Read Runyoro - rutooro Kub 31 Bible Online

Kub 31 - Runyoro - rutooro bible

Kub 31

¹Omu kasumi ako, Yakobbo akahurra ngu batabani ba Labbani nibagamba bati: “Yakobbo atwaire ebintu bya Isiitwe byona, hati nibyo bimuguudahaize biti.”

²Yakobbo na uwe yarora Labbani atakyamugonza nka ira.

³Nubwo MUKAMA yagambira Yakobbo ati: “Garuka omunsi eya baaswenkuru, omu bantu ab'oruganda rwawe, ndaikaraga na iwe.”

⁴Aho Yakobbo yatuma beete Rakeeri na Leeya, baije nambere akaba naaliisiza,

⁵yabagambira ati: “Hati, nyowe nindora isiinywe takyangonza nkooku yangonzaaga kara, baitu Ruhanga owa isenyowe tandugireho.

⁶Na inywe nimumanya nkooku nkoliire isiinywe n'amaani gange goona,

⁷noobu ndaaba nakozire nti, isiinywe akangobeza, empeera yange yakagihiingisa emirundi ikumi, baitu Ruhanga atamwikirize kunkora kubi.

⁸Obu yagambaga ati: ‘Entaama ibamba rundi embuzi kitanga niyo ebe mpeera yawe,’ obu igana lyona lizaara ibamba n'ebitanga; kandi obu yagambaga ati: ‘Entaama ibamba rundi embuzi ez'ebigabu niyo ebe mpeera yaawe,’ lizaara ibamba n'ebigabu.

⁹Ruhanga nukwo yaihireho isiinywe ati amagana ge, yagaha nyowe.

¹⁰Omu kasumi igana aka lyayemeramuga, naimukyaga amaiso ndora embuzi empaya ezaatembaga igana, zaabaga ruyenje, rugabu, rutanga na rugondo.

¹¹Aho malaika wa Ruhanga yanyeta ati: ‘Yakobbo,’ namwetebuka nti: ‘MUKAMA wange’.

¹²Yangamba ati: ‘Imukya amaiso orole, empaya zoona ezirukutemba igana, z'ebigabu, ruyenje, rutanga na rugondo, habwokuba nyetegeriize byona Labbani ebi arukukukora.

¹³Ninyowe Ruhanga ayakubonekiire oli Beesweri nambere waseesiireho ibaale amagita kandi wandahira. Hati, imuka oruge omunsi enu ogaruke omunsi ei wazairwemu.’ ”

¹⁴Nubwo Rakeeri na Leeya baamukagwize bati: “Omunju ya isiitwe tukyainamu omugabo rundi obugwetwa?

¹⁵Tarukutusisaniza nk'abanyamahanga? Ngira akatutunda, abaire naayekonyeza sente ezi yatwihiremu.

¹⁶Ebintu byona Ruhanga ebi aihireho isiitwe, bifookere byaitu n'abaana baitu; kyona Ruhanga eki akuragiire okikole.”

¹⁷Aho Yakobbo yaimuka, yatembya ha ngamiya, batabani be na bakazi be.

¹⁸Yafunya ente ze zoona, n'ebitungwa bye byona ebi akaba atungiire Padanaramu, yagenda omunsi Kanaani omba Isaaka ise.

¹⁹Labbani obu akaba agenzire kusara ebyoya by'entaama ze, Rakeeri yaiba ebisisani eby'embandwa za ise.

²⁰Yakobbo yagobeza Labbani, omuramani tiyamumanyisa nkooku amaliriire kumurugaho.

²¹Yairuka n'ebintu bye byona ebi akaba anyinabyo, yayambuka ekisaaru Efuraate, yagenda aroleriire Giryadi ensi ey'ensozi.

²²Ha kiro ekya kasatu, Labbani obu baamugambiire Yakobbo nkooku airukire,

²³yayeta ab'oruganda rwe, yamuhondera, yamara ebiro musanju atakamuhikireho, yagenda namwiriirra, okuhika Giryadi ensi ey'ensozi.

²⁴Baitu omu bwire obw'ekiro, Ruhanga akaroosa Labbani Omwaramani yamugambira ati: “Oyerinde, otagamba Yakobbo ekigambo, noobu kiraaba kirungi rundi kibi.”

²⁵Labbani yahikaho Yakobbo. Omu kasumi ako, Yakobbo akaba atiire eheema omunsi ey'ensozi, Labbani n'ab'oruganda rwe, na uwe yateera orukande rwe Giryadi ensi ey'ensozi.

²⁶Labbani yakaguza Yakobbo ati: “Okakora kintu ki kungobeza okatwara bahara bange n'abaana bange, nk'abahambirwe omu bulemu?

²⁷Kiki ekyakwirukize otamanyirwe, ekyakuleeteriize kungobeza, walema kungambira, nukwo nkakusendekereza n'omuhimbo n'ebizina?

²⁸Kandi kiki otaranyikiriize nkanywegera batabani bange na bahara bange nkabaraga? Okakora eky'obudoma.

²⁹Nsobora kukukora kubi, baitu Ruhanga wa sso angambiirege ekiro ati: ‘Oyerinde, otagamba Yakobbo ekigambo na kimu, noobu kiraaba kirungi rundi kibi.’

³⁰Hati ondugireho wagenda, habwokuba oina ekihika kingi eky'eka ya sso, baitu kiki ekyakwibisize embandwa zange?”

