Read Runyoro - rutooro Kub 30 Bible Online

Kub 30 - Runyoro - rutooro bible

Kub 30

¹Rakeeri obu yarozire atazaaliire Yakobbo mwana n'omu, yarwaza owanyina ihali, yagambira Yakobbo ati: “Nzarra abaana, okutuntura kutanyita.”

²Yakobbo yabiihirirwa Rakeeri, yamuhagukira naagamba ati: “Nyowe, nonyeta Ruhanga ayakwimire oruzaaro?”

³Rakeeri yagamba ati: “Omuzaana wange Biriha, ngugwo, temba ekitabu kye, ozaale abaana mbalere, nukwo babe bange.”

⁴Aho, Rakeeri yaha Yakobbo omuzaana we Biriha, Yakobbo yatemba ekitabu kye,

⁵Biriha yatwara enda, yazarra Yakobbo omwana omwojo.

⁶Hanyuma, Rakeeri nukwo kugamba ati: “Ruhanga ancweriiremu, yahurra ebigambo byange, yampa omwana omwojo.” Nukwo kumuruka ibara Daani.

⁷Biriha yatwara enda endi, yazarra Yakobbo omwana ondi omwojo.

⁸Rakeeri yagamba ati: “Ncwire amagezi goona ag'okurwanisa owanyina-nyowe kandi mmusingwire.” Omwana ogu, nukwo kumuruka ibara Nafutaali.

⁹Leeya obu yarozire nkooku alekiire aho kuzaara, na uwe yakwata omuzaana we Ziripa, yamuha Yakobbo amuzarre abaana abandi.

¹⁰Ziripa yazarra Yakobbo omwana omwojo.

¹¹Leeya yagamba ati: “Ka ky'omugisa.” Omwana nikyo yamurukiire ibara Gaadi.

¹²Ziripa yazarra Yakobbo omwana omwojo owa kabiri,

¹³kandi Leeya yagamba ati: “Ka mpiiriirwe! Abakazi baraanyetaga omuhiirwa.” Omwana ogu, yamuruka ibara Aseeri.

¹⁴Omu kasumi ak'igesa ery'engano, Rubbeni akagenda omu kisaka, yasangayo ebidodoima, yabireetera Leeya nyina. Aho Rakeeri yasaba Leeya ati: “Nkwesengeriize, mpaho ebidodoima bya mutabani wawe.”

¹⁵Baitu Leeya yagarukamu ati: “Nooteekereza kintu ky'okuzaana, iwe kunyihaho iba nyowe? Hati nooyenda kutwara n'ebidodoima bya mutabani wange?”

¹⁶Orwebagyo, Yakobbo obu akaba naaruga omu kisaka, Leeya yaimuka yagenda kumutangirra, yamugambira ati: “Kiro kinu, orandaarra, habwokuba nkuguzire, nakuheera ebidodoima bya mutabani wange.” Kiro eki, Yakobbo yaraarra Leeya.

¹⁷Ruhanga akahurra Leeya, yatwara enda, yazarra Yakobbo omwana omwojo owa kataano.

¹⁸Leeya yagamba ati: “Ruhanga ampaire eki naheeriire ebyange, habwokuba, omuzaana wange nkamuha ibanyowe.” Omwana ogu, nukwo kumuruka ibara Isakara.

¹⁹Leeya yayongera yatwara enda, yazarra Yakobbo omwana omwojo owa mukaaga,

²⁰nubwo Leeya yagambire ati: “Ruhanga ampaire ekisembo ekirungi, hati ibanyowe, naija kuntamuga ekitiinisa, habwokuba mmuzaaliire aboojo mukaaga,” ogu yamuruka ibara Zabburuni.

²¹Hanyuma yazaara omwana omwisiki, yamuruka ibara Dina.

²²Aho, Ruhanga yaijuka kandi yahurra okusaba kwa Rakeeri, yamuha oruzaaro,

²³yatwara enda yazaara omwana omwojo, yagamba ati: “Ruhanga anyihireho kugaywa.”

