Read Runyoro - rutooro Kub 39 Bible Online

Kub 39 - Runyoro - rutooro bible

Kub 39

¹Yosefu obu yatwairwe Misiri, omunyoro wa Faraaho omukuru w'abalinzi Omunyamisiri, yamugura hali Abaisimairi, abakaba bamutwaireyo.

²MUKAMA yaikaraga na Yosefu, yaba muntu w'omugisa, yaikara omunju ya mukama we Omunyamisiri.

³Mukama we akarora MUKAMA nkooku akaba ali na Yosefu kandi byona ebi yakoraga nkooku yabihaga omugisa.

⁴Yosefu nukwo kuganja hali mukama we, nukwo kumufoora muheereza we, yamuha obukuru obw'okurolerra enju ye na byona ebi akaba ainabyo.

⁵Okuruga obu yamuhaire obukuru obw'okurolerra ebintu bye byona, enju y'omunyoro ogu Omunyamisiri MUKAMA yagiha omugisa habwa Yosefu, omugisa gwa MUKAMA gwahika ha bintu bye byona ebi akaba anyinabyo.

⁶Potifa, byona ebi akaba anyinabyo, nukwo kubikwasa Yosefu. Akasumi koona aka yamazire na uwe, Potifa tiyafahoga kintu kyona kwihaho kulya kwonka. Yosefu akaba ali murungi kandi nyamibwa.

⁷Obu haahingwireho ebiro, muka mukama we yamurora n'amaiso agarukumuligira, yamugamba ati: “Ija tubyame hamu.”

⁸Baitu Yosefu yayanga, yamugarukamu ati: “Mahano! Kuruga mukama wange antunga, omunju ye munu, tagira eki atunturra, byona ebi anyinabyo akabinkwasa,

⁹omunju munu, akampa obusobozi bwona, busaho na kimu eki yanyimire okwihaho iwe wenka, habwokuba oli mukazi we. Nsobora nta kukora ekibi ekikooto nk'eki nkabiihiza Ruhanga?”

¹⁰Omukazi ogu noobwakubaire buli kiro yaikaraga nasoonasoona Yosefu, baitu uwe atagonze kumuhuliriza, kubyama na uwe, rundi kwikara na uwe.

¹¹Baitu kiro kimu, Yosefu obu yataahire omunju kukora omulimo gwe, omunju hatarumu muntu ondi n'omu,

¹²omukazi yakwata ekijwaro kya Yosefu yagamba ati: “Hati noobyama na nyowe.” Baitu Yosefu yamwirukaho, yamusiga akwasire omwegereko gwe, yairuka yaturuka aheeru.

¹³Omukazi obu yarozire Yosefu amusigiire omwegereko, kandi airukire yaruga omunju,

¹⁴yayeta abasaija abaikaraga omuka yabagambira ati: “Murole, iba yowe akatuleetera Omuhebburaayo ow'okutuhemura, antaahiriire, naayenda kubyama na nyowe, nateera enduuru, nayesaalinga.

¹⁵Obu arozire nayesaalinga nateera enduuru, nukwo kwiruka akansigira omwegereko gwe, yairuka yaruga omunju.”

¹⁶Aho omwegereko gwa Yosefu, omukazi ogu akagwahura aho nambere akaba ali, okuhika mukama wa Yosefu agarukire omuka,

¹⁷yamugambira ebigambo nk'ebi yagambiire abasaija ati: “Omuhebburaayo ou waleesire, antaahiriire yaija kumpamba,

¹⁸baitu obu natoka nayesaalinga, nukwo kunsingira omwegereko gwe gunu, yairuka yaruga omunju.”

¹⁹Mukama wa Yosefu obu yahuliire ebigambo mukazi we ebi yamugambiire ati: “Ebi nibyo omuheereza wawe ankozire,” Ekiniga kyayenda kumwita,

²⁰nukwo kukwata Yosefu kumuta omu nkomo, nambere haakwatirwaga abanyankomo b'omukama.

²¹Baitu MUKAMA yaikaraga na Yosefu, yamugirra embabazi ezitagambwa, yamuha kugonzibwa mukuru w'enju y'enkomo egi

²²Omulinzi w'enkomo, nukwo kukwasa Yosefu abanyankomo boona abakaba bali omunju y'enkomo abarolerre, kyona ekyakorwaga oku, nuwe kyakaguzibwaga.

²³Mukuru w'enkomo, tiyagaruka kutunturra kintu na kimu, Yosefu eki yakwasiibwe kurolerra, habw'okuba MUKAMA yaikaraga na uwe, kandi kyona eki yakoraga MUKAMA yakihaga omugisa.