Read Runyoro - rutooro Kub 28 Bible Online

Kub 28 - Runyoro - rutooro bible

Kub 28

¹Aho Isaaka yayeta Yakobbo yamusabira omugisa, yamuteererra ati: “Otalikisura okaswera omukazi Omukanaani.

²Imuka ogende Padanaramu omunju ya Beesweri swenkuru, oku nuho oswere omukazi omu ha bahara ba Labbani nyokoromi.

³Ruhanga ow'obusobozi bwona, akuhe omugisa, akukanyise muno, nukwo orugwemu amahanga maingi.

⁴Akuhe omugisa nk'ogu yahaire Abburahamu kandi aguhe n'abaijukuru bawe, nukwo musobole kutunga ensi enu ei mwasuhuukiiremu, Ruhanga ei yahaire Abburahamu!”

⁵Isaaka nukwo yaragire ati Yakobbo; Yakobbo yagenda Padanaramu omba Labbani mutabani wa Beesweri Omuramini munyanya Rebbeka, nyina Yakobbo na Esau.

⁶Aho Esau yamanya Isaaka nkooku akaba asabiire Yakobbo omugisa kandi amutumire Padanaramu aswereyo omukazi. Kandi yamanya Isaaka obu akaba naasabira Yakobbo omugisa, nkooku yamuteereriire ati: “Otalikisura okaswera omukazi Omukanaani.”

⁷Esau yamanya Yakobbo nkooku ahuliire ebigambo bya ise na nyina, yagenda Padanaramu.

⁸Esau obu yayetegeriize Isaaka ise nkooku atarukugonza abakazi Abakanaani,

⁹yagenda omba Isimairi, yaswerayo omukazi, yamwongera ha bakazi be abandi, ibara ly'omukazi ogu nuwe Maharati muhara wa Isimairi, mutabani w'Abburahamu, munyanya Nebayosi.

¹⁰Yakobbo yaruga Beesiseba yakwata omuhanda ogurukugenda Harani.

¹¹Yahika omu kiikaro ekimu, nambere yaraire ekiro eki, habwokuba izooba likaba ligoroobere. Yakoma ibaale limu yalyesagura, yabyama, yagwijagira.

¹²Yaroota naarora itembero erikaba lisimbire ha itaka, ensonga yalyo erumire iguru; kandi yarora bamalaika ba Ruhanga nibatemba nibatemburuka itembero eri.

¹³Yarora MUKAMA ayemeriire ha itembero eruguru, yagamba ati: “Ninyowe MUKAMA Ruhanga ow'Abburahamu swenkuru kandi Ruhanga owa Isaaka, ensi enu ei obyamireho, ndigikuha kandi ndigiha n'abaijukuru bawe;

¹⁴abaijukuru bawe, balingana ecuucu y'ensi, mulikanya muhike Bugwaizooba, obukiizi bw'emoso n'obw'obulyo; omuli iwe n'omu baijukuru bawe, enganda zoona ez'omunsi, numwo ziriheererwa omugisa.

¹⁵Omanye nkooku ndi hamu na iwe kandi ndaakulindaga h'orakagendaga hoona, ndikugarra omunsi enu, habwokuba tindikurugaho ntakakozire eki nkugambiire.”

¹⁶Aho Yakobbo yasisiimuka, yagamba ati: “Mazima kwo, MUKAMA ali omu kiikaro kinu, eki, mbaire ntakimanyire.”

¹⁷Akatiina kandi yagamba ati: “Ekiikaro kinu, ka nikitiinisa! Ekiikaro kinu, tikiri kindi na kindi, niyo nju ya Ruhanga, kandi gunu nugwo mulyango gw'iguru.”

¹⁸Yakobbo obu yaimukire nyenkya kara, yakwata ibaale eri akaba ayesagwire, yalisimba, yaliseesaho amagita libe kiijukyo.

¹⁹Ekiikaro eki, yakiruka ibara Besweri, ira lyona, orubuga oru rwayetwaga ibara Luuzi.

²⁰Aho Yakobbo yaragaana naagamba ati: “Ruhanga obu araikara na nyowe, akandinda omu rugendo runu oru ndukugendamu, akampa ebyokulya n'ebyokujwara,

²¹nukwo ngaruke n'obusinge omuka ya ise nyowe, obu nubwo MUKAMA aliba Ruhanga wange,

²²kandi ibaale linu eri nsimbire kuba kiijukyo, lirifooka nju ya Ruhanga; kandi ha byona ebi oraampaga, ndaakugarurraga kimu kya ikumi.”