Read Runyoro - rutooro Kub 41 Bible Online

Kub 41 - Runyoro - rutooro bible

Kub 41

¹Obu haahingwireho emyaka ebiri, Faraaho akaroota ayemeriire haihi n'ekyambu Nairo,

²yarora ente musanju enungi kandi ezinyakugomokere, niziruga omu kyambu eki, zaatandika kuliira omu rugoro.

³Ente ezindi musanju embi kandi ezinyakudoodookere, nazo zaaruga omu kisaaru Nairo, zaayemerra haihi n'ezi, ha musa ogw'ekyambu Nairo.

⁴Ente ziri embi kandi ezinyakudoodookere, zaalya ente omusanju enungi ezinyakugomokere zaazimaraho. Aho Faraaho yasisiimuka.

⁵Yayongera yagwijagira yaroota obwakabiri, obu, yarora entwe musanju ez'engano, ezinyakunyina enjuma ezinyakunyesire kandi enungi, zaanire ha musenka gumu.

⁶Entwe ezindi musanju ez'enjuma entoito kandi ezinyakuhohiibwe omuyaga ogwa Buturukaizooba, nazo zaatungurra ha musenka ogu gwonyini.

⁷Entwe ziri ez'enjuma entoito kandi ezinyakuhohere, zaamira entwe ziri omusanju ezinyakunyina enjuma enkooto kandi enungi, zaazimaraho. Aho yasisiimuka, yayetegereza nkooku kiri kirooto.

⁸Obwire obu bwakiire, yatuntura muno, yatuma bamwetere abantu abafumu n'ab'amagezi abanyakuli omunsi Misiri, yabarootorra ebi aroosire, baitu hatabeho n'omu ayamusoborroliire amakuru gabyo.

⁹Nubwo mukuru w'abaheereza b'embonekyo, yagambira Faraaho ati: “Kiro kinu, naijuka eki nasobeze,

¹⁰Faraaho obu yabiihiriirwe abaheereza be, yanta omunju y'enkomo na mukuru w'abookya, omunju eyaraarwamuga mukuru w'abalinzi,

¹¹kiro kimu omu bwire bw'ekiro, itwembi tukaroota, buli omu, akaroota ekirooto ekinyakunyina amakuru gakyo.

¹²Omunju egi, tukaba turumu n'omusaija Omuhebburaayo, omuheereza wa mukuru w'abalinzi; obu twamurootoroire, akasoborra kurungi amakuru ag'ebirooto byaitu, buli omu namusoborra amakuru ag'ekirooto kye.

¹³Nkooku yatumanyisize, nukwo byabairekwo, nyowe nkagarurwa ha mulimo gwange, kandi omwokya yahanikwa ha muti.”

¹⁴Aho Faraaho yatuma bamwetere Yosefu, obu yamazire kwemwa n'okujwara ebijwaro ebindi, yaija omumaiso ga Faraaho.

¹⁵Faraaho yagambira Yosefu ati: “Ndoosirege ekirooto, baitu busaho n'omu asoboire kunsoborra amakuru gakyo, mpuliire abantu nibagamba ngu, iwe obu bakurootorra ekirooto, osobora kusoborra amakuru gakyo.”

¹⁶Yosefu yagarukamu Faraaho ati: “Okusoborra ekirooto, tikiri kyange baitu kya Ruhanga wenka, nuwe araaha Faraaho amakuru agahikire.”

¹⁷Nukwo Faraaho yagambira Yosefu ati: “Kinu nikyo ndoosirege, mbaire nyemeriire ha musa ogw'ekisaaru Nairo,

¹⁸narora ente musanju ezinyakugomokere kandi enungi, zaaruga omu kyambu eki, zaaliira omu rugoro,

¹⁹ente ezindi musanju embi ezinyakwanukire, ezi ntakabonaga omunsi yoona Misiri.

²⁰Ente ezinyakwanukire zaalya ente omusanju ez'okubanza ezinyakugomokere.

²¹Baitu obu zimazirege kuzirya, busaho n'omu amanyirege nkooku ziziriire, habwokuba, ziikaire zaanukire nkooku zisangirwege. Aho nasisiimuka,

²²kandi nyongiirege naroota nindora entwe musanju ezinyakunyina enjuma nkooto enungi, zaanire ha musenka gumu;

²³kandi narora entwe musanju, ezinyakuhohere ezitanyina njuma nungi, ezinyakuhohiibwe omuyaga ogwa Burugaizooba, nazo zaatungurra ha musenka ogu gwonyini,

²⁴entwe ezinyakuhohere zaamira entwe omusanju enungi. Ekirooto eki, obu nkirotoliirege abafumu, busaho n'omu asoboirege kunsoborra amakuru gakyo.”

²⁵Nubwo Yosefu yagambira Faraaho ati: “Ebirooto ebibiri ebi oroosire, ekirooto kimu, Ruhanga akwolekere eki ali haihi kukora.

²⁶Ente omusanju enungi, nizimanyisa emyaka musanju, entwe musanju enungi ez'engano, nazo nizimanyisa emyaka musanju, ekirooto nikyo kimu.

²⁷Ente musanju ezinyakwanukire, ezaahondiire ziri, nizimanyisa emyaka musanju, kandi entwe musanju ez'engano ezinyakuhohere, ezaahohiibwe omuyaga ogwa Buturukaizooba, nazo nizimanyisa emyaka musanju eya kiihe.

²⁸Nkooku ngambirege, Ruhanga eki ali haihi kukora, akikwolekere.