²⁴Omwana ogu, yamuruka ibara Yosefu, naagamba ati: “MUKAMA aba kunyongera akoojo akandi!”

²⁵Rakeeri obu yamazire kuzaara Yosefu, Yakobbo yasaba Labbani ati: “Ndeka ngaruke owaitu nambere narugire,

²⁶mpa bakazi bange n'abaana bange aba nakoleriire, nukwo ngende, habwokuba, noomanya kurungi emirimo ei nakukoliire.”

²⁷Labbani yamugarukamu ati: “Ka mbanze nkugambire ekigambo kimu, ntungire ebintu bingi, kandi Ruhanga ampaire omugisa habwawe.

²⁸Hati, ngambira obu ndaaba nyina eki ntarakusaswire, nkikusasule.”

²⁹Yakobbo yamugarukamu ati: “Na iwe wenka, noomanya nkooku nakukoliire kandi n'amagana gawe nkooku gaayeyongiire kukanya habwange kugalinda kurungi.

³⁰Nambere naiziire, nkakusanga n'amagana make, hati geeyongiire muno muno, kandi omulimo gwona ogu nkozire, Ruhanga agukuheeriiremu omugisa. Obu, nyowe eka yange ndigitegeka di?”

³¹Labbani yamukaguza ati: “Nooyenda nkuhe ki?” Yakobbo yamugarukamu ati: “Tindukwenda kintu kindi, kyonka obu oraikiriza eki ndaakugambira, nubwo ndaikiriza kukukorra nkooku nkabaire ninkukorra,

³²kiro kinu, ka ndabemu igana lyawe lyona, nsoroolemu entaama enkuru zoona, kibuubi, ibamba mpuuga, n'entaama ento zoona ezirukwiragura, n'omu mbuzi, nsoroolemu ez'ebitanga, n'ez'ebigabu, egi niyo ebe mpeera yange.

³³Akasumi ak'okusasura obu kalihika, nubwo olyetegereza obwesigwa bwange. Obu ndisangwa n'embuzi etali kigondo rundi kitanga, rundi entaama erukwiragura, egi eriba ibirwe.”

³⁴Labbani yagarukamu ati: “Ego, eki nukwo kibe nkooku ogambire.”

³⁵Ha kiro eki, Labbani yasoroora omu igana embuzi zoona empaya, n'ebuguma ez'ebigabu, ez'ebitanga, n'ez'ebigondo, yoona eyasangirwe enyina ibara erirukwera, na buli ntaama eyekaba niiragura, yazikwasa abaana be bazirolerre,

³⁶Labbani yatwara amagana ge, yagata omu mwanya ogw'orugendo rw'ebiro bisatu, okuruga ha ga Yakobbo. Yakobbo yaliisa ekicweka eky'igana erya Labbani ekyasigaireho.

³⁷Yakobbo yacwa obutaagi obubisi obw'emiti popule, alimonda na puleni,[4] yabususuura naatamu amagoobe.

³⁸Obuti obu yabusimba kurungi omu micungiro nambere zaazarraga ez'amabara.

³⁹Nahabweki embuzi obuzaliraaga omumaiso g'obuti, zazaraga ez'ebihuuga, ez'ebigondo n'ez'ebitanga.

⁴⁰Yakobbo yasoroora empaya ento ez'amabara, yazita omu igana lya Labbani.

⁴¹Yakobbo obu yaroraga ez'amaani iteegere, nubwo yataga obuti omu micungiro omumaiso gaazo, nukwo ezimu zisobole kwema ziri omumaiso g'obuti, obu haijaga ezitali z'amaani, obuti tiyabutahoga.

⁴²Habweki, enceke zoona zikaba za Labbani, kandi ez'amaani, zaaba za Yakobbo.

⁴³Yakobbo, nukwo yaguudahaire ati, yatunga amagana maingi, abaheereza, abasaija n'abakazi, engamiya n'enkaina.