Read Runyoro - rutooro Kub 34 Bible Online

Kub 34 - Runyoro - rutooro bible

Kub 34

¹Dina muhara wa Leeya ou yazairweho Yakobbo, akagenda kubungira abakazi ab'omunsi egi,

²Sekemu mutabani wa Hamora Omuhiivi, omulemi w'ensi egi, obu yamuboine, yamugwera, yamuhamba yamuhemura.

³Omutima gwa Sekemu gwona gwaikara hali Dina muhara wa Yakobbo; yagonza muno omwisiki ogu, yamubalizaaga obugambo oburungi.

⁴Nubwo Sekemu yagambiire ise Hamora ati: “Omwisiki ogu munswererre.”

⁵Omu kasumi ako, Yakobbo akahurra Sekemu nkooku akaba amazire kusiisa omuhara Dina; baitu abatabani bakaba bali omu kisaka, nibaliisa ente, Yakobbo tiyagamba kantu, okuhika obu baagarukire.

⁶Hamora ise Sekemu yaimuka, yagenda kubaza na Yakobbo ha kigambo eki.

⁷Batabani ba Yakobbo obu baakihuliire, baaruga omu kisaka, baataaha omuka; baasaalirwa, baabiihirwa muno, habwokuba Sekemu akaba ahemwire Isirairi, habw'okuhamba muhara wa Yakobbo, ekintu nk'eki, kikaba kitarukuhika kukorwa.

⁸Baitu Hamora yagambira Yakobbo n'abatabani ati: “Mutabani wange Sekemu nagonza muno muhara wanyu, mbeesengeriize, mumumuhe amuswere.

⁹Tuswerrane, mutuhe bahara baanyu, na inywe mutwale abaitu.

¹⁰Mwikale na itwe, ensi enu, ebe yanyu; mugiikalemu, mugisuubuurremu, mugwagwane.”

¹¹Sekemu na uwe, yagambira ise na banyanya omwisiki ati: “Mungirre embabazi, kyona ekimurakancwa, ndaakibaha.

¹²Mucwe enjugano n'ebisembo nkooku murukwenda, ndaabibaha, nyowe eki ndukwenda, kiri kimu kyonka, mumpe omwisiki ogu mmuswere.”

¹³Batabani ba Yakobbo baabiihabiiha Sekemu na Hamora ise habwokuba Sekemu akaba asiisire munyanya-bo Dina.

¹⁴Baabagambira bati: “Ekintu eki, titusobora kukikora, munyanya-itwe kumuha omuntu atasazirwe, habwokuba eki, kiraaba kihemu hali itwe.

¹⁵Nitwija kubaikiriza, kakuba na inywe mwikiriza kusisana na itwe, buli musaija wena omuli inywe obu araasarwa.

¹⁶Obu nubwo turaabaha bahara baitu, na itwe tuswere bahara baanyu, tufooke ihanga limu.

¹⁷Baitu obu mutaikirize eki tugambire, mukasarwa, obu muhara waitu turaamutwara tugende.”

¹⁸Hamora n'omutabani Sekemu, baasiima ebigambo byabo.

¹⁹Omusigazi atabandaale, yakora eki baagambire, habwokuba akaba naagonza muhara wa Yakobbo, kandi omunju ya Sekemu ise, omusigazi ogu, nuwe baakiraga kutamu ekitiinisa.

²⁰Aho, Hamora n'omutabani Sekemu, baagenda ha irembo ery'orubuga rwaabo, baagambira abantu ab'omu rubuga oru bati:

²¹“Abasaija banu, nganjani zaitu, mubaleke baikale omunsi munu, basuuburremu, habwokuba ensi egalihire muno, neebamara; tuswere bahara baabo, na itwe tubahe bahara baitu babaswere.

²²Abantu eki baraasigikiraho kwikiriza kwikara naitwe, tukafooka bantu bamu, kiri kimu kyonka nukwo buli musaija wena omuli itwe kusarwa nka bo oku basazirwe.

²³Ente zaabo, ebintu byabo, n'ebisoro byaabo byona tibyabe byaitu? Kimu kyonka, twikirranize nabo, nibaija kwikara na itwe.”

²⁴Boona abaarugire omu rubuga, baikiriza, baakora Hamora n'omutabani ebi baabagambiire; abasaija boona abaarabire omu irembo ly'orubuga rwe baasarwa.

²⁵Ha kiro ekya kasatu, abantu abaasazirwe obu bakaba batakakizire, ababiri ha batabani ba Yakobbo, Simyoni na Leevi, banyanya Dina, baasomora empirima zaabo, baasesira orubuga, abantu batabeeteekaniriize, baita abasaija boona,

²⁶baita Hamora n'omutabani Sekemu, baiha Dina omunju ya Sekemu, baagenda.

²⁷Batabani ba Yakobbo abandi baahika ha mitumbi, banyaga orubuga, habwokuba Sekemu akaba ahemwire munyanya-bo;

²⁸baatwara amagana gaabo ag'ente n'ag'embuzi, enkaina zaabo, na byona ebikaba biri omu nda y'orubuga n'aheeru yarwo;

²⁹itungo lyabo lyona, abaana baabo abato, na bakazi baabo, byona ebikaba biri omu maju, baabinyaga.

³⁰Aho Yakobbo yagambira Simyoni na Leevi ati: “Mundetiire akabi, mwannobesa abasi b'ensi Abanyakanaani, Abaperezi, itwe tuli bake, kakuba beesorooza bakaseesa kundwanisa, nibaija kumpwerekereza, nyowe n'ab'omuka yange boona.”

³¹Baitu bo baamugamba bati: “Kikahika Sekemu, kusisaniza munyanya-itwe nka malaaya?”