Read Runyoro - rutooro Kub 42 Bible Online

Kub 42 - Runyoro - rutooro bible

Kub 42

¹Yakobbo obu yahuliire ngu Misiri haliyo ebyokulya, yakaguza abatabani ati: “Habwaki muli aho nimurorangana kwonka?”

²Yagamba ati: “Mpuliire ngu Misiri haliyo ebyokulya, mugende mutusakireyo ebyokulya ebi turaalya, tuleke kwitwa enjara.”

³Aho bagenzi ba Yosefu ikumi, baagenda Misiri kusaka ebyokulya.

⁴Baitu Yakobbo ataikirize Benyamiini owanyina Yosefu kugenda na bagenzi be abandi, habwokuba akatiina yateekereza ati: taikara kugwerwa akabi.

⁵Aho batabani ba Isirairi baagenda Misiri n'abantu abandi kusaka ebyokulya, habwokuba kiihe ekaba egwire omunsi Kanaani.

⁶Omu kasumi ako, Yosefu nuwe akaba ali mulemi omukuru omunsi Misiri, kandi nuwe yaguzaaga abantu boona ab'omunsi ebyokulya. Bagenzi ba Yosefu baija baajuumara omumaiso ge.

⁷Yosefu obu yabarozire, yabamanyirra, baitu yabeehugya nk'atabamanyire, tiyabaza nabo kurungi. Yabakaguza ati: “Murugire nkaha?” Baamugarukamu bati: “Turugire omunsi Kanaani, twizire kusaka ebyokulya.”

⁸Yosefu noobu yamanyiriire bagenzi be, baitu bo batamumanyirre.

⁹Yosefu yaijuka ebirooto ebi yaroosire ebikaba nibibakwataho, yabagambira ati: “Inywe muli ntasi, mwizire kwetegereza obuceke obunyakuli omwihanga lyaitu.”

¹⁰Baamugarukamu bati: “Nangwa, mukama waitu, abairu bawe eki baiziriire, nukwo kusaka ebyokulya.

¹¹Tuli baana b'omusaija omu, tuli bantu beesigwa, itwe abairu bawe tituli ntasi,”

¹²yabagarukamu ati: “Nangwa mwizire kutata obuceke bwaitu.”

¹³Baamugarukamu bati: “Itwe abairu bawe, tuzaarwa tuli ikumi na babiri, tuli baana b'omusaija omu arukwikara omunsi Kanaani, macura gaitu akasigara na isiitwe, ondi akafa.”

¹⁴Baitu Yosefu yabagarukamu ati: “Nangwa, mbagambiirege nti: muli ntasi.

¹⁵Faraaho naakaanyite, timurukwija kuruga hanu, kubananukira nkooku mutali ntasi, muleete macura ganyu.

¹⁶Mutume omu hali inywe, atabarre mugenzi wanyu, inywe mube mukyali omunju y'enkomo, nukwo twetegereze ebigambo byanyu obu biraaba biri by'amazima, obu garaaba gatali mananu, nindahira Faraaho, mazimakwo muli ntasi.”

¹⁷Boona yabata omunju y'enkomo, bamalemu ebiro bisatu.

¹⁸Ha kiro ekya kasatu, Yosefu yabagambira ati: “Kinu nikyo musemeriire kukora, nukwo mwomeere, habwokuba, nintiina Ruhanga:

¹⁹Obu muraaba muli beesigwa leka mugenzi wanyu omu asigale omu nkomo, abasigaireho, mugende mutwale ebyokulya, mujune abantu baanyu enjara,

²⁰mundeetere mugenzi wanyu macura, nubwo turaabananukira kandi timwaitwe.” Baikiriza eki yabagambiire.

²¹Nubwo bagambirangaine bati: “Mananukwo, nitujunaanwa habw'okukora kubi mugenzi waitu oli, habwokuba tukarora nkooku akaba naasaalirwa, kandi noobu yatwesengeriize, tutamugirre mbabazi, nikyo turukubonabonera tuti.”

²²Rubbeni yabakaguza ati: “Ntabagambire nti omusigazi mutamukora kubi? Baitu mwaigara amatu, hati nikyo turukujunaanirwa habw'okumukora kubi.”

²³Bbo batamanye Yosefu nkooku arukumanya engambo yabo, habwokuba obu yabaga naabaza nabo, haabahoga omuntu arukuhindura.

²⁴Aho Yosefu yabarugaho, yagenda ha rubaju, yarra. Obu yagarukire nambere bali, yabaihamu Simyoni, yamuboha nibarora.

²⁵Hanyuma, yaragira abaheereza baijuze ensahu zaabo ebyokulya kandi bagarre sente eza buli muntu omu nsahu ye, kandi bababohere n'entanda, ebi byona baabikora.

²⁶Kandi baata ebyokulya byabo ha nkaina zaabo, baagenda.

²⁷Obu baahikire omu ngoonyo, omu hali bo yasumurra ensahu ye, aihemu ebyokulya eby'enkaina ye, yarora sente ze ziri omu minwa y'ensahu ye,

²⁸yagambira bagenzi be ati: “Sente zange zingaruliirwe nzinu, naisanga omu minwa y'ensahu.” Obu baahuliire eki, ebikiratima byabateera. Baarorangana nibatukumira nibagamba bati: “Kinu, Ruhanga atukozire ki?”

²⁹Obu baahikire isebo omunsi Kanaani, baamusubirra byona ebyabaireho nibagamba bati:

³⁰“Omusaija omulemi w'ensi eri, atabaze na itwe kurungi, akatweta ntasi abaagenderiire kutata ensi yabo.

³¹Itwe twamugarukamu tuti: ‘Tuli bantu beesigwa, tituli ntasi.

³²Tukazaarwa tuli ikumi na babiri, tuli baana b'omusaija omu, omu akafa, macura gaitu akasigara na isiitwe omunsi Kanaani.’

³³Nubwo omusaija omulemi w'ensi egi yagambire ati: ‘Kubananukira nkooku muli bantu beesigwa, munsigire mugenzi wanyu omu, abandi mugende mutwale ebyokulya, mujune abantu baanyu enjara.

³⁴Mundeetere mugenzi wanyu macura, obu nubwo ndaamanya nkooku mutali ntasi, baitu muli bantu beesigwa, kandi ndaabagarurra mugenzi wanyu, nukwo musuuburre omunsi munu.’ ”

³⁵Obu bakaba nibacukumura ebyokulya ebikaba biri omu nsahu, kwija kurora ekikonjonjo kya sente eza buli muntu kiri omu nsahu ye, bbo na isebo obu baaboine sente ezi, baatiina, amaani gaabahwa.

³⁶Isebo Yakobbo yagamba ati: “Ka mwammaraho abaana, Yosefu akafa, Simyoni taroho, kandi hati nimwenda kutwara na Benyamiini, ebi byona nibigwera nyowe.”

³⁷Nubwo Rubbeni yagambiire ise ati: “Obu ntalimukugarurra, oliita batabani bange babiri, munkwase, ndimukugarurra.”

³⁸Yakobbo yagarukamu ati “Omwana wange onu torukwija kumutwara, habwokuba owanyina akafa, kandi uwe wenka nuwe asigaireho. Kakuba agwerwa akabi omu rugendo oru murukwija kugendamu, buli nyowe omusaija omukuru n'enju zange zinu, arukusaalirwa ati, muraaba munziikire Nyabuyonga.”