Read Runyoro - rutooro Kub 4 Bible Online

Kub 4 - Runyoro - rutooro bible

Kub 4

¹Adamu yaterana na mukazi we Eva, Eva yatwara enda, yazaara Kaini, yagamba ati: “MUKAMA ankoonyiire nazaara omusaija.”

²Yamukurasa omwojo ondi Abberi. Abberi akaba ali muliisa w'entaama, kandi Kaini akaba ali mulimi.

³Obu haahingwire akasumi, Kaini yahembera MUKAMA ebijuma by'itaka eri yalimaga,

⁴kandi Abberi yahemba emizigaijo ey'igana lye, yagihonga n'ebisajwa byayo. MUKAMA yasiima Abberi n'ebi yahembere,

⁵baitu atasiime Kaini n'ebi yahembere. Eki kikabiihiza muno Kaini, amaiso ge gaananata.

⁶MUKAMA yakaguza Kaini ati: “Kiki ekikubiihiize n'amaiso kukunanata gati?

⁷Kakuba okora kurungi, toosimwe? Kandi kakuba okora ekitali kirungi, obubi bukutegere ha mulyango bukugwere, baitu osemeriire obusingule.”

⁸Kaini yagambira Abberi owanyina ati: “Ija tugendeho omu kisaka twemaramale.” Obu bakaba bali oku, Kaini yagwera owanyina yamwita.

⁹Aho MUKAMA yakaguza Kaini ati: “Abberi owanyoko ali nkaha?” Kaini yagarukamu ati: “Tindukumanya; ninyowe mulinzi w'Owanyina nyowe?”

¹⁰MUKAMA yakaguza ati: “Okozire ki? Hurra, esagama y'owanyoko enyakusesekere omu itaka nenyamirra.

¹¹Hati orakyenwa, ogoromorwe, oruge omunsi enyakwesamire yanywa esagama y'owanyoko ei oseesire.

¹²Obu oraalimaga itaka, tiryakwerezeege byokulya; oraabaga nsuuhuuki kandi njeezijeezi.”

¹³Kaini yagamba MUKAMA ati: “Ekifubiro kyange kikooto muno, tinsobora kukyemera.

¹⁴Dora, hati wambinga omunsi enu, ninyija kwesereka nduge omumaiso gawe; omunsi, ndaabaga nsuuhuuki kandi njezijeezi, wena alindora alinyita.”

¹⁵Aho MUKAMA yagamba Kaini ati: “Nangwa, tikiri nikyo; obu halibaho omuntu aliita Kaini alihoorwa enzigu emirundi musanju.” MUKAMA yataho Kaini akarorwaho akarukumanyisa ngu wena araamutangaanaga aleke kumwita.

¹⁶Nubwo Kaini yarugire omumaiso ga MUKAMA yagenda, yaikara omunsi erukwetwa Noodi, Buturukaizooba bw'Edeni.

¹⁷Kaini yateerana na mukazi we, omukazi yatwara enda yazaara Enoka, yayombeka orubuga, orubuga oru, yaruruka ibara ly'omutabani Enoka.

¹⁸Enoka yazaara Iradi; Iradi nuwe ise Mekuyairi, Mekuyairi nuwe ise Metusaheeri, Metusaheeri yazaara Lameki.

¹⁹Lameki akaswera abakazi babiri; ibara ly'omukazi omu nuwe Ada, ery'ondi nuwe Ziira.

²⁰Ada akazaara Yabali, nuwe isenkuru abo abaraara omu heema, abahuma.

²¹Ibara ly'owanyina nuwe Yubali; ogu nuwe isenkuru abo abateera enanga n'endere.

²²Ziira akazaara Tubali-Kaini; ogu nuwe muheesi w'ebyoma eby'emiringa ebinyakugamba. Munyanya Tubali-Kaini, ibara lye nuwe Naama.

²³Lameki yagambira bakazi be ati: “Inywe bakazi ba Lameki: Ada na Ziira mumpulirize, muhurre eki ndukugamba; Nyisire omuntu ha bw'okumputaaza, nyisire omusigazi ha bw'okunteera.

²⁴Kaini obu araaba naahoolerwa emirundi musanju, Lameki asemeriire ahoolerwe emirundi nsanju na musanju.”

²⁵Adamu yagaruka yaterana na mukazi we, omukazi yazaara omwana omwojo, yamuruka ibara Seesi, habwokuba akagira ati: “Ruhanga ansumbusize omwana ondi ow'okugaruka omu kiikaro ky'Abberi Kaini ou yaisire.”

²⁶Seesi na uwe akazaara omwana omwojo, yamuruka ibara Enosi. Omu kasumi ako, abantu nuho baatandikiire kuramya MUKAMA.