Read Runyoro - rutooro Kub 45 Bible Online

Kub 45 - Runyoro - rutooro bible

Kub 45

¹Yosefu atasobole kwegumya omumaiso gaabo boona abakaba bamuli haihi, yarra yagamba ati: “Abantu abandi abanyakuli hanu, mubaturukye, mubaanyiheho.” Habweki, hatabeho n'omu ayasigaireho, obu akaba naayetondera bagenzi be.

²Yatamu omukungo, Abamisiri n'abantu ab'omuka ya Faraaho baaguhurra.

³Yosefu yayetondera bagenzi be ati: “Ninyowe Yosefu,” hanyuma yabakaguza ati: “Taata aikaire?” Baitu, bagenzi be batasobole kugarukamu, habwokuba bakatiinamu, obu baahuliire ngu nuwe Yosefu.

⁴Aho Yosefu yagamba bagenzi be ati: “Munyirre haihi,” bairra haihi, yabagambira ati:

⁵“Ninyowe mugenzi wanyu Yosefu ou mwatunzire natwarwa Misiri. Hati, muleke kutuntura rundi kweijukya ngu habwokuba mukantunda naleetwa omunsi enu, Ruhanga akabanyebembeza, nukwo njune obwomeezi bwanyu.

⁶Habwokuba, kiihe yakagwa omunsi okumara emyaka enu ebiri, kandi hakyasigaire emyaka etaano, omu myaka egi, tihalibaho kulima rundi kugesa.

⁷Ruhanga akabanyebembeza, ncwe amagezi, nukwo oruganda rwanyu ruleke kucwekera kandi omuli inywe, hasigalemu omuganda gw'abantu abatafiire.

⁸Nahabweki, etabe ntegeka yanyu eyandeesire hanu, baitu Ruhanga nuwe yakigondeze, akanfoora nka ise Faraaho, yampa okurolerra eka ye yoona n'okulema ensi Misiri yoona.

⁹Murahuke bwango, mugende mugambire isenyowe muti: ‘Mutabani wawe Yosefu naagamba ati: Ruhanga akanfoora mulemi w'ensi Misiri yoona, orahuke bwango ompikeho, otabandaara;

¹⁰noija kwikara omunsi Goseni, ompereere, iwe, abaana baawe, abaijukuru bawe, amagana gawe ag'embuzi n'ag'entaama, ente zawe na byona ebi onyinabyo.

¹¹Oku nuho ndaakukonyerraga, habwokuba omumaiso, hakyasigaireyo emyaka etaano eya kiihe, iwe, abantu bawe na byona ebi onyinabyo, mutaliikara kwitwa enjara.’

¹²Hati nimurora n'amaiso ganyu, na Benyamiini owanyina-nyowe, na uwe nanyerorra n'amaiso ge, nkooku ali nyowe Yosefu arukubaza na inywe.

¹³Mugambire ise nyowe, nkooku nyina ekitiinisa kingi omunsi Misiri, kandi mumugambire byona ebi muboine. Mwanguhe bwango, mundeetere isenyowe hanu.”

¹⁴Nubwo yakwata owanyina Benyamiini, yamubumbaatira, yarra, Benyamiini na uwe yabumbaatira Yosefu, yarra.

¹⁵Bagenzi be boona, yatandika kubaza nabo.

¹⁶Abantu ab'omunju ya Faraaho, obu baahuliire bagenzi ba Yosefu nkooku baizire, Faraaho n'abagaragara be baasemererwa muno.

¹⁷Faraaho yagambira Yosefu ati: “Gambira bagenzi bawe oti: ‘Mukole kinu, mute emitumba ha bisoro byanyu, mugaruke omunsi Kanaani,

¹⁸mwiheyo isiinywe n'abantu baanyu, mugaruke kunu, ninyija kubaha ekicweka ekirukukira oburungi omunsi Misiri, mulyege ebirungi ebya Misiri.’

¹⁹Kandi obaragire oti: ‘Mukole kinu, mwihe ebigaali omunsi Misiri, mubitwaale, nibyo muliireeteraho abantu baanyu. Mutabarre isiinywe mwije.

²⁰Ebintu byanyu ebya Kanaani muleke kubitunturra, habwokuba ebintu ebirukukira oburungi omunsi Misiri byanyu.’ ”

²¹Abaana ba Isirairi, baakora nkooku baabagambiire. Yosefu yabaha ebigaali, Faraaho nkooku yamuragiire, yabaha n'entanda ey'okuliira omu muhanda.

²²Buli omu, yamuha ebijwaro ebirungi, baitu Benyamiini, akamuha ebicweka by'efeeza bikumi bisatu, n'ebijwaro bitaano ebirungi.

²³Ise yamutwekera binu: enkaina ikumi ezinyakwetwekere ebintu ebirungi eby'omunsi Misiri, buguma z'enkaina ikumi ezinyakwetwekere engano, emigaati ahamu n'entanda, ise ei aliriira omu muhanda naija.

²⁴Yosefu yayohereza bagenzi be, baagenda. Obu bakaba nibaahukana yabagambira ati: “Mutakunganira omu muhanda.”

²⁵Baaruga Misiri, baagenda, baahika omunsi Kanaani, hali isebo Yakobbo.

²⁶Baamugambira Yosefu nkooku akyali mwomeezi, kandi nkooku ali nuwe mulemi w'ensi yoona eya Misiri. Yakobbo obu yahuliire eki, akekanga yahuna, tiyaikiriza eki baamugambiire.

²⁷Baitu obu baamugambiire ebigambo byona Yosefu ebi yagambire, arozire ebigaali ebi yatwekere kumutwarraho, omutima gwamugwa omunda.

²⁸Isirairi yagamba ati: “Omwana wange Yosefu obu araaba akyayomiire, tinyina kindi eki ndukwetaaga, ka ngende mmurole ntakafiire.”