Read Runyoro - rutooro Kub 33 Bible Online

Kub 33 - Runyoro - rutooro bible

Kub 33

¹Yakobbo obu yaimukize amaiso, yarora Esau naija, aina abasaija bikumi bbina. Aho abaana yababaganizaamu, Leeya yamuha abe na Rakeeri yamuha abe.

²Abazaana n'abaana baabo, yabata omumaiso, yagarraho Leeya n'abaana be, yamalirra na Rakeeri na Yosefu omwana we.

³Uwe wenka yabeebembera, yagenda nainama emirundi musanju, okuhika obu yahikireho owanyina.

⁴Esau yairuka kwitirana Yakobbo, yamugwa omunda yamubumbaatira, yamunywegera, bombi barra.

⁵Esau obu yaimukize amaiso, arozire abakazi n'abaana, yakaguza ati: “Banu aboizire nabo, nibaha?” Yakobbo yagarukamu ati: “Abo nubo baana Ruhanga abayampaire nyowe omwiru wawe, ha bw'embabazi ze.”

⁶Nubwo abazaana n'abaana baabo, bairiire haihi bainama.

⁷Leeya n'abaana be nabo bairra haihi bainama ha kumalirra, Rakeeri na Yosefu bairra haihi, bainama.

⁸Esau yakaguza ati: “Ogenderiire ki kuleeta ekitebe eky'abantu abo boona kunyitirana?” Yakobbo yagarukamu ati: “Ekitebe kinu eki nkireetiire nukwo iwe mukama wange kungirra embabazi.”

⁹Esau yamugarukamu ati: “Mugenzi wange, ebi nyinabyo, nibimmara, ebintu byawe, oikale nabyo.”

¹⁰Yakobbo yamugarukamu ati: “Nangwa, nkwesengeriize, obu oraaba noongirra embabazi, ekirammanyisa nukwo kwikiriza ekisembo eki nkuhaire, habwokuba mazima kwo, okurora amaiso gawe, ninsisana nk'anyakurozire Ruhanga, ontangiriire n'embabazi ezitagambwa.

¹¹Nkwesengeriize, ikiriza ekisembo kinu eki nkuleetiire, habwokuba Ruhanga akangirra embabazi, kandi ntungire ebintu bingi.” Obu yamwesengeriize muno Esau yaikiriza.

¹²Esau yagamba ati: “Tweyongere tugende orugendo rwaitu, nyowe ka nkwebembere.”

¹³Baitu Yakobbo yamugarukamu ati: “Mukama wange omanyire abaana banu nkooku bali bato, amagana ag'ente n'ag'entaama ezirukwonkya, mulimo gwange kugarolerra, amagana ago, kakuba ngarubasa muno, okumara ekiro kimu, nigaija kufa.

¹⁴Mukama wange, iwe yebembera, nyowe nyije mpora mpora n'amagana n'abaana, okuhika obu ndaakusanga omu kiikaro Seiri.”

¹⁵Esau nukwo kumugarukamu ati: “Ka nkusigire abamu ha basaija banu aba nyinabo.” Yakobbo yakaguza ati: “Nimbeetaagira ki? Kyonka eki ndukwenda, nukwo iwe mukama wange kungirra embabazi.”

¹⁶Ha kiro eki, Esau yakwata omuhanda yagaruka Seiri,

¹⁷baitu Yakobbo yagenda Sukosi, yayeyombekera enju, yazitirra ente ze, ekiikaro eki, nikyo kyayetiirwe Sukosi.

¹⁸Yakobbo akaruga Padanaramu, yahika n'obusinge omu rubuga Sekemu, orunyakuli omunsi Kanaani, yateera orusiisira haihi n'orubuga,

¹⁹yagura ekicweka ky'itaka hali abaana ba Hamora, ise Sekemu eki akaba atiireho eheema ye, yakiheera siringi kikumi.

²⁰Oku, yayombekayo itambiro, nkekiijukizo kya Ruhanga, Ruhanga wa Isirairi. [5]