 25

¹Abburahamu akaswera omukazi ondi, ibara lye nuwe Ketura.

²Yamuzaaraho abaana, ganu nugo mabara gaabo: Zimurani, Yokosani, Medyani, Midyani, Isibaki, na Suha.

³Yokosani akazaara Seba na Dedani.

⁴Kandi batabani ba Dedani, amabara gaabo nugo ganu: Asuruma, Lehumima. Batabani ba Midyani, amabara gaabo nugo ganu: Efa, Eferi, Hanoki, Abida na Erida. Abo boona, baijukuru ba Ketura.

⁵Abburahamu byona ebi akaba anyinabyo, akaba abihaire Isaaka.

⁶Baitu abaana ab'abakazi bandi, akabaha ebisembo, baitu obu akaba atakafiire, akababinga, yabaahukaniza n'omutabani Isaaka, baagenda omunsi eya Burugaizooba.

⁷Abburahamu akafa ahikize emyaka kikumi mu nsanju n'etaano ey'obukuru,

⁸yafa ali mugurusi anyakutwaire emyaka, yakurata abaabo.

⁹Batabani be Isaaka na Isimairi, baamuziika omu bwingira obwa Makipera, omu kibanja ekya Efeeroni mutabani wa Zohara Omuhiiti, ekinyakuli Burugaizooba bwa Mamule.

¹⁰Ekibanja eki, Abburahamu eki yaguzireho Abahiiti, uwe na mukazi we Saara nuho baaziikirwe.

¹¹Abburahamu obu yamazire kufa, Ruhanga akaha omugisa Isaaka omutabani. Isaaka yayombeka Beerirahai-roohi, nuho yaikara.

¹²Ganu nugo mabara g'abaijukuru ba Isimairi, mutabani w'Abburahamu ou yazaireho Hagaara enzaarwa ya Misiri, omuzaana wa mukazi we Saara.

¹³Amabara ago gakurataine nkooku baazairwe. Nebayoosi, nuwe omuzigaijo, hakurataho Kedali, Adibeeri, Mibisamu.

¹⁴Miisima, Duma, Masa,

¹⁵Hadadi, Tema, Yetuli, Nafisi, na Kedena.

¹⁶Ago nugo mabara g'abaana ba Isimairi, agaarukirwe ebika byaabo n'ebitabu byaabo, abalemi ikumi na babiri, nk'enganda zaabo oku ziri ikumi na ibiri.

¹⁷Isimairi, akafa ahikize emyaka kikumi mu asatu na musanju ey'obukuru, yafa yakurata abaabo.

¹⁸Batabani be baayombeka okuruga Havira, okuhika Suuru enyakuroleriire Misiri, ha bukiizi bwa Asiriya, akombeka Burugaizooba, aroleriire bagenzi be.

¹⁹Ganu nugo mabara ga baijukuru ba Isaaka, mutabani w'Abburahamu, Abburahamu akazaara Isaaka,

²⁰Isaaka akaba ahikize emyaka makumi ana ey'obukuru, ha yasweriire Rebbeka muhara wa Beeteri, munyanya Labbani ow'orubuga Padanaramu orw'ensi Aramu.

²¹Isaaka yasabira mukazi we hali MUKAMA, habwokuba Rebbeka akaba ali ngumba, kandi MUKAMA yaha Isaaka eki yasabire, Rebbeka yatwara enda,

²²abaana baamurwanira omunda, nukwo kugamba ati: “Obu kiraaba kiri kiti, omunsi nindinda ki?” Aho yagenda kwekaguza hali MUKAMA.

²³MUKAMA yamugarukamu ati: “Omunda yawe, harumu amahanga abiri, kandi enganda ibiri, abaana aboraazaara, balirugwamu amahanga abiri agarukwahukana.”

²⁴Akasumi ke ak'okuzaara obu kaahikire, omunda ye haasangwamu abarongo,

²⁵ayabandize kuzaarwa, yaija ali rujumba, kandi ajwigire, nikyo baamurukiire ibara Esau.

²⁶Ahonaaho, mugenzi we yaturuka, yaija akwasire ekikongoijo ky'Esau, nukwo kumuruka ibara Yakobbo. Isaaka akaba yahikya emyaka nkaaga ey'obukuru, mukazi we kuzaara abaana abo.

²⁷Aboojo obu baakuzire, Esau yaba muhiigi nyakabara, omusaija ataracwekaga omu kisaka, baitu Yakobbo akaba ali muculeezi, yaikaraga omu heema.

²⁸Isaaka yagonzaaga Esau, habwokuba yalyaga enyama ey'ebisoro ebi yahiigaga, baitu Rebbeka uwe yagonzaaga Yakobbo.

²⁹Kiro kimu, Yakobbo obu akaba acumbire ekiguude, Esau yagaruka naaruga omu kisaka kuhiiga, enjara emuli kubi.

³⁰Yasaba Yakobbo ati: “Mpaho ekiguude eki, ekirukutukura, ndyeho, enjara y'okunyita!” (nikyo baamurukiire ibara Edomu)

³¹Yakobbo yagarukamu ati: “Banza onguze[2] obukuru bwawe.” Esau nukwo kugamba ati:

³²“Ndi haihi kufa, obukuru bwange nibukyangasira?”

³³Yakobbo yamugamba ati: “Banza ondahire.” Esau nukwo kurahira Yakobbo, yamuguza obukuru bwe.

³⁴Hanyuma, Yakobbo yaha Esau omugaati n'ekiguude ky'ebihimba, Esau yalya yanywa amaizi yaimuka yayegendera. Esau nukwo yagayire ati obukuru bwe.