Read Runyoro - rutooro Kub 37 Bible Online

Kub 37 - Runyoro - rutooro bible

Kub 37

¹Yakobbo akaikara omunsi Kanaani, ise Isaaka ei akaba asuuhuukiiremu.

²Binu, nibyo ebyabaireho abaana ba Yakobbo. Yosefu obu yahikize emyaka ikumi na musanju ey'obukuru, yaliisaaga amagana g'entaama na bagenzi be, akaba ali musigazi ayaikaraga na batabani ba Biriha na Ziripa, baka ise, kiro kimu, Yosefu akalega bagenzi be hali isebo, ebi yahuliire abantu nibababazaaho kubi.

³Isirairi yagonzaga muno Yosefu, okumukiza abaana be abandi boona, habwokuba nuwe mwana we ow'obugurusi, akamubaziriirra ekanzu.

⁴Baitu bagenzi be, obu baarozire isebo nkooku arukumugonza kumukiza bo boona, baamunoba, tibaasobora kwongera kubaza na uwe kurungi.

⁵Kiro kimu Yosefu akaroota ekirooto, obu yakirootoroire bagenzi be, bakeeyongerra kimu kumunoba.

⁶Akagamba ati: “Muhurre ekirooto eki ndosirege:

⁷Tubaire omu musiri nituboha ebiba by'engano, eky'amahano, ekiba ekyange kyaimuka, kyayemerra busimba, kandi ebiba ebyanyu byaimuka byakyehinguliriza, byakiinamira.”

⁸Bagenzi be baamukaguza bati: “Nooteekereza, oliba mukama otuleme?” Nahabweki, baayeyongerra kimu kumunoba okukiraho, habw'ebirooto bye n'ebigambo bye.

⁹Hanyuma, yagaruka yaroota ekirooto ekindi, nakyo yakirootorra bagenzi be ati: “Nyongiirege naroota, izooba, okwezi n'enyunyuuzi ikumi n'emu, bibaire nibinyinamira.”

¹⁰Baitu obu yakirotoroire ise na bagenzi be, ise yaculeera naagamba ati: “Eki oroosire kirooto kya mulingo ki?”

¹¹Bagenzi be baamukwatirwa ihali, baitu ise yaikara nayecumitiriza ebigambo ebi.

¹²Kiro kimu, bagenzi ba Yosefu bakagenda kuliisa igana lya isebo, omunsi Sekemu,

¹³Isirairi yayeta Yosefu yamugambira ati: “Bagenzi bawe nibaliisiza Sekemu, oyeteekanize nkutumeyo.” Yosefu yagarukamu Isirairi ati: “Ego taata.”

¹⁴Ise yamugambira ati: “Genda orole bagenzi bawe nkooku bali n'igana nkooku liri, oije ommanyise.” Yamutuma Yosefu, yaruga omu kyeya ekya Hebburoni, yagenda Sekemu.

¹⁵Omusaija yaitirana Yosefu ahabiire omu bwerre, yamukaguza ati: “Nooserra ki?” Yosefu yamugarukamu ati:

¹⁶“Ninserra bagenzi bange, nkwesengeriize, ngambira nambere barukuliisiza igana.”

¹⁷Omusaija yagamba ati: “Hanu, bakarugaho, habwokuba nkabahurra nibagamba bati: ‘Tugende Dosani.’ ” Nubwo Yosefu yahondera bagenzi be yabasanga Dosani.

¹⁸Obu baamuroliire hara atakabahikire haihi, baategeka kumwita.

¹⁹Baagambirangana bati: “Kalibirooto, ngugwo aizire.

²⁰Hati, kanu nuko akasumi tumwite, tumunage omu kiina, hanyuma tuligamba tuti: ‘Akaliibwa enyamaiswa.’ Tulirora ebirooto bye eki birimugasira.”

²¹Baitu Rubbeni obu yahuliire eki, yagonza kumutabura, amubaihe omu mikono, yagamba ati: “Tuleke kumwita.”

²²Yabagambira ati: “Mutakisura kuseesa esagama ye, mumunage omu kiina kinu ekinyakuli omwirungu, baitu mutamukoraho kabi koona ha mubiri gwe.” Ekyamugambisize eki, akagenderra kumukiza amugarurre ise.

²³Yosefu obu yahikireho bagenzi be, baamukwata baamujuuramu ekanzu ye ei akaba ajwaire,

²⁴baamutwara baamunaga omu kiina. Ekiina eki, kikaba kyomere, kitarumu maizi.

²⁵Aho baikarra kulya, obu baimukire, baarora omusorongo gw'Abaisimairi, nibaruga Giriadi, banyina engamiya ezeetwekere obubbani, ebirukuboya, n'omugaju, bali omu muhanda gwabo, nibabitwara Misiri.

²⁶Yuda nubwo yakagwize bagenzi be ati: “Kiraatugasira ki kwita mugenzi waitu, tukasereka nkooku tumwisire?

²⁷Haakire, tumuguze Abaisimairi, tuleke kumukoraho akabi, habwokuba, mugenzi waitu nukwo tuzaarwa kandi w'esagama yaitu mali.”

²⁸Bagenzi be baikiriza eki yabagambiire. Abamidiani abasuubuzi obu bakaba nibarabaho, bagenzi ba Yosefu, baamwiha omu kiina, baamuguza Abaisimairi, ebicweka by'efeeza makumi abiri, Abaisimairi baatwara Yosefu Misiri.

²⁹Rubbeni obu yagarukire ha kiina, alingwiize, arozire Yosefu atarumu, yatemura engoye ze,

³⁰yagaruka hali bagenzi be yagamba ati: “Omwana omu kiina, k'atarumu, kandi nyowe ndaagya ha?”

³¹Aho, baita embuzi, baakwata ekanzu ya Yosefu, baagiibika omu sagama,

³²ekanzu egi baagitwekera isebo nibagamba bati: “Tukomere ekanzu enu, ngigyo ogirole, obu eraaba eri kanzu y'omwana wawe, rundi teri niyo.”

³³Yakobbo obu yagimanyiriire yagamba ati: “Ekanzu enu, mali y'omwana wange, enyamaiswa ekamulya. Eki tikiri ky'okugurukyagurukya, Yosefu akaliibwa enyamaiswa.”

³⁴Aho yatemura ebyokujwara bye, yayekindikira ebitengo, yamara ebiro bingi naalirirra omwana we.

³⁵Abatabani n'abahara boona baalengaho kumuhuumuza, baitu yalema kuhuumuzibwa, yagamba ati: “Nangwa, ndirindwa nsirimuke Nyabuyonga nindirirra omwana wange.” Ise nukwo yamuliririire ati.

³⁶Omu kasumi ako Abamidiani bakaba bamazire kutunda Yosefu omunsi ya Misiri, aguzirwe Potifa mukuru w'abalinzi ba Faraaho.