Read Runyoro - rutooro Kub 46 Bible Online

Kub 46 - Runyoro - rutooro bible

Kub 46

¹Kandi Isirairi yaimukya orugendo rwe, yatwara byona ebi akaba anyinabyo, yahika Beeri-seba, oku, yatambirrayo Ruhanga owa Isaaka ise ekyonzira.

²Ekiro, Ruhanga yayeyoleka Isirairi yamweta ati: “Yakobbo, Yakobbo.” Uwe yayetebuka ati: “Taata.”

³Nubwo Ruhanga yagambire ati: “Ninyowe Ruhanga, Ruhanga owa sso, otatiina kugenda Misiri, habwokuba oku, nuho ndikwihiramu ihanga erikooto.

⁴Ninyija kugenda na iwe Misiri, kandi ndyongera nkwiheyo. Yosefu nuwe alikukuma, obu oliba nookaba.”

⁵Nubwo Yakobbo yaruga Beeri-seba, batabani be baamutwara, abaana baabo abato n'abakazi baabo, baabatwarra ha bigaali, Faraaho ebi yatwekere kumutwarraho.

⁶Baatwara ente zaabo n'ebintu byabo ebi baatungiire omunsi Kanaani, baahika Misiri, Yakobbo hamu n'oruzaaro rwe rwona,

⁷abatabani, abahara, n'abaijukuru boona, oruzaaro rwe rwona, yaija narwo Misiri.

⁸Ganu nugo mabara g'abantu g'oruzaaro rwa Isirairi abaizire Misiri. Yakobbo n'abatabani, Rubbeni omuzigaijo gwa Yakobbo,

⁹batabani ba Rubbeni nubo banu: Hanoki, Paru, Hezeroni, Karumi.

¹⁰Ganu nugo mabara ga batabani ba Simyoni: Yemweri, Yemeni, Ohadi, Yakini, Zohali na Sauli, anyakuzaarwa omukazi Omunyakanaani.

¹¹Ganu nugo mabara ga batabani ba Leevi: Geresoni, Kohati, na Merai.

¹²Ganu nugo mabara g'abatabani ba Yuda: Eri, Onani, Sera, Pereezi na Zera, (baitu Eri na Onani, bakafeera omunsi Kanaani.) Ganu nugo mabara ga batabani ba Pereezi: Hezeroni, na Hamuli.

¹³Ganu nugo mabara ag'abatabani ba Isakara: Toora, Puuva, Yobu na Simirooni.

¹⁴Ganu nugo mabara ga batabani ba Zebburuuni: Seredi, Eloni, Yahaleeri.

¹⁵Aboojo abo boona hamu na munyanya-bo Dina, baana ba Leeya, aba yazaairweho Yakobbo, ali omunsi Padanaramu, abaana be boona hamu n'abaijukuru bakahika asatu na basatu.

¹⁶Ganu nugo mabara ga batabani ba Gaadi: Zifiyoni, Haagi, Suuni, Eziboni, Eri, Arodi, na Aleri.

¹⁷Ganu nugo mabara g'abatabani ba Aseeri: Imuna, Isuva, Isivi, Beriya, hamu na Seera munyanya bo. Kandi ganu nugo mabara g'abatabani ba Beriya: Heberi na Merikyeri.

¹⁸(Abo nubo baana n'abaijukuru ba Yakobbo na Ziripa, Labbani ou yasagaliire muhara we Leeya kwikara nawe, abantu boona bakahika ikumi na mukaaga.)

¹⁹Ganu nugo mabara g'abatabani ba Rakeeri muka Yakobbo: Yosefu na Benyamiini.

²⁰Kandi Yosefu obu akaba ali Misiri, Asenasi muhara wa Potifera nyakatagara wa Oni, akamuzarra Manaase na Efuraimu.

²¹Ganu nugo mabara ag'abaana ba Benyamiini: Beera, Bekeri, Asubeeri, Geera, Naamani, Ehi, Rosi, Mupimu, Hupimu na Alidi.

²²Abo nubo baana n'abaijukuru ba Yakobbo na Rakeeri boona hamu nibahika ikumi na bbana.

²³Ibara ery'omwana wa Daani nuwe Husimu.

²⁴Ganu nugo mabara ag'abaana ba Nafutaali: Yahazeeri, Guuni, Yezeeri, na Sileemu.

²⁵Abo nubo baana n'abaijukuru ba Yakobbo na Biriha, Labbani ou yasagaliire muhara we Rakeeri kwikara nawe, boona hamu nibahika musanju.

²⁶Abantu boona aba Yakobbo abaizire Misiri, ab'esagama ye, otatairemu bakamwana, omuhendo gwabo gukaba guli nkaaga na mukaaga;

²⁷batabani ba Yosefu aba yazaaliire Misiri, bakaba bali babiri, abantu boona ab'enju ya Yakobbo abaizire Misiri, omuhendo gwabo gwahikaga nsanju.

²⁸Yakobbo yatuma Yuda amwebembere ahikeho Yosefu, amumanyise nkooku arukwija, nukwo basobole kutangatangana Goseni.

²⁹Yosefu yateekaniza ekigaali kye, yagenda kutangaana ise omu Goseni, obu yamuhikireho, yamugwa omunda, yamubumbaatira, yamara akasumi narra akyamubumbaatiire.

³⁰Yagamba ati: “Hati ndaafa gwezire, habwokuba nkuboine, namanya nkooku okyali mwomeezi.”

³¹Yosefu yagambira bagenzi be n'abantu boona ab'eka ya ise ati: “Ka ngende ngambire Faraaho, mumanyise nti: bagenzi bange n'eka yoona eya isenyowe, abakaba bali omunsi Kanaani, banyebingire,

³²abantu abo baliisa, habwokuba bagira ente, kandi baleesire amagana gaabo, ag'entaama, ag'embuzi n'ag'ente, n'ebintu byabo byona.

³³Faraaho obu araabeeta akabakaguza ati: ‘Mukora mulimo ki?’ Mumugarukemu muti:

³⁴‘Abairu bawe okuruga obuto bwabo okuhika na hati, baliisa ente, itwena na baisenkuru itwe,’ nubwo muraasobora kwikara omunsi Goseni, habwokuba Abanyamisiri banuga abaliisa.”