Read Runyoro - rutooro Kub 29 Bible Online

Kub 29 - Runyoro - rutooro bible

Kub 29

¹Aho Yakobbo yayongera orugendo rwe, yahika omunsi ey'abantu aba Burugaizooba.

²Obu yamagamagire, yarora iziba ly'amaizi omu bwerre, kandi yarora amagana asatu ag'entaama gabyamire haihi n'iziba eri; habwokuba, ha iziba eri, amagana nuho baageeserraga. Ha munwa gw'iziba eri, abaliisa baatahoga ibaale erikooto,

³kandi amagana goona obu gaayesoroozaaga, ibaale baliihaho, entaama zaabo obu zaakuukaga baligarraho.

⁴Yakobbo yakaguza abaliisa ati: “Bagenzi bange, nimuruga nkaha?” Baamugarukamu bati: “Nituruga Harani.”

⁵Yabakaguza ati: “Labbani mutabani wa Nahooli, nimumumanya?” Baamugarukamu bati: “Nitumumanya.”

⁶Yabakaguza ati: “Aliyo kurungi?” Nandiki bo bati: “Aliyo kurungi,

⁷kandi omuhara Rakeeri nguli, naija n'entaama.” Yagamba ati: “Obwire ka bukyaikaire, akasumi ak'okwesera amagana tikakahikire, inywe mwesere ezaanyu mugende mwiriise.”

⁸Baamugarukamu bati: “Eki, titurukukisobora, okuhika amagana goona obu garaakasoorrokana, tukaihaho ibaale, obu nubwo turaayesera entaama.”

⁹Obu akaba naakyabaza nabo, Rakeeri yaija n'entaama za ise, habwokuba, nuwe yazirisaaga.

¹⁰Yakobbo obu yarozire Rakeeri muhara wa Labbani nyinarumi n'entaama ze, yagenda yakumbya ibaale, yaliiha ha munwa gw'iziba, yayesera entaama za Labbani nyinarumi.

¹¹Yakobbo yanywegera Rakeeri, yarra habw'okusemererwa.

¹²Aho Yakobbo yayetondera Rakeeri, nkooku anyina obuzaale na ise, kandi nkooku ali mutabani wa Rebbeka, aho Rakeeri yairuka yagambira ise.

¹³Labbani obu baamurangiire Yakobbo omwihwa, yairuka yagenda kumutangirra, yamugwa omunda yamunywegera, yamutwara omuka. Yakobbo yasubirra Labbani ebyabaireho byona,

¹⁴Labbani yamugamba ati: “Mazimakwo, oli mwana wange mali owa harura rwange.” Yakobbo yamara na uwe okwezi kwona.

¹⁵Aho Labbani yakaguza Yakobbo ati: “Habwokuba wange nikyo oraampeerereza otarukutunga musaara, nkuhe musaara ki?”

¹⁶Omu kasumi ako, Labbani akaba anyina abahara babiri, ibara ly'omukuru, nuwe Leeya, kandi ery'omuto, nuwe Rakeeri.

¹⁷Leeya akaba atali murungi ha maiso, baitu Rakeeri akaba ali murungi kandi nyamibwa.

¹⁸Yakobbo yaligira Rakeeri, yagambira Labbani ati: “Ninyija kukuheereza kumara emyaka musanju, nukwo nswere muhara wawe Rakeeri.”

¹⁹Labbani yagamba ati: “Kirungi mmuhe iwe, kukira kumuha omuntu ondi, ikara na nyowe.”

²⁰Aho Yakobbo yaheereza Labbani okumara emyaka musanju, nukwo aswere Rakeeri. Emyaka egi, ekamusisanira ebiro bike, habw'okugonza muno Rakeeri.

²¹Yakobbo yagamba Labbani ati: “Mukazi wange mumpe mugabule, habwokuba akasumi aka twaragaine, kahikire.”

²²Labbani yaraaliza abantu boona ab'omu kiikaro eki, yakora obugenyi.

²³Baitu omu rwiririzi, yasemba omuhara Leeya, nuwe yagabira Yakobbo, Yakobbo yamugabura,

²⁴(Labbani yasagarra muhara we Leeya, yamugabira Omuzaana Ziripa.)

²⁵Nyenkya obu bwakiire, Yakobbo kugenda kurora omukazi ou agabwire, ni Leeya, yakaguza Labbani ati: “Kinu onkozire ki?”

²⁶Labbani yagarukamu ati: “Omwihanga lyaitu kizira kusweza omwana omuto akasiga omukuru.

²⁷Leeya, mara na uwe wiiki emu, Rakeeri na uwe, ndaamukuha, nukwo ogaruke onkorre okumara emyaka endi musanju.”

²⁸Yakobbo, nukwo yakozire, yamara na Leeya sabbiiti emu, hanyuma Labbani yamuha muhara we Rakeeri amuswere.

²⁹(Labbani akasagarra muhara we Rakeeri, omuzaana Biriha.)

³⁰Aho Yakobbo, yagabura Rakeeri, yamugonza muno okukira Leeya, yakorra Labbani emyaka endi musanju.

³¹MUKAMA obu yaboine Leeya nkooku anoberwe, yamuha oruzaaro, baitu Rakeeri, yaba ngumba,

³²Leeya yatwara enda, yazaara omwana omwojo, yamuruka ibara Rubbeni, yagamba ati: “MUKAMA arozire okubonabona kwange, mazimakwo, iba nyowe hati naija kungonza.”

³³Yagaruka yatwara enda, yazaara omwana ondi omwojo, yagamba ati: “MUKAMA amanyire nkooku nnoberwe, nukwo kunyongera omwana ondi.” Yamuruka ibara Simyoni.

³⁴Yatwara enda, yazaara omwana omwojo, yagamba ati: “Hati, nyowe na iba nyowe, nitwija kwikirraniza, habwokuba nakamuzarra abaana aboojo basatu.”

³⁵Yagaruka yatwara enda, yazaara omwana omwojo, yagamba ati: “Hati, ndaahaisaniza MUKAMA.” Nukwo kumuruka ibara Yuda, yabanza yaleekera aho kuzaara.