Read Runyoro - rutooro Kub 40 Bible Online

Kub 40 - Runyoro - rutooro bible

Kub 40

¹Ebi obu byahoire, omuheereza w'embonekyo hamu n'omwokya ab'omukama wa Misiri, bakasobeza mukama wabo.

²Faraaho yabiihirirwa abaheereza abo ababiri:

³yabakwata yabata omunju y'enkomo nambere Yosefu akaba akwatiirwe.

⁴Mukama w'enkomo yabakwasa Yosefu abarolerre, na uwe nukwo yakozire, baamara akasumi omunju y'enkomo.

⁵Kiro kimu omu bwire bw'ekiro, bombi bakaroota, omuheereza w'embonekyo n'omwokya abakaba bakwasirwe omunju y'enkomo, buli omu yarootorra ekirooto kye, kandi buli kirooto kikaba kinyina amakuru gakyo.

⁶Yosefu obu yabahikireho nyenkya, yarora nkooku batuntwire.

⁷Aho yakaguza abaheereza ba Faraaho aba akaba akwasirwe nabo omunju y'enkomo ei yaraaramuga, naagamba ati: “Kiro kinu, ka nimuzooka mwine obujune,”

⁸baamugarukamu bati: “Turoosire ebirooto baitu tubuzirwe araturootorra amakuru gabyo.” Yosefu yabagamba ati; “Okusoborra amakuru g'ebirooto, kuruga hali Ruhanga.”

⁹Aho omuheereza w'embonekyo yarootorra Yosefu ekirooto kye naagamba ati: “Omu kirooto kyange, ndozirege omuti omuzaabbibbu gundi omumaiso,

¹⁰omuzaabbibbu ogu gubaire gwina amataagi asatu, ahonaaho obu gusumikirege, gwayakya gwayana ebijuma, ebijuma byayenga.

¹¹Mbaire nkwasire embonekyo y'omukama Faraaho, nanoga emizaabbibbu. Nagimigira omu mbonekyo ya Faraaho, nagimuheereza.”

¹²Nubwo Yosefu yamusoboroire ati: “Amakuru ag'ekirooto eki, nugo ganu: amataagi asatu, nigamanyisa ebiro bisatu,

¹³ebiro bisatu bitakahoireho, Faraaho naija kukwiha omu nkomo akugarre ha mulimo gwawe, olyongera oheereze Faraaho embonekyo ye nkooku wakoraga kara, obu okaba oli muheereza we.

¹⁴Baitu ebyawe obu biriba kurungi onyijuke kandi ongirre embabazi, ontonganirre hali Faraaho, nukwo na nyowe nduge omunju y'enkomo.

¹⁵Habwokuba nkanyagwa naihwa omunsi ey'Abahebburaayo, kandi tinyina musango ogu ncwire ogw'okuntaisa mu nkomo.”

¹⁶Mukuru w'abookya, obu yarozire Yosefu nkooku asoboroire kurungi amakuru ag'ekirooto kya mugenzi we, yamugambira ati: Na nyowe ndoosirege: “Nyetwekere ha mutwe ebigega bisatu ebinyakurumu emigaati.

¹⁷Omu kigega ekya haruguru, habaire harumu ebyokulya ebya buli mulingo ebinyakucumbiirwe Faraaho, baitu enyonyi zibaire nizibinsomera ha mutwe.”

¹⁸Yosefu yamugamba ati: “Amakuru ag'ekirooto eki nugo ganu: Ebigega bisatu, nibimanyisa ebiro bisatu,

¹⁹ebiro bisatu bitakahingwireho, Faraaho naija kukwiha omu nkomo, akucweho omutwe kandi akuhanike ha muti, amahungu gakusome.”

²⁰Ekiro ekya kasatu, ekikaba kiri kiro eky'okwijuka okuzaarwa kwa Faraaho, Faraaho akainura abaheereza be boona yaiha omu nkomo omuheereza w'embonekyo omukuru n'omwokya omukuru, abantu boona babarole.

²¹Omuheereza w'embonekyo omukuru, yamugarra ha mulimo gwe, kandi yaheereza Faraaho embonekyo,

²²baitu omwokya omukuru, yamuhanika ha muti, Yosefu nkooku yabasoboroire.

²³Baitu nabwo, mukuru ow'abaheereza b'embonekyo, Yosefu akamwebwa.