Read Runyoro - rutooro Kub 27 Bible Online

Kub 27 - Runyoro - rutooro bible

Kub 27

¹Isaaka obu yakuzire, amaiso ge gahimbaire, atakyasobora kuhweza, yayeta Esau mutabani we omukuru, Esau yayetebuka ati: “Taata.”

²Yamugambira ati: “Ohurre kurungi mwana wange, hati ngurusire, timmanyire kiro eki ndifeeraho,

³hati nu mwana wange, kwata ebintu byawe ebi ohiigisa, omufuko n'obuta bwawe, ogende omu kisaka ompiigire ebisoro,

⁴oncumbire ebyokulya ebirukunnurra, nk'ebi, ebi ngonza, obindeetere mbirye, nukwo nkuhe omugisa ntakafiire.”

⁵Omu kasumi ako, Isaaka obu yabazaaga n'omutabani Esau, Rebbeka akaba ategere okutu. Esau obu yagenzire omu kisaka kuhiiga nukwo aleete enyama,

⁶Rebbeka yagambira omutabani Yakobbo ati: “Mpuliire Sso naagambira mutaahi wawe Esau ati:

⁷‘Ondeetere enyama oncumbire ebyokulya ebirukunnurra, mbirye, nkusabire omugisa ntakafiire.’

⁸Hati mwana wange, ompurre kandi okole eki ndaakuragira.

⁹Genda omu igana ly'embuzi onyihireyo ebyana ebirungi ncumbire Sso ebyokulya ebirungi nkooku agonza

¹⁰obimusembereze abirye, nukwo akusabire omugisa atakafiire.”

¹¹Yakobbo yagarukamu nyina ati: “Kandi, mugenzi wange Esau ka muntu w'ebyoya, nyowe timbiina,

¹²kakuba taata ankwatakwata akammanyirra, naija kumanya nkooku ndukumubiihabiiha, aho ndaayeretera omukyeno omu kiikaro ky'omugisa.”

¹³Nyina yamugarukamu ati: “Mwana wange, omukyeno gwawe, gube hali nyowe. Kyonka iwe, kora eki ndukukugambira, genda ondeetere ebyana by'embuzi.”

¹⁴Yakobbo yagenda yabimuleetera, nyina yacumbira Isaaka ebyokulya ebirukunura nk'ebi agonza.

¹⁵Rebbeka yaleeta ebyokujwara ebirukukira oburungi eby'omutabani omukuru Esau ebi akaba ayahwire, yabijweka omutabani omuto Yakobbo,

¹⁶kandi yamujweka obuhu bw'embuzi ha mikono na ha bikya h'arukuteerra.

¹⁷Yamukwasa ebyokulya ebirungi n'omugaati ebi akaba acumbire.

¹⁸Yakobbo yaija hali ise yamweta ati: “Taata.” Ise yayetebuka yagamba ati: “Ndi hanu mwana wange niiwe oha?”

¹⁹Yakobbo yagarukamu ati: “Ninyowe Esau omuzigaijo gwawe, eki ondagiire nkikozire, hati ikarra olye enyama ei mpiigire, nukwo onsabire omugisa.”

²⁰Isaaka yakaguza omutabani ati: “Leero hati koizire bwango?” Yakobbo yamugarukamu ati: “Habwokuba MUKAMA Ruhanga wawe ampaire omugisa.”

²¹Aho Isaaka yagambira Yakobbo ati: “Irra haihi nkwetegereze mwana wange, nukwo mmanye obu oraaba olikwo mwana wange Esau.”

²²Yakobbo obu yairiire haihi, ise yamukwataho, yagamba ati: “Iraka lya Yakobbo, baitu emikono y'Esau.”

²³Tiyamumanyirra, habwokuba emikono ye ekaba eroho ebyoya nk'ey'Esau owanyina, nikyo yamusabiriire omugisa.

²⁴Yamukaguza ati: “Niiwe kwo mwana wange Esau?” Yakobbo yamugarukamu ati: “Ninyowe.” Nubwo ise yamugambira ati:

²⁵“Binyirize haihi ndye ha muhiigo gwawe, nukwo nkusabire omugisa.” Yakobbo yabimwiriza haihi, Isaaka yalya, yamuha amarwa, yanywa.

