Read Runyoro - rutooro Kub 49 Bible Online

Kub 49 - Runyoro - rutooro bible

Kub 49

¹Kandi Yakobbo yayeta abatabani yabagambira ati: “Mwirre haihi mbagambire ebiribaho omu biro ebiriija.

²Inywe batabani ba Yakobbo mwesorooze, mutege amatu, muhulirize isiinywe Isirairi eki arukubagambira.

³Rubbeni niwe muzigaijo gwange, maani gange, omwana ou nabandize kuzaara omu busigazi bwange, anyakukira kwegonza muno kandi ow'obusobozi obwingi.

⁴Anyakwikara naatabanguka nk'amaizi, tolyeyongera omumaiso, habwokuba okatemba ekitabu kya Sso wakisiitaza, wabyama na muka Sso!

⁵Simyoni na Leevi, nyineemu, bantu abatagira nkebe, abeesiguza empirima,

⁶Tindiikiriza ebi baahanwire, tikimpikiriire kwetaba na bo, habwokuba obu bakwatwa ekiniga, baita abantu, obu kabasoha, batema ente ebiteega.

⁷Ekiniga kyabo, nikikafuuhe, habwokuba kitiinisa abantu, obukaya bwabo nibukaigale, habwokuba tibugira mbabazi. Ndibabaganiriza omu Yakobbo, Mbararangize omu Isirairi.

⁸Iwe Yuda, bagenzi bawe baraakuhaisanizaga, abanyanzigwa bawe, oraababundiikaga abaana ba Sso, baraakuramyaga.

⁹Yuda naasisana ekyana ky'entale, Mwana wange ogarukire nooruga kwita, Oyegoroire wabundaara nk'entale, nk'ebuguma y'entale, Nooha araayehwamu kukwimukya?

¹⁰Omwigo gw'obukama tiguliruga hali Yuda, kandi omwigo gw'obulemi tigulimwihwaho kuhikya mukama wabyo obu aliija, ogu nuwe amahanga galigayuka.

¹¹Enkaina ye agisibika ha muzabbibbu, kandi omwana gw'enkaina ye agusibika ha muzabbibbu omurungi. Omwegereko gwe, agwogesa eviini; kandi ekanzu ye agyogesa ensande ey'ebijuma eby'emizabbibbu.

¹²Amaiso ge nigananata kukira eviini. Amaino ge nigeera kukira amata.

¹³Zabburuni araikaraga ha musa gw'enyanja, araabaga mwogo gw'amaato, kandi omutaano gwe guligarukira Sidoni.

¹⁴Isakara nkaina ey'amaani. Aikara abundaire omu masibiko ag'entaama,

¹⁵akarora okwikara omuka agwagwaine nikyo kirungi, kandi ensi nkooku erukusemeza omuntu, yaikiriza omulimo gw'okwetweka, yafooka mwiru ow'okukoraga emirimo ey'amaani.

¹⁶Daani araacweraga emisango abantu ab'enganda zoona eza Isirairi, nk'enganda ezindi eza Isirairi oku zinyina emirimo yazo.

¹⁷Araabaga njoka enyakwikara omu muhanda, araabaga ncwera enyakwikara ha muhanda, enyakutema obukangaasi bw'embaraasi, nukwo omutembi wayo ayeteere hansi.

¹⁸Ai MUKAMA, nkutegeriize kunjuna.

¹⁹Gaadi aliseesirwa abanyagi, na uwe alibahondera abanyage.

²⁰Aseeri araalyaaga ebyokulya ebirungi, nuwe araaliisaaga abaana b'engoma ebyokulya.

²¹Nafutaali buguma y'ensa etasibikirwe, enyakuzaara ensa ento enungi.

²²Yosefu itaagi erinyakwana ebijuma ebirungi, itaagi erinyakwana muno erinyakuli haihi n'ekisaaru, amataagi ge gaganaaganira ha kisiika.

²³Abarasi b'emyambi bakamuseesira bataina mbabazi, baamurasa, baamusaaliza muno;

²⁴Baitu obuta bwe bwaikara butegekerwe kwonka, emikono ye yaikara neeyabaabata, neeremwa ogu ow'obusobozi bwona, Ruhanga owa Yakobbo, (neeremwa ogu arukwetwa omuliisa, kandi Omwandara gwa Isirairi)

²⁵neeremwa Ruhanga wa Sso alikukonyera, neeremwa Ruhanga ow'obusobozi bwona alikuha omugisa, alikuha omugisa gw'enjura kuruga haiguru, akuhe emigisa g'ensoro z'amaizi alikuha emigisa nk'eyaaha abali omunda n'abarukwonka.

²⁶Emigisa eya Sso, y'amaani okukira ensozi eza buli na buli, neekira ebirungi ebinyakuruga omu busozi obwabaireho ira na ira. Emigisa egi ikalege hali Yosefu, kandi ikalege ha mutwe gw'ogu ayakomerwe omu bagenzi be.

²⁷Benyamiini nugwo mwaga ogunyakutuubire, nyenkya gusonsomera ekisoro eki gwisire, kandi orwebagyo gulya hamu n'ebisoro ebindi.”

²⁸Ezi nizo nganda ikumi na ibiri eza Isirairi, kandi ebi nibyo bigambo isebo Yakobbo ebi yagambire obu akaba naabaha omugisa, buli omu, akamuha omugisa ogunyakumusemeriire.

²⁹Aho yabateererra naagamba ati: “Ndi haihi kufa nkurate baisenkurunyowe, obu ndaafa munziike hamu na baisenkurunyowe,

³⁰omu bwingira bw'omukibanja ekinyakuli Makipera, kiroleriire Butuukaizooba bwa Mamule, omunsi Kanaani, ekibanja eki, Abburahamu akakiguraho Efuroni Omuhiiti, kibe kibanja kye eky'okuziikamuga.

³¹Oku nuho baaziikire Abburahamu na mukazi we Saara, nuho baaziikire Isaaka na Rebbeka mukazi we, kandi nuho naziikire Leeya.

³²Ekibanja eki n'obwingira obukaba burumu, Abburahamu akabiguraho Abahiiti.”

³³Yakobbo obu yamazire kuteererra abatabani, yahinya amaguru ge, yagata ha kitabu kye, yakaba yakurata baisenkuru.