²⁹Nihaija kubaho emyaka musanju ey'omweru mwingi muno omunsi yoona Misiri,

³⁰egi obu erihwaho,

³¹omweru gwona ogwabaire omunsi Misiri, guliba gutakyaijukwa omunsi, habwokuba, kiihe erikurataho, eriba y'amaani muno.

³²Ekirooto kyawe kwija emirundi ebiri, nikimanyisa ngu, ekintu kinu, Ruhanga akigumiize kimu, kandi ali haihi kukikora.

³³Nahabweki, hati osemeriire okome omuntu ow'amagezi kandi arukwetegereza, omuhe obusobozi obw'okulema ensi eya Misiri.

³⁴Oyongere kukoma abantu abaraarolerra ensi, baiheho abantu ekicweka kimu ekya kataano eky'ebirimwa byona ebya Misiri, omu kasumi ak'emyaka musanju enu ey'omweru.

³⁵Basorooze ebyokulya eby'emyaka egi erukwija ey'omweru, bahunike omu mbuga engano, nibahondera eki oragiire, baleke kugikwataho, omu kasumi ak'emyaka enu musanju ey'omweru, ikale omu busobozi bwawe.

³⁶Engano egi, abantu niyo balirya ebamazeeho emyaka musanju eya kiihe erukwija kugwera ensi Misiri, abantu baleke kuhwerekerezibwa kiihe.”

³⁷Ekiteekerezo eki, Faraaho hamu n'abanyoro be baakisiima,

³⁸Faraaho yakaguza abanyoro be ati: “Tusobora kuzoora omuntu anyakwina Mwoyo wa Ruhanga nk'onu?”

³⁹Aho Faraaho yagamba Yosefu ati: “Ruhanga nkooku akwolekere ebi, busaho muntu n'omu ow'amagezi kandi arukwetegereza nka iwe,

⁴⁰niiwe oraarolerraga ekikaali kyange, kandi abantu bange boona baraahonderaga eki orukuragira, kimu kyonka, ekitebe eky'obukama, nikyo kiraanfooraga mukuru kukira iwe.”

⁴¹Yayongera yamugira ati: “Nkuhaire obusobozi obw'okurolerra ensi Misiri yoona.”

⁴²Faraaho yajuura empeta enyakuroho emanyiikirizo, yagijweka Yosefu, yamujweka ebijwaro ebya kitaani enungi muno, yamujweka omu bikya omufubaso ogwa zaabbu,

⁴³yaragira bamusindikire omu kigaali kye ekya kabiri, abantu baatoka omumaiso ge nibagamba bati: “Inywena muteeze amaju.” Faraaho, nukwo yahaire Yosefu ati obusobozi obw'okulema Misiri.

⁴⁴Faraaho yayongera yagamba ati: “Ninyowe Faraaho, ninkugambira nti: Busaho muntu n'omu omunsi Misiri alikora ekintu na kimu, iwe otamwikiriize.”

⁴⁵Nubwo Faraaho yaruka Yosefu ibara Zafenasi-paneya, yamuha Asenasi muhara wa Potifera nyakatagara wa Oni amuswere. Obusobozi bwa Yosefu bwahika omunsi yoona eya Misiri.

⁴⁶Yosefu akaba ahikize emyaka makumi asatu, ha yatandikiire kuheereza Faraaho omukama wa Misiri. Yosefu yaruga omumaiso ga Faraaho, yagenda kurambura ensi Misiri yoona.

⁴⁷Omu myaka musanju ey'omweru, ensi ekeeza muno ebintu bingi,

⁴⁸Yosefu yasorooza ebyokulya byona ebyayezire omu myaka egi, obu bikaba bikyali bingi omunsi Misiri, yabihunika omu mbuga, omu buli rubuga, yahunikamu ebyokulya ebinyakurugire omu Misiri ey'ensi ezinyakumuli haihi.

⁴⁹Yosefu yahunika ebyokulya bingi muno eby'enjuma, ebirukwingana omusenyi gw'enyanja, okuhika obu yakalemerwe kubirenga, habwokuba, bikahingurana obwingi.

⁵⁰Emyaka eya kiihe obu ekaba etakahikire, mukazi wa Yosefu Asenasi muhara wa Potifera nyakatagara wa Oni, akaba amazire kuzaara abatabani babiri.

⁵¹Yosefu, omuzigaijo yamuruka ibara Manaase, habwokuba akagamba ati: “Ruhanga anyebeseze emihito yange yoona n'eka ya ise nyowe.”

⁵²Omusubiro, yamuruka Ibara Efuraimu, habwokuba akagamba ati: “Ruhanga ankanyisize omunsi ei naboniiremu emihito.”

⁵³Emyaka musanju ey'omweru ogw'abaireho omunsi Misiri obu yahoireho,

⁵⁴haakurataho emyaka musanju eya kiihe, Yosefu nkooku akaba arangire. Ensi ezindi zoona zaagwerwa kiihe, Misiri yonka, niyo yasigaize ebyokulya.

⁵⁵Faraaho yagambira Abamisiri boona ati: “Mugende hali Yosefu, eki araabaragira, nikyo mukole.”

⁵⁶Kiihe obu yayehinguliriize ensi Misiri yoona, Yosefu yatandika kuguza Abamisiri ebyokulya eby'omu maguli, habwokuba kiihe ekaba esaaliire omunsi Misiri.

⁵⁷Abantu ab'ensi yoona baija Misiri hali Yosefu kugura ebyokulya, habwokuba kiihe ekaba esaaliire omunsi yoona.