Read Runyoro - rutooro Kub 32 Bible Online

Kub 32 - Runyoro - rutooro bible

Kub 32

¹Yakobbo yayongera orugendo rwe, baamalaika ba Ruhanga baamutangaana,

²Yakobbo obu yababoine yagamba ati: “Linu niryo ihe lya Ruhanga,” ekiikaro eki, nukwo kukiruka ibara Mahainaimu.

³Yakobbo yatuma abakwenda bamwebembere bagende hali Esau owanyina, omu kasumi ako, akaba ali omunsi erukwetwa Seiri, ensi ya Edomu,

⁴yabaragira naagamba ati: “Mugende mugambire mukama wange Esau muti: Omwiru wawe Yakobbo naagamba ati: ‘Ntaaha na Labbani okuhika na kasumi kanu,

⁵ntungire ente; enkaina, amagana ag'entaama n'ag'embuzi, abairu n'abazaana; ntumire bakugambire iwe mukama wange, nukwo ongirre embabazi.’ ”

⁶Abakwenda baagaruka hali Yakobbo baamugambira bati: “Mugenzi wawe Esau tukamuhikaho, naija kukutangana, anyina abasaija bikumi bbina.”

⁷Aho Yakobbo yatiina muno kandi yatuntura, abantu aba akaba anyinabo, yababaganizaamu ebihanda bibiri, amagana ag'ente, ag'embuzi, ag'entaama n'ag'engamiya, nago nukwo yagakora,

⁸naateekereza ati: “Kakuba Esau ahikaho ekihanda ekimu akakihwerekereza, ekihanda ekinyakusigaireho kirairuka.”

⁹Yakobbo yasaba naagamba ati: “Ai Ruhanga owa isenyowe Abburahamu, Ruhanga owa isenyowe Isaaka, MUKAMA iwe ayagambire ati: ‘Garuka omunsi y'owanyu, omu bantu ab'oruganda rwawe, ndikukorra ebirungi,’

¹⁰nkaba ntasemeriire naakake kugirirwa embabazi n'ebirungi byona ebi wankoliire, habwokuba nkambuka ekisaaru kinu Yorudaani nyina omwigo gwange gwonka, baitu hati, nyina ebihanda bibiri, ebinyakurumu abantu n'ebintu.

¹¹Nkwesengeriize, njuna ontabule mugenzi wange Esau, habwokuba nimmutiina, taikara kwija akatwita itwena, abaana na banyinabo.

¹²Baitu iwe okagamba oti: ‘Ndikukorra ebirungi, abaijukuru bawe, ndibainganiza omusenyi gw'enyanja ogutasobora kubarwa habw'obwingi bwagwo.’ ”

¹³Ekiro eki yakiraara aho, yakwata ha bintu ebi akaba ainabyo, yaihaho ekisembo eki yahaire owanyina Esau,

¹⁴embuzi ebuguma bikumi bibiri, n'empaya makumi abiri, entaama ebuguma bikumi bibiri, n'empaya makumi abiri,

¹⁵engamiya ezirukwonkya, makumi asatu n'abaana baazo. Ente ezigija, makumi ana, n'enimi, ikumi.

¹⁶Ebintu ebi, yabikwasa abaheereza be buli igana habwalyo lyonka, yagambira abaheereza be ati: “Munyebembere mugende omumaiso, muteho omwanya okuruga ha igana okuhika ha lindi.”

¹⁷Yaragira abakaba beebembiire ati: “Owanyina-nyowe Esau obu araabaitirana akabakaguza ati; ‘Muli bantu b'oha? Nimugenda nkaha? Ebintu ebi mwebembiize by'oha?’

¹⁸Aho, mumugarukemu muti: ‘Binu bintu by'omwiru wawe Yakobbo, eki nikyo kisembo eki akutwekiire, iwe mukama we Esau, kandi na uwe wenka, ali enyuma yaitu naija.’ ”

¹⁹Nukwo yaragiire aba kabiri n'abakasatu, na boona abaafunyaga amagana naagamba ati: “Na inywe mumugambire biri byonyini, bali ebi bamugambiire.

²⁰Kandi mumugambire muti: N'omwiru wawe ali enyuma yaitu naija.” Habwokuba Yakobbo akateekereza ati: “Kimpikiriire kuhumuza Esau, nimbanza kumutwekera ekisembo, hanyuma nukwo ndaamurora; taikara kunganyira.”

²¹Aho Yakobbo yayebembeza ekisembo, kandi uwe kiro eki yaraara omu muhanda.

²²Kiro eki kyonka, yaimukya yatwara abakazi be babiri, abazaana be babiri n'abaana be ikumi n'omu, yayambukira ha mwogo, ibara lyagwo Yaboki.

²³Yabatwara yabambura akasaaru ako, kandi yayambura na byona ebi akaba ainabyo,

²⁴Yakobbo yasigara wenka, haija omusaija, yafukaana na uwe okuhika emamba kusara.

²⁵Omusaija obu yarozire nkooku atarukusobora kunaga Yakobbo, yamukwata ha igufa ly'enyugunyu, nubwo enyugunyu ye yahuguka yaruga omu nteeko yayo.

²⁶Omusaija yagambira Yakobbo ati: “Ndekera ngende, habwokuba obwire buli haihi kukya.” Baitu Yakobbo yamugarukamu ati: “Tindukwija kukulekera otakampaire omugisa.”

²⁷Omusaija yamukaguza ati: “Ibara lyawe niwe oha?” Yakobbo yagarukamu ati: “Ninyowe Yakobbo.”

²⁸Nubwo omusaija yamugambira ati: “Okuruga hati tokyayetwa Yakobbo, baitu oraayetwaga Isirairi, habwokuba ofukaine na Ruhanga, kandi wafukana n'abantu, wasingura.”

²⁹Nubwo Yakobbo yamugamba ati: “Nkwesengeriize, ngambira ibara lyawe.” Omusaija yamukaguza ati: “Kiki eki orukugondeza kumanya ibara lyange?” Aho yamuha omugisa.

³⁰Yakobbo ekiikaro eki, yakiruka ibara Penyeri, naagamba ati: “Turorangaine na Ruhanga amaiso n'amaiso kandi nakira tinafa.”

³¹Ha yarugiire Peneeri, izooba likaba lyakaturuka, akaba naacumbagira, habwokuba enyugunyu ekaba emuli kubi.

³²Nookuhika hati, Abaisirairi, nikyo bataliira munofu ogw'ekibero ogunyakutaaha omu kafumbi, habwokuba omusaija ayafukaine na Yakobbo, akarubata igufa ry'enyugunyu mbere litaahirra.