Read Runyoro - rutooro Kub 48 Bible Online

Kub 48 - Runyoro - rutooro bible

Kub 48

¹Obu haahingwireho akasumi, abantu baija baagambira Yosefu bati: “Sso murwaire.” Aho Yosefu yatwara abatabani babiri, yagenda nabo.

²Abantu baagambira Yakobbo bati: “Mutabani wawe Yosefu aizire kukurora.” Nubwo Isirairi yayekwatiriza, yaikarra ha kitabu kye.

³Yagambira Yosefu ati: “Ruhanga ow'obusobozi bwona, akambonekera ndi omu kiikaro Luuzi, omunsi Kanaani, yampa omugisa, yangamba ati:

⁴‘Ndikuha oruzaaro nkukanyise nkwihemu amahanga maingi, kandi ensi enu, ndigiha abaijukuru bawe, ebe nsi yaabo ey'ebiro byona.’

⁵Okuruga hati, batabani bawe ababiri, aba wazaaliire Misiri ntakakwebingire, bafokere baana bange. Efuraimu na Manaase baraaba bange nka Rubbeni na Simyoni oku bali.

⁶Kandi abaana abandi obubalizara abo baliba bawe, balirukwa amabara ga bagenzi baabo nigaijukurana, nukwo batunge omugabo gw'obugwetwa bwabo.

⁷Habwokuba obu nkaba ninduga Padani, tuli omu muhanda, omunsi Kanaani, tuli haihi kuhika Efurati nkaferwa nyoko Rakeeri, namuziika ha rubaju rw'oruguudo orunyakutwara Efurati, niyo Beterehemu.”

⁸Isirairi obu yaboine batabani ba Yosefu yakaguza ati: “Banu nibaha?”

⁹Yosefu yagarukamu ise ati: “Abo nubo batabani bange, Ruhanga aba yampeeriire kunu.” Isirairi yagamba ati: “Banyirize haihi mbahe omugisa.”

¹⁰Omu kasumi ako, amaiso ga Isirairi gakaba gahimbaire, atakyahweza. Aho Yosefu yabamwiriza haihi, Isirairi yabanywegera kandi yababumbaatira.

¹¹Isirairi yagambira Yosefu ati: “Nkaba ntarukunihira kugaruka kukurora, baitu Ruhanga andoleze n'abaana bawe.”

¹²Aho Yosefu yaiha abaana ha bibero bya isenkurubo, yajuumara hansi.

¹³Yosefu yakwata abaana bombi, Efuraimu yamukwasa omukono ogw'obulyo, yamuta ha rubaju rw'emoso orwa Isirairi, kandi Manaase yamukwasa omukono ogw'emoso, yamuta ha rubaju orw'obulyo orwa Isirairi, yabamwiriza haihi.

¹⁴Isirairi yagorra emikono ye, yagisoberaniza ogw'obulyo yaguta ha mutwe gw'Efuraimu omuto, kandi ogw'emoso, yaguta ha mutwe gwa Manaase, habwokuba Manaase nuwe akaba ali muzigaijo.

¹⁵Yaha Yosefu omugisa naagamba ati: “Ruhanga owa baisenkurwinywe, Abburahamu na Isaaka ou baaherezaaga, ayandinzire ira lyona okuhika na hati,

¹⁶malaika ayanjunire obubi bwona, Ruhanga ogu, abaana banu abahe omugisa beeyongere bakanye muno omunsi, kandi ibara lyange, n'amabara aga baisenkuru-nyowe Abburahamu na Isaaka, galeke kweba ebiro byona.”

¹⁷Yosefu obu yarozire ise naata omukono gwe ogw'obulyo ha mutwe gwa Efuraimu, yabiihirwa, yakwata omukono gwa ise, agwihe ha mutwe gwa Efuraimu, agute ha gwa Manaase.

¹⁸Yosefu yagambira ise ati: “Taata, eki orukukora tikihikire, habwokuba, onu nuwe muzigaijo, nuwe oteho omukono gwawe ogw'obulyo.”

¹⁹Baitu ise yayanga naagamba ati: “Mwana wange, nimmanya, mmanyire onu, na uwe alirugwamu abantu baingi, kandi aliba w'ekitiinisa, baitu muto we alimukiza ekitiinisa, kandi baijukuru be baliba ihanga likooto.”

²⁰Ha kiro eki, bombi yabaha omugisa naagamba ati: “Abantu ab'omu Isirairi, obu baraabaga nibasaba omugisa, baraayaturaga amabara ganyu nibagamba bati: ‘Ruhanga atukorre nk'ebi yakoliire Efuraimu na Manaase.’ Yakobbo, nukwo yakulize ati Efuraimu, yamukiza mugenzi we Manaase.”

²¹Kandi Isirairi yagamba Yosefu ati: “Hati ndi haihi kufa, baitu Ruhanga araikaraga na iwe, kandi alikugarrayo omunsi eya baaswenkuru.

²²Nkuhaire orubaju rumu orw'orusozi, nakukizaaho bagenzi bawe ensi ei nabahaire, ei nanyagisize empirima n'obuta, naginyagaho Abamooli.”