Read Runyoro - rutooro Kub 47 Bible Online

Kub 47 - Runyoro - rutooro bible

Kub 47

¹Yosefu yagenda yagambira Faraaho ati: “Isenyowe na bagenzi bange barugire omunsi Kanaani, baizire n'amagana ag'entaama, ag'embuzi n'ag'ente, n'ebintu byaabo byona, hati bali omu kicweka ky'ensi ekinyakwetwa Goseni.”

²Omu bagenzi be, akakomamu bataano aba yahikize Faraaho,

³Faraaho yabakaguza ati: “Mukora mulimo ki?” Baamugarukamu bati: “Abairu bawe baliisa nka baisenkurubo.”

⁴Baagambira Faraaho bati: “Twizire kwikara omunsi enu, habwokuba omunsi ya Kanaani, abairu bawe tibanyina h'okuliisiza amagana gaabo, kandi kiihe esagaine omunsi egi, hati tukwesengeriize, ikiriza abairu bawe baikale omunsi Goseni.”

⁵Aho Faraaho yagambira Yosefu ati: “Sso na bagenzi bawe bakwebingire.

⁶Ensi eya Misiri, eri omu busobozi bwawe, koma ekicweka ekirukukira oburungi okibahe baikalemu, leka baikale omunsi Goseni, kandi omuli bo, obu oraaba omanyiremu abantu abanyakumanyire muno omulimo ogw'okuliisa, obahe kurolerra amagana gange.”

⁷Kandi Yosefu yataahya Yakobbo ise, yamwoleka Faraaho, Yakobbo yaha Faraaho omugisa.

⁸Faraaho yakaguza Yakobbo ati: “Onyina emyaka ingaha ey'obukuru?”

⁹Yakobbo yamugarukamu ati: “Emyaka ei mmazire omunsi, nehika kikumi mu asatu, emyaka egi, ebairemu obulemeezi bwingi kandi nke, terukwingana baisenkurunyowe ei baamazire omunsi.”

¹⁰Yakobbo yaha Faraaho omugisa, yaruga omumaiso ge.

¹¹Aho Yosefu yaha ise na bagenzi be ensi ey'okwikaramu, buli muntu ekicweka kye, omunsi Misiri, omu kicweka ky'ensi ekirukukira oburungi ekya Ramasesi, Faraaho nkooku yaragiire.

¹²Yosefu yaha ise, bagenzi be, n'abantu boona ab'eka ya ise ebyokulya, ebirukumara abantu buli muntu abaakaba ainabo.

¹³Omu kasumi ako, omunsi yoona hakaba hatarumu byokulya, habwokuba kiihe ekaba esaaliire, habweki ensi Misiri na Kanaani, zikaba omu kabi akakooto aka kiihe.

¹⁴Yosefu yasorooza sente zoona ezikaba ziri omunsi Misiri na Kanaani, ezaarugaga omu ngano, abantu ei baaguraga azaahura omu kitongole ekikeeto ekya Faraaho.

¹⁵Sente zoona obu zaahoire omunsi Misiri na Kanaani, Abanyamisiri baizira Yosefu baamugamba bati: “Tuhe ebyokulya, habwaki tufa oturoleriire? Sente zituhoireho.”

¹⁶Yosefu yabagarukamu ati: “Sente obu ziraaba zibahoireho, mumpe amagana ganyu, mbahe ebyokulya.”

¹⁷Amagana gaabo baagamuleetera, uwe yabaha ebyokulya, bbo baamuha embaraasi, amagana ag'entaama, ag'embuzi, ag'ente, n'ag'enkaina, omu mwaka ogu, yabaha ebyokulya ebi baagulize amagana gaabo.

¹⁸Omwaka ogu obu gwahoireho, baamwizira omu mwaka ogwakurasireho bagamba bati: “Nitukugambira amananu, titukyayina sente, kandi amagana gaitu, hati gaawe, titukyanyina kintu na kimu eki tusigaize, kwihaho itwe itwenka n'ebibanja byaitu.

¹⁹Baamukaguza bati: Habwaki nitufa oturoleriire, kandi kunu tunyina ebibanja byaitu? Tugule, ogule n'ebibanja byaitu, otuhe ebyokulya tulye, itwe n'ebibanja byaitu, turaatungwa Faraaho, otuhe embibo, tubyale, tutunge ebyokulya, tuleke kufa, ensi yaitu ekafooka irungu.”

²⁰Habweki, Yosefu yagurra Faraaho ensi yoona Misiri, habwokuba Abanyamisiri boona bakatunda ebibanja byaabo, habwokuba kiihe ekaba ehinguraine.

²¹Ensi yafooka ya Faraaho, kandi abantu boona aba Misiri yabafoora bairu.

²²Ekicweka kya banyakatagara kyonka, nikyo ataraguzire, habwokuba bbo, bakaba banyina omugabo gwaabo ogutegekerwe, Faraaho ogu yabahaga, nugwo baalyaaga, nikyo bataratundiire bibanja byabo.

²³Aho Yosefu yagambira abantu ati: “Hati kiro kinu, nabagura, hamu n'ebibanja byanyu, nabagurra Faraaho. Dara embibo musige,

²⁴omu kasumi ak'igesa, muliha Faraaho ekicweka kimu ekya kataano, kandi ebicweka bbina ebya kataano, bibe byanyu, aho nuho muliiha embibo ey'okusiga, eyerirugwamu ebyokulya byanyu, eby'abantu baanyu, n'eby'abaana baanyu.”

²⁵Baamugarukamu bati: “Watujuna, obu oraaba nookisiima, ka tufooke bairu ba Faraaho.”

²⁶Eki, Yosefu yakifoora kiragiro eky'ensi yoona Misiri, ekiragiro eki, na hati hoona kikyaroho, ekirukugamba kiti: Faraaho aheebwege ekicweka kimu ekya kataano, ekicweka kya banyakatagara kyonka nikyo kitarafokere kya Faraaho.

²⁷Isirairi nukwo yaikaire ati Misiri, omu kicweka eky'ensi ekirukwetwa Goseni, yatungiramu ebintu bingi, yazaara, n'oruganda rwakanya.

²⁸Yakobbo akamara Misiri emyaka ikumi na musanju, habweki emyaka yoona Yakobbo ei yamazire, ekahika kikumi mu ana na musanju.

²⁹Akasumi ak'okufa kwa Isirairi obu kaahikire, akeeta omutabani Yosefu mutabani we yamugambira ati: “Okumanya ngu nongonza kandi nompurra, ta omukono gwawe hansi y'ekibero kyange, orahire nkooku olihikiriza eki ndukukugambira, otalinziika Misiri,

³⁰obu ndifa nka baisenkurunyowe oku baafiire, onyihe Misiri, ontwale onziike nambere baaziikirwe.” Yosefu yamugarukamu ati: “Ndikora nkooku ogambire.”

³¹Isirairi yagamba ati: “Ndahira.” Yosefu yamurahira. Aho Isirairi yainama ha musago gw'ekitabu kye.