Read Runyoro - rutooro Kub 44 Bible Online

Kub 44 - Runyoro - rutooro bible

Kub 44

¹Yosefu yaragira omukeeto w'eka ye ati: “Ensahu z'abasaija abo, ziijuze ebyokulya, otemu ebyokulya bingi muno, buli omu ebi asobora kwetweka, sente eza buli muntu, ozite omu minwa y'ensahu ye,

²kandi ekikopo kyange eky'efeeza okite omu nsahu ey'omwojo oli macura, hamu na sente ze ezi yaleesire kuguza ebyokulya.” Omukeeto yakora byona Yosefu ebi yamuragiire.

³Obwire obu bukaba nibukyanganuka, abasaija baaraga, baimukya kugenda n'enkaina zaabo.

⁴Baitu obu bakaba baakagendaho akaanya kake okuruga omu rubuga, Yosefu yaragira omukeeto ati: “Yanguha bwango, ohondere abasaija abo, kandi obu oraabahikaho obakaguze oti: ‘Habwaki mukora kubi kandi kunu inywe mukozirwe kurungi? Kiki ekibaibisize ekikopo kyange eky'efeeza?

⁵Ekikopo eki, nikyo mukama wange anywisa kandi nikyo kimumanyisa ebirukwija kubaho. Musobeze muno kukora ekintu eki.’ ”

⁶Omukeeto obu yahikireho bagenzi ba Yosefu, yabagambira ebigambo ebi.

⁷Bbo baamukaguza bati: “Mukama waitu, kiki ekirukukugambisa ebigambo ebi? Nikikafuuhe, itwe abairu bawe kukora ekintu eki!

⁸Dora sente ezi twasangire omu nsahu zaitu, tukaziiha Kanaani twazikugarurra, kandi obu, twakusoboire tuta kwiba ezaabbu rundi efeeza omunju ya mukama wawe?

⁹Wena omuli itwe araasangwa n'ekikopo eki, afe, kandi abasigaireho tube bairu bawe.”

¹⁰Omukeeto yabagarukamu ati: “Nkooku mugambire nukwo kiraaba, ogu araasangwa n'ekikopo, nuwe araaba mwiru wange, kandi abasigaireho tibaabe na musango.”

¹¹Ahonaaho boona baiha ensahu zaabo ha nkaina, baazita hansi, baazisumurra.

¹²Omukeeto yatandika kwaza naabandiza ha nsahu y'omukuru, yamalirirra ha y'omuto, ekikopo kyazooka omu nsahu ya Benyamiini.

¹³Nubwo baatemura ebijwaro byabo, buli muntu ensahu ye yagigarra ha nkaina ye, baagaruka omu rubuga.

¹⁴Yuda na bagenzi be obu baahikire omunju ya Yosefu, na uwe akyarumu, baajuumara hansi omumaiso ge.

¹⁵Yosefu yabakaguza ati: “Kinu mukozire kintu ki? Timurukumanya omuntu nka nyowe nkooku asoborakwo kumanya ebirukwija kubaho?”

¹⁶Yuda yagarukamu ati: “Mukama wange, turaakugambira ki? Ekibi turaakyeihaho tuta? Ruhanga nuwe azonzoire ekibi ky'abairu bawe; hati mukama waitu, tuli bairu bawe, itwe n'ogu anyakusangirwe n'ekikopo;”

¹⁷baitu Yosefu yagamba ati: “Nikikafuuhe, eki nyowe tinsobora kukikora! Omuntu ogu wenka anyakusangirwe n'ekikopo nuwe araaba mwiru wange, baitu inywe abandi mugende n'obusinge mwegarukire hali isiinywe.”

¹⁸Nubwo Yuda yagenzire hali Yosefu yagamba ati: “Mukama wange onyikirize nkugambire ekigambo, kandi oleke kubiihirirwa muno omwiru wawe, habwokuba iwe noingana Faraaho wonyini.

¹⁹Mukama wange akakaguza abairu be ati: ‘Munyina isiinywe rundi mugenzi wanyu?’

²⁰Tukamugarukamu tuti: ‘Tunyina isiitwe omugurusi na mugenzi waitu omuto, nuwe omwana ou yazaire ali mugurusi; kandi owanyina omwana ogu akafa, uwe wenka nuwe asigaireho ha baana ba nyina; nuwe nganzi hali ise.’

²¹Nubwo wagambiire abairu bawe oti: ‘Mugende mumundeetere.’

²²Tukagambira mukama wange tuti: ‘Omusigazi tasobora kurugaho ise, kakuba amurugaho, omugurusi naasobora kufa.’

²³Aho wagambira abairu baawe oti: ‘Obu mutaliija na mugenzi wanyu macura, timulyongera kundora.’

²⁴Obu twagarukire hali omwiru wawe isiitwe, tukamugambira ebigambo mukama wange ebi yagambire.

²⁵Isiitwe obu yatugambiire ati: ‘Mugaruke Misiri mutusakire ebyokulya,’ tukagamba tuti:

²⁶‘Oku titusobora kugarukayo tutaina mugenzi waitu macura, habwokuba titusobora kurora omusaija oli rundi buli twina mugenzi waitu ogu.’

²⁷Nubwo omwiru wawe isenyowe yatugambiire ati: ‘Nimumanya mukazi wange nkooku yanzaaliire abaana aboojo babiri;

²⁸omu akahera, nagamba nti: mazimakwo akaliibwa enyamaiswa. Okuruga obu, tinkamubonaga okuhika na hati.

²⁹Kandi obu muraatwara n'onu, akagwerwa akabi, buli nyowe omusaija omukuru n'enju zange zinu, arukusaalirwa ati, muraaba munziikire Nyabuyonga.’

³⁰Habweki obu ndigaruka hali omwiru wawe ise nyowe, ntanyina omusigazi ogu, kandi kunu nuwe ataireho omutima

³¹obu alirora atali na itwe, naija kufa; itwe abairu bawe, omwiru wawe isiitwe, n'enju ze omu mutwe, arukusaalirwa ati, turaaba tumuziikire Nyabuyonga.

³²Habwokuba nyowe omwiru wawe, ninyowe nayesimbire hali isenyowe habw'omwojo ogu ningamba nti: ‘Obu ntalimukugarurra, ninyowe olijunaana obwomeezi bwange bwona.’

³³Habweki mukama wange, nkwesengeriize, ninyowe osigaze mbe mwiru wawe, omu kiikaro ky'ogu, baitu uwe, omuleke agarukeyo na bagenzi be.

³⁴Nsobora nta kugaruka hali ise nyowe ntaina omwojo ogu? Tindukwenda kurora isenyowe naizirwa akabi.”