Read Runyoro - rutooro Kub 35 Bible Online

Kub 35 - Runyoro - rutooro bible

Kub 35

¹Ruhanga yagambira Yakobbo ati: “Imuka ogende Bbeseri, oikaleyo, oyombekereyo Ruhanga itambiro, ayakubonekiire obuwairukire mugenzi wawe Esau.”

²Nubwo Yakobbo yagambira eka ye, n'abantu boona aba akaba anyinabo ati: “Muleke embandwa ez'abanyamahanga abamwikara nabo mweyeze, muhingise ebijwaro byanyu,

³nubwo twimuke tugende Bbeseri nyombekereyo Ruhanga itambiro, ayankoonyiire yanyiha omu muhito kandi ayaikaire na nyowe, hoona nambere nagendaga.”

⁴Kandi baaha Yakobbo embandwa ezi boona abanyamahanga bakaba banyinazo, n'empeta ezi baajwaraga ha matu gaabo, yazisereka hansi y'omuti omweramaino ogukaba guli haihi n'ekiikaro Sekemu.

⁵Obu bakaba nibagenda, abantu ab'omu mbuga ezikaba zibeehinguliriize, Ruhanga yabaleetera obutiini, nahabweki, tibaasobora kuhondera batabani ba Yakobbo.

⁶Yakobbo n'aba akaba anyinabo, baahika Luuzi, (niyo Bbeseri), enyakuli omunsi Kanaani.

⁷Yakobbo yayombeka itambiro, ekiikaro eki, yakiruka ibara Bbeseri, habwokuba, aho nuho Ruhanga yamweyolekiire, obu akaba nairuka mugenzi we Esau.

⁸Debora ayalezire Rebbeka, yafa, baamuziika ifo ya Bbeseri harubaju rw'omuti omusisa, ekiikaro eki, nikyo kyayetiirwe Alloni-bakusi amakuru gaakyo omuti.

⁹Yakobbo obu akaba naaruga Padanaramu, Ruhanga akongera yamubonekera kandi yamuha omugisa

¹⁰naagamba ati: “Obaire nooyetwa Yakobbo, okuruga hati, tokyayongera kwetwa Yakobbo, baitu orayetwaga Isirairi.”

¹¹Ibara Isirairi nubwo lyatandikire, Ruhanga yamugambira ati: “Ninyowe Ruhanga ow'obusobozi bwona, zaara okanye ofooke ihanga, orugwemu amahanga agandi maingi, kandi ozaale n'abakama.

¹²Ensi ei nahaire Abburahamu na Isaaka, ndigikuha kandi ndigiha n'abaijukuru bawe.”

¹³Ruhanga yarugaho yagenda,

¹⁴Yakobbo yasimba enyomyo ey'ibaale omu kiikaro nambere Ruhanga yabaliize na uwe, yaliseesaho amagita kandi yalihongeraho ekihongwa eky'okunywa,

¹⁵ekiikaro eki nikyo yakirukiire ibara Bbeseri.

¹⁶Nubwo baimukya baaruga Bbeseri, obu bakaba bali haihi okuhika Efuraate, Rakeeri yatandika kurumwa, kandi yahangirirwa.

¹⁷Obu akaba akyahangiriirwe, omuzaalisa yamugambira ati: “Leka kutiina habwokuba na hati noija kuzaara omwana omwojo.”

¹⁸Rakeeri obu akaba ali haihi kucwekana, yaruka omwana we ibara Benoni, baitu ise omwana, yamuruka Benyamiini.

¹⁹Rakeeri nukwo yafiire ati, yaziikwa ha muhanda ogurukutwara Efuraate (niyo Beterehemu)

²⁰ha kituuro kye, Yakobbo yasimbaho ibaale, libe kiijukyo, enyomyo egi ey'ekiijukyo ekiri ha kituuro kya Rakeeri, okuhika na hati.

²¹Isirairi yayongera kugenda omumaiso, yateera eheema ye busi bwa nseeri obw'omunaara ogwa Ederi,

²²Isirairi obu akaba akyali omunsi egi, omutabani Rubbeni yagenda yabyama n'omuzaana wa ise ibara lye Beriha, eki Isirairi yakimanya. Abaana boona Yakobbo aba yazaire, bakahika ikumi na babiri.

²³Ganu nugo mabara g'abaana aba yazaireho Leeya: Rubbeni (nugwo omuzigaijo gwa Yakobbo), Simyoni, Leevi, Yuda, Isakara, na Zebburuni.

²⁴Amabara ag'abaana aba yazaireho Rakeeri nugo ganu: Yosefu na Benyamiini.

²⁵Amabara aga batabani ba Biriha omuzaana wa Rakeeri nugo ganu: Daani na Nafutaali,

²⁶aga batabani ba Ziripa omuzaana wa Leeya, nugo ganu: Gaadi na Aseeri. Ago nugo mabara g'abatabani ba Yakobbo, abayazaaliire Padanaramu.

²⁷Yakobbo yahikaho Isaaka ise, yamusanga omu kiikaro Mamule, ekinyakuli haihi na Kirya-araba (niyo Hebburoni), Abburahamu na Isaaka ha baikaraga.

²⁸Isaaka akoomeera emyaka kikumi n'ekinaana,

²⁹yafa agurusire kandi ahwisire muno, yakurata abaabo, abatabani Esau na Yakobbo baamuziika.