Read Runyoro - rutooro Kub 26 Bible Online

Kub 26 - Runyoro - rutooro bible

Kub 26

¹Omu biro ebi, omunsi egi hakagwamu kiihe, eyakurasire kiihe eri, ey'okubanza, eyagwire omu biro by'Abburahamu. Isaaka nukwo kugenda Gerai, hali Abimereki omukama w'Abafirisiti.

²MUKAMA yabonekera Isaaka yamugambira ati: “Otagenda Misiri, oikale omunsi ei ndaakwoleka.

³Ikara omunsi enu, ndaikaraga na iwe kandi ndaakuhaga omugisa, habwokuba, ensi zinu zoona, ndizikuha kandi ndiziha abaijukuru bawe, ndihikiriza endagaano ei naragaine n'Abburahamu Sso.

⁴Ndikanyisa abaijukuru bawe, baingane enyunyuuzi eza haiguru, ndibaha ensi zinu zoona kandi omuli bo amahanga goona ag'ensi, numwo galiheererwa omugisa.

⁵Habwokuba Abburahamu akampurra, yakora eki namuragiire, yakwata ebiragiro byange, ebigambo byange na byona ebi nataireho.”

⁶Nahabweki, Isaaka yaikara Gerali.

⁷Abantu ab'omunsi egi, obu baamukagwize hali mukazi we, akabagarukamu ati: “Omukazi ogu, munyanya-nyowe,” habwokuba akatiina kubagambira ati: “Mukazi wange,” naateekereza ngu abasaija ab'ekiikaro eki, basobora kumwita nibamutura Rebbeka. Habwokuba akaba ali mukazi nyamibwa.

⁸Isaaka obu akaba amazire omunsi egi omwanya mukooto, Abimereki omukama w'Abafirisiti yayemerra omu idirisa, yarora Isaaka nazaana kandi nayagaaga mukazi we Rebbeka.

⁹Abimereki nukwo kweta Isaaka yamugambira ati: “Hati, nnanukire, ogu mukazi wawe, tali munyanyoko, nubwo yamukagwize ati: ‘Kiki ekyakugambisize oti, omukazi ogu munyanya-nyowe?’ ” Isaaka yamugarukamu ati: “Habwokuba nkatiina nti, tinyikara kufa nkamugwaho.”

¹⁰Abimereki yamukaguza ati: “Eki, kiki wankozire? Omu habasaija abanyakuli hanu, yaakusoboire kubyama na mukazi wawe, kandi obu, waakubaire otuleetiire omusango.”

¹¹Abimereki nukwo kuhabura abantu boona naagamba ati: “Weena alikwataho omusaija onu rundi mukazi we, ogu, w'okwita.”

¹²Isaaka yasiga embibo omunsi egi, omu mwaka ogu gwonka, yagesa kukira ebi yasigire emirundi kikumi. MUKAMA yamuha omugisa,

¹³yatunga, yagenda naayeyongera itungo okuhika obu yaguudahaliire kimu,

¹⁴akaba anyina amagana maingi ag'entaama n'ag'embuzi, amahyo g'ente, n'abantu baingi. Abafirisiti baamukwatirwa ihali.

¹⁵(Omu kasumi ako, Abafirisiti bakaba baigaire amaziba abairu b'Abburahamu ise, aga bakaba balimire, omu biro by'Abburahamu.)

¹⁶Abimereki yagambira Isaaka ati: “Turugize ogende, habwokuba nootukira muno amaani.”

¹⁷Isaaka nukwo kuruga omunsi egi, yagenda yatembura mu kyeya ekya Gerai, nuho yaikara.

¹⁸Isaaka yaigura amaziba agakaba galimirwe omu biro by'Abburahamu ise, habwokuba Abafirisiti, bakaba bagaigaire, Abburahamu amazire kufa.

¹⁹Abairu ba Isaaka, obu baalimire iziba omu kyeya, haijamu amaizi amarungi,

²⁰abaliisa aba Gerai baakungana n'abaliisa aba Isaaka, buli omu naagamba ati: “Iziba linu lyaitu.” Iziba eri, Isaaka nikyo yalirukiire ibara Eseki, habwokuba abantu bakamukunganiza.

²¹Hanyuma, baalima erindi, nalyo baalikunganira, eri yaliruka ibara Sitina.

²²Aho yarugaho, yalima iziba erindi, eri, tibaalikunganira, nukwo kuliruka Rehobboti, naagamba ati: “Hati Ruhanga atuhaire omwanya ogurukumara, nitwija kukanya omunsi.”

²³Isaaka obu yarugire aho, yagenda Beesi-seba.

²⁴MUKAMA yamubonekera omu kiro eki kyonyini, omu bwire bw'ekiro, yamugambira ati: “Ninyowe Ruhanga wa Abburahamu Sso; otatiina, habwokuba ndi hamu na iwe, ninyija kukuha omugisa kandi nkanyise abaijukuru bawe, habw'omwiru wange Abburahamu.”

²⁵Aho yayombeka itambiro, yasaba MUKAMA, yateerayo eheema ye, kandi oku naho abairu ba Isaaka baalimayo iziba.

²⁶Kandi Abimereki yaruga Gerai, yagenda omba Isaaka, anyina omuhabuzi we, Ahusati, na Fikoli mukuru w'ihe rye.

²⁷Isaaka yakaguza ati: “Kiki ekibaleesire nambere ndi kandi kunu mukannoba mwambinga owanyu?”

²⁸Baamugarukamu bati: “Twetegereriize kimu, MUKAMA nkooku ali na iwe, nahabweki nitugamba tuti: Tusemeriire turahirane kandi tukole endagaano,

²⁹erukwoleka nkooku otalitukora kubi, nka itwe oku tutarakukwasireho kandi nkooku tutarakukozireho kabi koona, kyonka tukakukorra ebirungi, twakwohereza kugenda n'obusinge. Hati, Ruhanga akuhaire omugisa.”

³⁰Nubwo Isaaka yabakorra obugenyi, baalya, baanywa.

³¹Nyenkya obu bwakiire, baimuka kara, baarahirangana, Isaaka yabaraga baamurugaho, baagenda n'obusinge.

³²Ha kiro eki kyonka, abairu ba Isaaka baija baamusubirra ebigambo by'iziba eri bakaba balimire, baamugambira bati: “Tusangiremu amaizi, iziba eri,”

³³yaliruka ibara Sibaha, nuho orubuga oru rwarugiriire kwetwa Beesi-seba na hati hoona.

³⁴Esau obu yahikize emyaka makumi ana ey'obukuru, yaswera mukazi ibara lye Yudita, muhara wa Beeri Omuhiiti, yaswera ondi, ibara lye Bbasemasi, muhara wa Eroni na uwe Omuhiiti,

³⁵eki kikabiihiza Isaaka na Rebbeka.