Read Runyoro - rutooro Kub 38 Bible Online

Kub 38 - Runyoro - rutooro bible

Kub 38

¹Omu kasumi ako, Yuda akaahukana na bagenzi be, yagenda ha bukiizi bw'obulyo, yateera eheema ye, yaikara n'Omw'Aduramu, ibara lye Hiira.

²Oku, Yuda nuho yaroliire omwisiki, ibara lye Hiira. Muhara w'Omukanaani, yamuswera,

³omwisiki yatwara enda yazaara omwana omwojo, yamuruka ibara Eri.

⁴Yatwara enda endi, nabwo yazaara omwojo, yamuruka ibara Onani.

⁵Kandi yayongera yazaara omwojo, yamuruka ibara Sera. Hiira kuzaara omwana ogu, bakaba bali Kezibu.

⁶Yuda yaswererra Eri, mutabani we omuzigaijo, omukazi ou yamuswereriire, ibara lye nuwe Tamara.

⁷Baitu Eri omuzigaijo gwa Yuda yabiihizaga muno MUKAMA, MUKAMA nukwo kumwita.

⁸Aho, Yuda yagambira omutabani Onani ati: “Nosemerra kuteerana na muka mugenzi wawe, ozarre mugenzi wawe abaana.”

⁹Baitu Onani yamanya nkooku abaana batarukwija kuba be, buli kasumi obu yateeranaga na uwe, amaizi yagataga hansi, aleke kuzarra mugenzi we abaana.

¹⁰Eki yakoraga, kikabiihiza MUKAMA, na uwe nukwo kumwita.

¹¹Hanyuma Yuda yagambira Tamara muka mwana we ati: “Garuka owanyu, omunju ya sso, oikale oli mufaakati, okuhika Sera mutabani wange obu alikakura.” Habwokuba Yuda akatiina naateekereza ati: Omwana ogu, na uwe naija kufa nka bagenzi be. Nubwo Tamara yagenda yaikara omunju ya ise.

¹²Obu haahingwireho akasumi, muka Yuda muhara wa Suha yafa, Yuda obu yarugire omu kiinamirro, yagenda Timuna omu bantu abaasaarraga entaama ze ebyoya, akagenda na munywani we Hiira Omwaduramu.

¹³Tamara obu baamugambiire bati: “Sozaara naagenda Timuna, kusaza entaama ze ebyoya,”

¹⁴yajuura ebijwaro eby'obufaakati, yayotera, yayeswekerra orugoye ha mutwe, yaikarra ha irembo ly'orubuga Enaimu, orunyakuli ha muhanda ogunyakutwara Timuna habwokuba akamanya Sera nkooku akuzire kandi nkooku batamumuhaire kumuswera.

¹⁵Yuda obu yamurozire, yamweta malaaya, habwokuba akaba ayeswekeriire ha maiso.

¹⁶Yamwirirra ha ruguudo rubaju nambere akaba aikaliire, yamugamba ati: “Ningonza kubyama na iwe,” habwokuba Yuda atamanye omukazi ogu nkooku ali muka mwana we. Omukazi yamukaguza ati: “Kubyama na nyowe, oraampa ki?”

¹⁷Yuda yamugarukamu ati: “Omu igana lyange, ndaihamu embuzi ngikuhe.” Omukazi yagarukamu ati: “Nyikiriize, kyonka noija kumpa omusimbo ogu ndaikara nagwo, okuhika obu oraakagitweka.”

¹⁸Yuda yakaguza omukazi ati: “Nkusimbire ki?” Omukazi yagarukamu ati: “Empeta enyakuroho emanyikirizo yawe, omuyondo gwawe, n'omwigo ogu okwasire.” Ebintu ebi yabimuha, hanyuma yabyama na uwe. Omukazi yatwara enda.

¹⁹Omukazi yaimuka, yayesukura orugoye oru akaba ayeswekeriire, yagaruka yajwara engoye ze ez'obufaakati.

²⁰Yuda obu yahaire munywani we Omwaduramu embuzi kugitwarra omukazi nukwo aiheyo ebintu ebi yasimbireyo, kitumwa, omukazi atamusangeho.

²¹Yakaguza abantu ab'omu kiikaro eki ati: “Malaaya akaba aikaliire ha muhanda rubaju, ali nkaha?” Baamugarukamu bati: “Hanu tihakabahoga malaaya.”

²²Nubwo omukwenda yagaruka hali Yuda yamugambira ati: “Omukazi timmusangireho, kandi n'abantu ab'omu kiikaro eki, bangambiire ngu hali tihakabahoga malaaya.”

²³Yuda yagamba ati: “Omukazi, ebintu kaikarre kimu nabyo, abantu bataija kumanya bakatusekeereza, embuzi ngitwekere, baitu tiwamusangaho.”

²⁴Obu haahingwireho ameezi nk'asatu, abantu baagambira Yuda bati: “Tamara muka mwana wawe, akafooka malaaya, kandi n'omu bwa malaaya omu atwaliiremu enda.” Yuda yagamba ati: “Mumuleete hanu bamwokye afe.”

²⁵Obu bakaba nibamuleeta, yatumaho isezaara naamumanyisa ati: “Omusaija mukama w'ebintu binu, nuwe yantwekere.” Yayongera yagamba ati: “Nkwesengeriize, oyetegereze mukama w'empeta enyakuroho emanyikirizo enu, omuyondo n'omwigo gunu.”

²⁶Yuda yaikiriza ebintu ebi nkooku biri bye, kandi yagamba ati: “Omukazi onu ahikiriire, habwokuba ntamuhe mutabani wange Sera kumuswera.” Okuruga obu, atongere kubyama na uwe.

²⁷Akasumi ke ak'okuzaara obu kaahikire, omunda ye, hasangwamu abarongo.

²⁸Omu kasumi ak'okuzaara, omu hali bo, yaturukya omukono, omuzaalisa yakwata akahuuzo akarukunanata, yakamuboha ha mukono naagamba ati: “Onu nuwe abandize kuzaarwa.”

²⁹Baitu ogu, obu akaba naagarra omukono munda, mugenzi we yaturuka, omuzaalisa yagamba ati: “Iwe wahagura ota kubanza kuturuka?” Nukwo kumuruka ibara Pereezi.

³⁰Hanyuma, mugenzi we yaturuka, anyina akahuuzo akarukunanata, baamuruka ibara Zera.