²⁶Nubwo ise yamugambira ati: “Irra haihi mwana wange, onywegere.”

²⁷Yakobbo yairra haihi ise, yamunywegera, Isaaka obu yaboyiirwe ebyokujwara by'Esau, yasabira Yakobbo omugisa naagamba ati: “Okuboya kw'omwana wange nikusisana nk'okw'omusiri MUKAMA ogu ahaire omugisa.

²⁸Ruhanga akunagire orume orw'omwiguru kandi akuhe ensi ey'orwezo, akuhe ebyokulya n'ebyokunywa bingi.

²⁹Enganda zikuheerezeege, amahanga gakutemuga ekitiinisa. Olemege beene baanyu, kandi aboojo abaanyoko bakutemuga ekitiinisa. Weena araakukyenaga, na uwe akyenwe, weena arakusabiraga omugisa, na uwe aheebwege omugisa!”

³⁰Isaaka obu akaba yakamara kuha Yakobbo omugisa, Yakobbo atakarugire omumaiso ge, mugenzi we Esau yataaha naaruga kuhiiga.

³¹Na uwe yacumba ebyokulya ebirukunura, yabitwarra ise yamugambira ati: “Taata imuka olye enyama ei mpiigire, nukwo onsabire omugisa.”

³²Ise yamukaguza ati: “Niiwe oha?” Esau yamugarukamu ati: “Ninyowe Esau mutabani wawe, omuzigaijo.”

³³Isaaka yacwekwa enkizi, yakaguza ati: “Kandi nooha anyakuhiigirege, yandeetera enyama nagirya otakaizire, kandi namusabira omugisa?”

³⁴Esau obu yahuliire ebigambo ise ebi yamugambiire, yayamuza, yataabaana ati: “Ai taata, boojo na nyowe nsabira omugisa!”

³⁵Ise yamugarukamu ati: “Owanyoko aizirege yambiihabiiha, namusabira omugisa ogu naakukusabiire.”

³⁶Esau yakaguza ati: “Ibara Yakobbo[3], litamuhike? Yakangobeza emirundi ebiri. Okubanza akanyihaho obukuru bwange, kandi hati anyihireho n'omugisa gwange.” Yagaruka yakaguza ati: “Nanyowe tonsabiraho mugisa?”

³⁷Isaaka yagarukamu Esau ati: “Mmuhaire obusobozi obw'okukulema, kandi mmuhaire bagenzi be boona babe bairu be, mmuhaire ebyokulya n'ebyokunywa. Hati mwana wange, leero iwe ndaakukorra ki?”

³⁸Esau yakaguza ati: “Omugisa ogu osabire nugwo gwonka? Ai taata, na nyowe mpa omugisa.” Esau yatamu ekyoboobo.

³⁹Aho, Isaaka ise yagamba ati: “Oraikaraga omunsi etarumu rwezo kandi etarukugwibwamu rume.

⁴⁰Empirima yawe niyo eraakulindaga, oraaheerezaaga owanyoko, baitu obu olirwana okasingura, nubwo olyeihaho ekikoligo ky'obwiru.”

⁴¹Kuruga obu, Esau yanoba Yakobbo habw'omugisa ise ogu akaba amusabiire, yamalirra ati: “Ise nyowe ali haihi kufa, omu busumi obw'okumugaragarra, nubwo ndiita mugenzi wange Yakobbo.”

⁴²Baagambira Rebbeka ebigambo Esau omutabani omukuru ebi yagambire, aho yatuma bamwetere Yakobbo omutabani omuto, obu yaizire yamugambira ati: “Mugenzi wawe naahiika, kandi naategeka kukwita.

⁴³Hati nu mwana wange, ohurre eki ndukukugambira, iruka ogende Harani omba Labbani munyanya-nyowe, omaleyo akasumi

⁴⁴okuhika owanyoko obu alikahoibwaho ekiniga,

⁴⁵akeebwa ebi wamukozire, nubwo ndituma bakutabarre. Habwaki mbafeerwa inywembi izooba limu?”

⁴⁶Nubwo Rebbeka yagambira Isaaka ati: “Ntamirwe muno abakazi banu Abahiiti. Kakuba Yakobbo aswera omukazi Omuhiiti, arukusisana nka banu, omu ha bakazi ab'ensi enu, obu ndiba nkyali wa ki?”