³¹Yakobbo yagarukamu Labbani ati: “Nkatiina, habwokuba nkateekereza nti: Bahara bawe noija kubaanyagaho n'empaka.

³²Omuntu weena ou oraasanga anyina embandwa zaawe, araitwa. Nyoleka ekintu kyawe eki nyinakyo, omumaiso ga batabani baitu banu, hanyuma okitwale.” Baitu Yakobbo akaba atamanyire Rakeeri nkooku aibire embandwa za ise.

³³Aho Labbani yaserra omu heema ya Yakobbo, eya Leeya, n'omu heema ey'abazaana ababiri, baitu embandwa ze tiyazisangamu. Yaruga omu heema eya Leeya, yataaha omu ya Rakeeri.

³⁴Rakeeri ebisisani by'embandwa z'eka ya ise akaba abitaire omu bisago by'engamiya, abiikaliire. Labbani obu yaserwire hoona hoona omu heema, atabisangemu,

³⁵Rakeeri yagambira ise ati: “Mukama wange, oleke kumbiihirirwa habw'okutakwimukira, habwokuba ndi omu ngeso y'abakazi.” Labbani noobu yaserwire, atazoole mbandwa z'eka ye.

³⁶Yakobbo yakwatwa ekiniga, yajumbuutukira Labbani naagamba ati: “Eki nasobeze, kiri nkaha rundi kibi ki eki nakozire, eki wasigikiireho kumpondera?

³⁷Obu otindwire omu bintu byange byona, osangiremu kintu ki? Kite hanu, omumaiso ag'ab'oruganda rwange n'ab'oruganda rwawe, nubo batucweremu.

³⁸Mmazire na iwe emyaka makumi abiri, entaama zawe n'embuzi zawe ebuguma tizikatoroogaga, kandi tinkalyaga ntaama mpaya ey'omu igana lyawe.

³⁹Egi eyaitwaga enyamaiswa, nkaba ntakagikuleeteraga, ninyowe nagirehaga; egi eyabaga ibirwe nyamusana, rundi ekiro wagindehesaaga.

⁴⁰Nukwo naikaire na iwe nti; nyamusana, omusana gwanyokyaga, ekiro obutiti burarra kunyita, mburwa oturo.

⁴¹Emyaka makumi abiri, nkagimara omunju yawe, nkakukorra emirimo okumara emyaka ikumi n'ena, nukwo nswere bahara bawe ababiri, kandi emyaka mukaaga, nkagimara nindiisa amagana gawe, omu kasumi ako koona, empeera yange okagihingisa emirundi ikumi

⁴²kakuba Ruhanga wa isenyowe Abburahamu, Ruhanga, Isaaka ou atiina, ataranyemereho, mananukwo waakubaire ombingire ntaina kantu, Ruhanga akarora omutima gwange, n'omulimo nakukoliire, nikyo akuhaniirege ekiro.”

⁴³Labbani yagarukamu Yakobbo ati: “Abaisiki abo bahara bange, abaana abo bange, amagana ago ag'entaama n'ag'embuzi, gange, na byona ebi orukurora ebi, byange, hati bahara bange rundi abaana baabo aba baazaire mbakole ki?

⁴⁴Iwe na nyowe tukole endagaano, niyo ebe bwakaiso hagati yawe na nyowe.”

⁴⁵Yakobbo yakwata ibaale, yalisimba libe kiijukyo.

⁴⁶Yakobbo yagamba ab'oruganda rwe ati: “Musorooze amabaale.” Baagasorooza, yagatuuma entuumo, baalya ebyokulya baikaliire ha ntuumo ey'amabaale ago.

⁴⁷Entuumo ey'amabaale egi, Labbani yagiruka ibara Yegara-Sahadusa, baitu Yakobbo, uwe yagyeta Galeedi.

⁴⁸Labbani yagamba ati: “Okuruga hati, entuumo ey'amabaale enu, niyo eraabaga bwakaiso bwaitu.” Entuumo ey'amabaale egi, yagyeta Galeedi kandi

⁴⁹ibaale yalyeta Mizipa, habwokuba akagamba ati: “MUKAMA abege mulinzi waitu, obu turaabaga tutali hanu.

⁵⁰Bahara bange obu olibakora kubi, rundi okabongeraho abakazi abandi, hati noobu haraaba hataroho muntu ondi, oijuke MUKAMA nuwe kaiso wawe kandi kaiso wange.”

⁵¹Aho Labbani yagambira Yakobbo ati: “Dora entuumo ey'amabaale enu, n'ibaale linu, ebi nata hagati yaitu.

⁵²Entuumo enu bwakaiso, ibaale, nalyo bwakaiso oburukugumya nkooku otaliguruka entuumo enu, n'ibaale linu erisimbirwe, kandi nanyowe tindibiguruka tukakorangana akabi.”

⁵³Ruhanga ow'Abburahamu, Ruhanga owa Nahooli kandi Ruhanga ogu, Isaaka ise ou yatamuga ekitiinisa,

⁵⁴yatamba ekyonzira ha rusozi oru yayeta ab'oruganda rwe, baalya ebyokulya, baaraara ha rusozi oru.

⁵⁵Nyenkya kara omu rukyakya, Labbani yaimuka, yanywegera abaijukuru n'abahara, yabaha omugisa, yakwata omuhanda, yagaruka owaabo.