Read Runyoro - rutooro Kub 3 Bible Online

Kub 3 - Runyoro - rutooro bible

Kub 3

¹Enjoka ekaba eri ncwangya okukira ebihangwa ebindi byona eby'omu kisaka, MUKAMA Ruhanga ebi akaba ahangire. Enjoka yakaguza omukazi: “Mazimakwo Ruhanga akabatanga kulya ebijuma eby'emiti yoona ey'omurugonjo runu?”

²Omukazi yagarukamu enjoka ati: “Ebijuma eby'emiti ey'omurugonjo runu, nitwikirizibwa kubirya;

³baitu Ruhanga akagamba ati: ‘Mutalirya ebijuma eby'omuti ogunyakuli hagati y'orugonjo runu, nobukwakuba kugukwataho kwonka, mutaliija kufa.’ ”

⁴Enjoka yagambira omukazi eti: “Okufa timulifa.

⁵Habwokuba Ruhanga amanyire, obu mulirya ebijuma byagwo, amaiso gaanyu galiiguka, nainywe mulisisana Ruhanga, mumanye oburungi n'obubi!”

⁶Omukazi obu yarozire ebijuma by'omuti nkooku biri birungi kuliibwa, nibisemeza amaiso g'abantu, kandi omuti ogu nigwetaagwa kufoora omuntu w'amagezi, yanoga ha bijuma byagwo yalya, ebimu yahaho iba na uwe yalya.

⁷Aho amaiso gaabo bombi gaiguka, baamanya nkooku bali busa; baabaziira amababi g'omuti omutini, baayekorra eky'okweswekerra.

⁸Omu mabeho ag'orwebagyo omusaija na mukazi we bakahurra MUKAMA Ruhanga naarubata omu rugonjo, baayesereka omu miti ey'omu rugonjo oru, MUKAMA Ruhanga aleke kubarora.

⁹MUKAMA Ruhanga yayeta omusaija, yamukaguza ati: “Oli nkaha?” Omusaija yagarukamu ati:

¹⁰“Mpuliire noorubata omu rugonjo, natiina, habwokuba mbaire ndi busa; nayesereka.”

¹¹Ruhanga yamukaguza ati: “Nooha anyakukugambiire nkooku oli busa? Oliire ebijuma by'omuti ogu nakutangire?”

¹²Omusaija yagarukamu ati: “Omukazi ou wampaire kwikara na nyowe, nuwe ampaire ebijuma by'omuti ogu, nanyowe nalya.”

¹³Aho MUKAMA Ruhanga yakaguza omukazi ati: “Kiki eki, okozire?” Omukazi yagarukamu ati: “Enjoka niyo embiihabiihire, na nyowe nalya.”

¹⁴MUKAMA Ruhanga yagambira enjoka ati: “Habwokuba okozire kinu, okyenerwe kukira ente zoona, n'okukira ebisoro byona eby'omu kisaka; orayekuruzaaga enda kandi ecuucu niyo oralyaga obwomeezi bwawe bwona!

¹⁵Ndaataho obunyanzigwa hagati yaawe n'omukazi, hagati y'oruzaaro rwawe n'orwe; oraarusasanguraga omutwe, kandi rwo ruraakutemaga ekikongoijo.”

¹⁶Ruhanga yagambira omukazi ati: “Omu kuzaara abaana ndakusaalizaaga muno; oraazaaraga noosaalirwa, oraikaraga nooyegomba baro kandi nuwe araakulemaga.”

¹⁷Hanyuma Ruhanga yagambira Adamu ati: “Habwokuba ohuliire ebigambo bya mukazi wawe, walya ebijuma by'omuti ogu, ogu nakutangire, ningamba nti: ‘Otalirya ekijuma kyagwo’; itaka likyenerwe habwawe; ebiro byona eby'obwomeezi bwawe, oraalyaga ebirukulirugamu nootalibana muno;

¹⁸itaka liraakumerezaaga amahwa n'amatojo; kandi oraalyaga ebimera eby'omu kisaka.

¹⁹Oraalyaga ebyokulya omazire kubituutukira okuhika obu oligaruka omu itaka habwokuba niryo waihirwemu; oli cuucu kandi omu cuucu numwo oligaruka.”

²⁰Omusaija yaruka mukazi we ibara Eva, habwokuba nuwe yabaire nyina abantu boona.

²¹MUKAMA Ruhanga yakorra Adamu na Eva ebyokujwara by'empu yabajweka.

²²Aho MUKAMA Ruhanga yagamba ati: “Habwokuba omuntu afookere nk'omu hali itwe, naamanya oburungi n'obubi, kandi hati taikara kunoga ebijuma eby'omuti ogunyakwomeeza akabirya, akoomeera ebiro byona.”

²³Nahabweki MUKAMA Ruhanga yamwiha omu rugonjo rwa Edeni, agende alime itaka eri yaihirwemu.

²⁴Yabingamu omusaija ogu; ha Buturukaizooba obw'orugonjo orw'Edeni, yatayo bakerubbi n'empirima erukumyalikya kulinda omuhanda ogurukugenda ha muti ogunyakwomeeza.